Lau be Puerto Limon dekenai lau tubu daekau, unai siti be Costa Rica ena kone kahanai ia noho. Egu tama sina ese natudia 8 idia havaraia, lau be namba seven famili lalonai. Egu mauri lagani be 8 neganai, egu tamana ia mase. Unai murinai, egu sinana sibona ese ai natudia ibounai ia naria.

Egu mauri lalonai beisbol gadara lau laloa bada. Lau maragi neganai, unai gadara lau moalelaia. Egu mauri lagani be 19 eiava 20 bamona neganai, beisbol tim maragina ida lau gadara matamaia. Egu mauri lagani be 20 ia hanaia bona unai tim totona lau gadara noho lalonai, ta ese lau ia noia bema tim badana ta totona Nicaragua ai lau gadara diba. To, unai negai egu sinana ia gorere momo bona ia lau naria dainai, Nicaragua dekenai lau lao lasi. Unai dainai unai tauna ena noinoi lau abia dae lasi. Gabeai, ma ta ese lau ia noia Costa Rica ena nesenel beisbol tim totona do lau gadara, unai tim lalonai tim maragina amo idia abia hidi gadara taudia idia noho. Inai nega ai, unai noinoi herevana lau abia dae. Lagani 1949 ia lao 1952 ai nesenel tim totona lau gadara, Cuba, Mexico bona Nicaragua dekenai. Lau gadara namonamo dainai, egu gadara ibounai 17 lalonai, kerere ta lau karaia lasi! Hutuma ese egu ladana idia boiboilaia loulou neganai, unai lau ura henia bada!

To, unai negai matabodaga mauri dalana lau noholaia danu. Ena be egu gelfren be tamona, to hahine ma haida lau bamodia. Lau inuinu momo danu. Nega ta lau kekero momokani bona murina dinana ai lau noga neganai, lau laloatao diba lasi edena bamona egu ruma dekenai lau ginidae! Lau ese laki gadara idauidau lau karaia danu.

Lau be unai bamona mauri lau noholaia lalonai, egu sinana be Iehova ena Witnes ta ai ia lao. Ia ese ena abidadama be lau dekenai ia herevalaia, to matamanai ia kwalimu lasi badina egu spot gadara lau laloa bada momokani. Bema unai be aniani negana bona lau treinini noho, hitolo mamina lau abia lasi! Lauegu lalohadai ibounai be unai gadara sibona dekenai. Beisbol gadara lau ura henia momokani!

To egu mauri lagani be 29 neganai, bero dikana lau abia, gadara ta lalonai lau ura bolo lau gobea neganai, unai ia vara. Lau namo lou murinai, unai gadara lau hadokoa. To beisbol gadara taudia dekenai heduru lau henia bona idia lau treinia, egu noho gabuna kahirakahira ai.

Lagani 1957 ai, invateisen ta lau abia dae bona Iehova ena Witnes taudia edia hebouhebou dekenai lau lao, unai hebou be guna beisbol gadara lau karaia steidiam dekenai idia karaia. Unai hebou lalonai, lau itaia Witnes taudia be hemataurai bada karana idia hahedinaraia, to guna beisbol gadara ai idia noho hutuma be idia dagedage bona regerege bada. Hebouhebou dekenai lau itaia gaudia ese lau ia veria Witnes taudia ida Baibel lau stadilaia totona bona edia kongrigeisen heboudia lau lao henia.

Lau dibaia Baibel ena hadibaia hereva momo dainai lau hoa. Hegeregere Iesu ia peroveta, dina gabediai iena hahediba taudia ese tanobada ibounai dekenai Dirava ena Basileia ena sivarai namona do idia harorolaia. (Mataio 24:14) Lau dibaia gauna ta be, Keristani taudia momokanidia ese moni abia totona edia hesiai gaukara idia karaia lasi. Iesu ia gwau: “Umui abia davana lasi, umui henia davana lasi.”—Mataio 10:8.

Baibel lau stadilaia neganai, ena hereva lau hahegeregerea Iehova ena Witnes taudia edia kara ida. Idia hesiku lasi tanobada hegegemadai Dirava ena Basileia sivarai namona idia harorolaia totona, bona unai kara lau laloa bada. Iesu ese Keristani taudia ia haganidia sibodia idia henia totona, bona unai kara be idia dekenai lau itaia. Unai dainai Mareko 10:21 ai Iesu ena boiboi herevana, “Lauegu murinai oi raka” lau duahia neganai, lau ura Witnes ta ai lau lao.

To nega sisina daudau murinai, unai lau karaia. Hegeregere, lagani momo lalonai nesenel laki gadara ai egu “laki” namba lau gadaralaia wiki ta ta ai. To Baibel amo lau diba Dirava ese “laki ena dirava” idia tomadiho henia taudia bona mataganigani taudia ia inai henia. (Isaia 65:11; Kolose 3:5) Unai dainai laki gadara lau hadokoa. Bena unai wiki ena Sunday ai, egu “laki” namba ia wini! Taunimanima ese lau idia kirikirilaia badina unai wiki ai lau gadara lasi, bona egu lalona idia ania lau gadara lou totona, to lau karaia lasi. Gabeai laki gadara lau karaia lou lasi.

“Mauri matamata” lau badinaia matamaia neganai, hahetoho ta lau davaria Iehova ena Witnes taudia edia hebouhebou ai lau bapatiso dinana ai. (Efeso 4:24) Unai adorahi ai, lau noho hotel dekenai lau giroa lou neganai, egu gelfren gunana be egu daiutu ena iduara murimuri ai ia gini noho. Bona lau ia hauraia ia gwau, “Sammy, ita moale hebou.” To maoromaoro lau gwau, “Lasi!” Ia lau hamaoroa lau be hari Baibel ena taravatu hegeregerena lau noho. (1 Korinto 6:18) Ia boiboi, ia gwau, “Dahaka?” Ia ese Baibel ena lalohadai matabodaga karana dekenai ia laloa maragi bona ia ura emai hetura karana ai hamatamaia lou. To egu daiutu lalonai lau raka vareai bona iduara lau lokaia. Lagani 1958 ai Witnes tauna ai lau lao, bona egu mauri lalonai lau rakatania gaudia lau karaia lou lasi dainai, lau moale.

Baibel ena hakaua herevadia lau badinaia dainai, lau mamia buka ta lau torea diba unai hahenamo ibounai lau herevalaia totona. Unai hahenamo haida be, lau be mai egu tura korikoridia momo, egu mauri be mai anina, bona moale korikori lau davaria.

Beisbol lau do moalelaia, to gau momo dekenai egu laloa dalana lau haidaua. Guna beisbol gadara lalonai lada bada bona moni lau abia, to unai gaudia idia noho daudau lasi. To egu hetura karana Dirava ida bona egu tadikaka ida be do ia noho ela bona hanaihanai. Baibel ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:17) Hari, Iehova Dirava bona ena taunimanima lau lalokau henidia momokani!