Encyclopædia Britannica bukana ia gwau, Ista be “Keristani dubudia edia dina badana, unai negai idia ese Iesu Keriso ena toreisi lou dinana idia moalelaia.” To, oi laloa Ista be Keristani taudia edia dina badana, a?

Diba bada taudia be idia davaria gauna idia tahua namonamo, unai amo idia itaia guna taunimanima ese unai idia gaukaralaia o lasi. Unai hegeregerena, namona be Ista ena anina o ia mai dalana ita tahua namonamo, unai amo do ita itaia ia be Keristani taudia edia dina badana o lasi.

Mani oi laloa, Iesu ese aposetolo taudia ia hamaoroa, ena toreisi lou dinana lasi, to ena mase dinana idia laloatao be namo. Aposetolo Paulo ese unai dina ia gwauraia, “Lohiabada ena anibou.”​—1 Korinto 11:20; Luka 22:19, 20.

Britannica bukana ma ia gwau, Ista negadiai, momo be Iesu ena toreisi lou dinana “idia laloa bada lasi, to sene edia kastom karadia momo idia karaia.” Hegeregere, The Encyclopedia of Religon bukana ese Ista ena gatoi bona rabiti be inai bamona ia herevalaia : “Gatoi ena koukou ia makohia neganai, mauri matamata ia vara.” Ma ia gwau: “Rabiti be natudia havaraia siahuna ena toana, bona siahu ia matamaia neganai tubutubu gaudia idia vara matamaia karana ia laulaulaia.”

Profesa Philippe Walter be sene taudia idia herevalaia bukadia ia diba momo, bona ia ese Ista dinana ai unai kastom (gatoi bona rabiti gaukaralaia karana) idia vareai dalana ia herevalaia. Ia gwau, “taunimanima ese Dirava diba lasi taudia edia lalohadai be Keristani taudia edia ida idia hakapua” dainai, Keristani taudia ese unai taudia edia dina badadia idia moalelaia. Idia ese Iesu ena toreisi lou dinana sibona lasi, to “keru negana ia ore bona siahu negana ia matamana dinana idia moalelaia” danu. Walter ma ia gwau, unai dala amo taunimanima ese “Keristani taudia edia dina badana” be Dirava diba lasi taudia edia kalenda ai idia atoa, bona Keristani tomadiho lalonai koikoi karadia idia vareai dalana be unai.

To aposetolo taudia idia do mauri noho neganai, idia ese Dirava diba lasi taudia edia koikoi karadia idia “koua.” (2 Tesalonika 2:7) Aposetolo Paulo ese Keristani taudia ia hadibaia, idia do ia “rakatania murinai,” tatau haida “do idia toreisi bona hereva momokani do idia mogea. Bona hahediba taudia do idia hakaua siri, edia murinai idia raka totona.” (Kara 20:29, 30) Lagani momo murinai, aposetolo Ioane ia gwau tatau haida ese Keristani taudia idia hakaua kerere. (1 Ioane 2:18, 26) Gabeai, Keristani taudia be Dirava diba lasi taudia edia lalohadai idia badinaia.

To reana haida do idia gwau, Ista ena moale karadia haida be kerere lasi​—unai amo Dirava diba lasi taudia be Iesu ena toreisi lou ena anina idia lalopararalaia. To, Paulo be unai bamona lalohadai do ia abia dae lasi. Ena be Roma hanuadia dekenai kastom karadia be idauidau, to Paulo be unai kastom karadia ia badinaia lasi bona ia ese Iesu ia harorolaia neganai, unai kastom karana ta ia herevalaia lasi o gaukaralaia lasi. Ia ese Keristani taudia ia hadibaia: “Abidadama lasi taudia ida do umui hakapua tamona lasi. Badina edena bamona kara maoromaoro bona kara dika idia turana diba? Eiava edena bamona diari bona dibura idia noho hebou diba? Unai dainai Iehova ia gwau: ‘Umui ese idia do umui rakatania, bona idia amo do umui parara. Bona miro gauna do umui dogoatao lasi.’”​—2 Korinto 6:14, 17.

Ista ena anina ita tahua namonamo karana amo dahaka ita dibaia? Ia hahedinaraia goevagoeva Ista be Keristani edia dina badana lasi.