Lau be New York, U.S.A. ena taoni maragina ta ladana, Ancram dekenai lau bada. Unai gabu ai fama momo idia noho dainai, boromakau be momo herea.

Dubu be tamona bona egu famili be unai dubu dekenai idia lao. Sunday daba ibounai, egu tubuna tau ese egu tamaka ia polisia, bona egu tubuna hahine ese ia henia Baibel kurokuro maragina lau abia, bona Sunday sikuli dekenai lau lao. Egu tama sina ese lau, egu tadina mero bona kekeni idia hadibaia ai gaukara goada, ma haida ai matauraia, emai neiba do ai durua, bona ai abia hahenamodia dainai Dirava ai tanikiu henia.

Lau bada neganai, egu famili lau rakatania bena sikuli tisa ta ai lau lao. Unai negai, Dirava bona mauri dekenai lau be mai egu daradara momo. Egu stiuden haida edia diba be bada bona haida edia diba be bada lasi, to idia gaukara goada. Haida edia tauanina be mai edia gorere, to ma haida be idia goada. Lau laloa unai be maoro lasi. Nega haida edia diba be bada lasi stiuden edia tama sina idia gwau: “Dirava ena ura dainai egu natuna be unai bamona.” Unai dainai lau laloa: ‘Dahaka dainai natudia haida be mai gorere ida idia vara, bona Dirava ese ia koua lasi? Natudia be kerere ta idia karaia lasi.’

Danu, lau laloa: ‘Egu mauri lalonai dahaka mai anina bada gauna do lau karaia?’ Lau mamia egu mauri lagani ia bada noho. Ruma bese namona ta ai lau bada, sikuli namodia lau lao, bona hari lau ura henia moni gaukarana lau karaia. To, lau mamia egu mauri be anina lasi. Lau ura lau headava, ruma namona ta lau abia, natudia lau havaraia, bona moni gaukara do lau karaia ela bona lau ritaea, bena gabeai buruka taudia idia naria rumana ai lau noho diba. Lau laloa, ‘Mauri be unai sibona, a?’

Loaloa negana ta ai, tisa taudia haida ida Europe dekenai ai lao. Unuseniai dubu badadia hegeregere, Westminster Abbey, Notre-Dame de Paris, Vatican, bona dubu maragidia ma haida ai vadivadi henia danu. Bona unai dubu taudia dekenai egu henanadai lau gwauraia. Gabeai Sloatsburg, New York dekenai ai giroa  neganai, dubu ma haida lau vadivadi henia. To, ta ese egu henanadai ia haerelaia lasi.

Dina ta, mauri lagani 12 sikuli kekeni ta ese lau dekenai henanadai toi ia henia. Ia gwau: “Oi diba lau be Iehova ena Witnes kekenina ta, a?” Lau haere oibe. Ma ia gwau: “Oi ura Iehova ena Witnes taudia oi diba namonamo a?” Lau haere oibe. Ma ia gwau: “Oi be edeseniai oi noho?” Egu noho gabuna lau gwauraia neganai, ai laloparara ai be strit tamona dekenai ai noho. Lau diba lasi gauna be, unai kekeni maragi ena henanadai toi ese egu mauri do idia haidaua momokani.

Gabeai, ena basikele amo egu ruma dekenai ia mai, bona Baibel stadi ta ai hamatamaia. Tomadiho gunalaia taudia momo dekenai lau gwauraia henanadai be ia dekenai lau nanadaia. Maoromaoro ena Baibel amo haere ia henia—guna unai lau kamonai lasi!

Baibel amo lau dibaia gaudia ese moale korikorina ia henia. Ioane Ginigunana 5:19 lau duahia neganai, lau ia durua bada. Ia gwau: “Ita diba ita be Dirava amo, to tanobada ibounai be Dika Tauna ena siahu lalonai ia noho.” Unai siri amo lau diba tanobada ai idia vara hisihisi ibounai be Satani ese ia havaraia, to gabeai Dirava ese unai gaudia ibounai do ia hanamoa lou. (Apokalupo 21:3, 4) Baibel ena hereva ibounai ia hedinarai goevagoeva, bona lau lalopararalaia namonamo. Herevana lau ia stadi henia Witnes kekeni ena mauri lagani be 12 sibona, to lau abia dae ia be hereva momokani ia gwauraia.

To, lau ura diba bema Witnes taudia be idia harorolaia herevadia idia badinaia. Hegeregere, kekeni maragina ia gwau, Keristani taudia korikoridia ese haheauka bona hebogahisi idia hahedinaraia. (Galatia 5:22, 23) Unai dainai, lau ura ia lau tohoa bema ia be unai kara namodia do ia hahedinaraia. Nega ta ia lau tohoa, bona egu stadi totona lau leiti. Lau laloa, ‘Ia be lau do ia naria eiava? Bona bema ia naria, lau do ia badu henia, o?’ Motuka amo lau heau vareai neganai, lau itaia ia be egu ruma ena vadavada dekenai ia helai. Lau dekenai ia heau mai bona ia gwau: “Kahirakahira lau lao bona egu sinana lau hamaoroa, pulisi bona hospital do ai rini henidia bona oi do ai sekea, badina oi be stadi totona oi leiti diba lasi. Lau be oi lau laloa bada!”

Nega ma ta ai, unai kekeni maragina dekenai henanadai aukana ta lau henia, bona lau ura itaia bema ia be sibona ena lalohadai amo do ia haere. Unai henanadai lau henia neganai, ia be lau ia itaia bona ia gwau: “Unai be henanadai badana ta, do lau torea bona egu tama sina do lau nanadaia.” Gabeai emai stadi totona ia mai neganai, egu henanadai ia haerelaia Gima Kohorona ta ia mailaia. Unai kara dainai lau be Iehova ena Witnes taudia lau ura henia, badina edia pablikeisen ibounai lalonai Baibel ena hereva idia noho, bona egu henanadai ibounai idia haerelaia. Unai kekeni maragi ida ai stadi ela bona lagani ta murinai, lau bapatiso bona Iehova ena Witnes ta ai lau lao. a

Baibel amo egu henanadai ibounai edia haere lau davaria neganai, lau ura ma haida dekenai lau herevalaia. (Mataio 12:35) Matamanai, egu famili ese egu tomadiho dalana idia dadaraia, to gabeai edia kara idia haidaua. Egu sinana ia buruka momokani neganai, Baibel ia stadilaia matamaia. Ena be ia bapatiso lasi bena ia mase, to lau diba ia be ena lalona ia hadaia Iehova ia hesiai henia totona.

Lagani 1978 ai, Witnes tauna ta ladana, Elias Kazan lau adavaia. Lagani 1981 ai, ai idia boiria United States ena Betele dekenai do ai gaukara. b Lau bona Elias be lagani foa sibona Betele dekenai ai gaukara murinai, Elias ia mase. Ena be lau vabu, to Betele ai lau gaukara noho, bona unai ese lau ia durua bona hagoadaia bada.

Lagani 2006 ai, Betele tadikaka ta ladana, Richard Eldred lau adavaia, bona ai be Betele dekenai ai gaukara noho. Dirava ena sivarai momokanina lau dibaia neganai, unai ese lau ia durua egu henanadai edia haere lau davaria bona mauri ena anina lau davaria danu. Bona unai ibounai be kekeni maragina ta ena henanadai toi amo ia matamaia.