TANOBADA hegegemadai ai idia noho tomadiho ibounai, hegeregere Roman Katolik Oreana, Orthodox tomadihona, Buddhism tomadihona, bona tomadiho orea ma haida idia gwau dubu gunalaia taudia bona pris taudia be headava lasi taravatuna idia badinaia be namo. To, taunimanima momo idia gwau unai bamona headava lasi taravatuna dainai, tomadiho idauidau lalonai dubu gunalaia taudia bona pris taudia be matabodaga karadia idia karaia.

Unai dainai, namona be ita henanadai, Baibel be Keristani taudia totona headava lasi taravatuna ia atoa, a? Unai henanadai ena haere abia totona, mani unai kara ia matamaia bona ia bada dalana bona Dirava ena lalohadai unai kara dekenai ita itaia.

Lagani 2006 ai, Pope Benedict XVI ese orea ta ladana Roman Curia ia hereva henidia neganai ia gwau, headava lasi karana “be idaunegai Aposetolo Taudia edia negai ia matamaia.”

To, headava lasi karana be idaunegai Keristani taudia ese idia badinaia lasi. Aposetolo edia nega ai ia noho tauna, aposetolo Paulo, ese abidadama taudia ia hadibaia tatau haida be “hadibaia hereva” koikoidia do idia gwauraia bona “headava do idia taravatua.”—1 Timoteo. 4:1-3.

Lagani 200 C.E. lalonai, headava lasi karana ena taravatu be sibodia idia gwauraia Keristani tomadiho oreadia ese idia badinaia matamaia. Buka ta, (Celibacy and Religious Traditions) ia gwau: “Roma Basileiana lalonai matabodaga karadia be ia bada momokani.”

Murinai laganidia lalonai, dubu ena kaunsolo taudia, bona sibona idia gwauraia dubu gunalaia taudia (Church Fathers) ese headava lasi taravatuna idia hagoadaia. Idia laloa mahuta hebou karana be dika bona pris taudia edia gaukara do ia hadikaia. To,  buka ta (Encyclopædia Britannica) ese ia hahedinaraia “lagani 900-1000 C.E. lalonai pris taudia momo bona bisop taudia ma haida be mai edia adavadia.”

Rome ai idia karaia heboudia (Lateran Councils 1123 bona 1139) ai, idia ese headava lasi ena taravatu idia hagoadaia bona Roman Katolik Oreana ese unai lalohadai idia badinaia ema bona hari. Unai badina dainai, pris taudia do idia headava bona edia natudia dekenai dubu ena kohu do idia henia hanai henia karana ia koua, bona edia dagi bona moni danu do idia haboioa lasi.

Dirava ena lalohadai headava lasi taravatuna dekenai be iena Hereva, Baibel ai ia hedinarai goevagoeva. Ia lalonai Iesu ena hereva ita duahia, “guba Basileia dainai” haida be ia hegeregerena idia headava lasi. (Mataio 19:12) Unai hegeregerena, aposetolo Paulo ese iena haheitalai idia badinaia Keristani taudia haida ia herevalaia, idia be “sivarai namona dainai” idia headava lasi.—1 Korinto 7:37, 38; 9:23.

To Iesu bona Paulo edia hereva ena anina be Keristani taudia be do idia headava lasi, a? Lasi. Iesu ia gwau singul maurina be “harihari gauna” iena murinai idia raka taudia be ta ta sibona ese ena abia hidi ia karaia diba. Paulo be idia “headava lasi taudia” dekenai ena revareva ia torea neganai, ia gwau: ‘Lau be Lohiabada amo hahegani ta lau abia lasi, to egu lalohadai lau gwauraia.’—Mataio 19:11; 1 Korinto 7:25.

Unai dainai, Baibel ese ia hahedinaraia aposetolo edia negai idia noho Keristani taudia, Petero danu, be headava taudia. (Mataio 8:14; Mareko 1:29-31; 1 Korinto 9:5) To unai negai Roma ai, matabodaga karadia idia bada dainai, Paulo ena revareva idia headava taudia totona be, bema Keristani elda tauna be headava tauna, “ia be hahine tamona ena adavana” bona “iena natudia be mai laloa namonamo ida iena henunai idia noho.”—1 Timoteo 3:2, 4.

Inai ena anina be ta be ia headava diba, badina Baibel ese ia hahedinaraia goevagoeva “tau ese iena adavana dekenai headava kara do ia henia” bona headava taudia ese “ta ta dekenai headava kara do [idia] koua lasi.” (1 Korinto. 7:3-5) Ia hedinarai goevagoeva, headava lasi taravatuna be Dirava ena lalohadai lasi, eiava unai be Keristani taudia ese do idia badinaia taravatuna ta lasi.

Bema headava karana be taravatu lasi, dahaka dainai Iesu bona Paulo ese singul maurina ena namo idia herevalaia? Badina singul taudia be nega bada idia atoa diba ma haida dekenai sivarai namona idia harorolaia totona. Singul taudia be gaukara momo idia karaia diba, badina headava taudia ese idia abia lalohekwarahi idauidau idia abia lasi.—1 Korinto 7:32-35.

David ena haheitalai mani ita laloa, ia be Mexico tanona ai pei badana ia abia moni gaukara ia rakatania, Costa Rica ena hanua maragina ta dekenai ia lao Baibel hadibaia gaukarana ia karaia totona. David ia laloa singul maurina ese ia ia durua unai ia karaia totona, a? Ia gwau, “Oibe.” Ma ia gwau, “kastom bona mauri dala matamatana lau badinaia totona be mai ena hekwarahi, to lau be sibona dainai, unai gabu ena noho dalana lau manadalaia haraga.”

Claudia, singul Keristani kekeni ta be, pablisa momo lasi gabuna ta dekenai ia lao neganai ia gwau: “Egu Dirava hesiai henia gaukarana lau moalelaia. Danu Dirava ese lau ia durua karana lau itaia neganai, unai ese egu abidadama bona egu hetura karana Ia ida ia hagoadaia.”

Singul maurina oi moalelaia diba. Claudia ma ia gwau: “Herevana oi headava o lasi, do oi moale bema mai kudouna ibounai ida Iehova Dirava oi hesiai henia.”—Salamo 119:1, 2.