Toana be hosi guia taudia foa edia sivarai be hehuni gauna bona ita ia hagaria, to namo lasi unai bamona ita laloa. Dahaka dainai? Badina Baibel bona histori ese ita ia durua unai hosi guia taudia ta ta be dahaka idia laulaulaia ita dibaia totona. Ena be idia heau matamaia neganai, tanobada ai dika bada herea idia havaraia, to unai be sivarai namona oi bona emu ruma bese taudia dekenai. Edena dala ai? Unai hosi guia taudia ta ta be daidia, mani ita tahua.

Unai matahanai ia matamaia dalana be inai: “Vadaeni lau itaia, hosi kurokurona ta, bona ia latanai ia helai tauna be mai ena peva bona Dirava ese ia dekenai korona ta ia henia. Vadaeni ia lao bona ena inai taudia ia hadarerea, bena ia kwalimu.”—Apokalupo 6:2.

Daika be hosi kurokuro ia guia tauna? Unai tauna ita diba dalana be Apokalupo bukana ese ia hahedinaraia, ia gwau unai tauna be “Dirava ena Hereva.” (Apokalupo 19:11-13) Unai dagi ladana be Iesu Keriso ia herevalaia, badina ia be Dirava ena hereva gwauraia tauna. (Ioane 1:1, 14) Danu, ia idia gwauraia “King ibounai edia king, bona lohia ibounai edia Lohia” bona ia be “Abidadama bona Momokani.” (Apokalupo 19:16) Ia hedinarai goevagoeva, ia be mai ena siahu tuari pavapavana ai ia lao totona, ia ese ena siahu be dala dikana ai ia gaukaralaia lasi. To unai ese henanadai haida ia havaraia.

Daika ese Iesu dekenai siahu ia henia ia kwalimu totona? (Apokalupo 6:2) Peroveta tauna Daniela ese matahanai ta amo Mesia ia itaia, “iena toana be taunimanima edia toana bamona” bona “Mauri Noho Hanaihanai Tauna” Iehova Dirava * unai, ese ia dekenai “siahu bona mataurai bona dagi bada” ia henia. (Daniela 7:13, 14) Unai dainai, Siahu Ibounai Diravana ese Iesu dekenai siahu bona maoro ia henia, tanobada ia lohiaia bona ia hahemaoro henia totona. Hosi kurokurona be Dirava ena Natuna ese ia karaia kara maoromaoro tuarina totona idia gaukaralaia be maoro, badina nega momo Baibel ese inai kala kurokurona ia gaukaralaia kara maoromaoro ia herevalaia totona.—Apokalupo 3:4; 7:9, 13, 14.

Unai hosi guia taudia be edena negai idia heau matamaia? Hosi guia tauna ginigunana, Iesu unai, be king ai ia lao neganai, ia heau matamaia. (Apokalupo 6:2) Iesu be guba dekenai edena negai ia King matamaia? Ia mase murinai ia be guba dekenai ia daekau, to unai negai ia be king ai ia lao lasi. Baibel ese ia hahedinaraia, ia be ia naria. (Heberu 10:12, 13) Iesu ese ena murinai idia raka taudia dekenai unai naria negana ia doko ena toana bona do ia lohia matamaia ena toana ia gwauraia. Ia gwau ia lohia matamaia neganai, tanobada ai idia vara gaudia be do idia dika momokani. Hegeregere tuari, aniani be do idia bada lasi, bona daihanai gorere do idia vara. (Mataio 24:3, 7; Luka 21:10, 11) Tanobada Tuarina Ginigunana be lagani 1914 ai ia vara bena unai murinai, unai nega ia matamaia, Baibel ese unai hekwakwanai momo negana ia gwauraia, ‘dina gabedia.’—2 Timoteo 3:1-5.

To Iesu be lagani 1914 ai king ai ia lao neganai, dahaka dainai tanobada ai dika momo idia vara? Badina Iesu be guba dekenai ia lohia matamaia, to tanobada ai lasi. Bena guba dekenai tuari ia vara, bona King matamatana, Iesu, Baibel ese ia gwauraia Mikaela unai, ese Satani bona ena demoni be tanobada dekenai ia negea diho. (Apokalupo 12:7-9, 12) Satani be inai tanobada ai ia noho dainai ia badu dikadika, ia diba iena nega be kwadogi sibona. Kahirakahira Dirava ese inai tanobada ai Satani dekenai do ia karaia karana do ia hagugurua. (Mataio 6:10) Mani unai hosi guia taudia toi edia heau ita herevalaia, unai amo ita diba ita be ‘dina gabedia’ lalonai ita noho. Hosi guia tauna ginigunana be hosi guia taudia toi amo ia idau, badina ia be tau ta, to unai hosi guia taudia toi be tanobada ai idia vara noho gaudia idia laulaulaia.

“Bona hosi ma ta ia mai, ia be kakakaka, bona ia latanai ia helai tauna ese siahu ia abia, tanobada amo maino ia kokia totona, vadaeni taunimanima do idia ala-ala heheni. Bona ia ese tuari kaia badana ta ia abia.”—Apokalupo 6:4.

Unai hosi guia tauna be tuari ia laulaulaia. Ia ese bese haida sibona amo maino ia kokia lasi, to tanobada ibounai amo maino ia kokia. Lagani 1914 ai, nega ginigunana histori lalonai, tanobada ibounai tuarina ia vara. Ia murinai be tanobada ibounai tuari iharuana ia vara, bona unai ese tuari ginigunana ena dika ia hanaia momokani. Haida idia gwau, lagani 1914 amo ema bona hari, tuari amo idia mase taudia ibounai be hegeregere 100 milioni mai kahana bamona! Ma danu, taunimanima momo herea be bero badadia idia davaria bona unai ese ia hamanokadia.

To hari inai negai tuari ena bada be edena bamona? Histori ibounai lalonai inai be nega ginigunana, taunimanima be mai edia diba taunimanima oredia ibounai idia hadikaia ore totona. Sibodia idia gwauraia maino havaraia oreadia, hegeregere United Nations, ese hosi kakakakana ia guia tauna ena heau idia hadokoa diba lasi.

“Vadaeni lau itaia, hosi koremana ta, bona ia latanai ia helai tauna ena imana ai sikele ta ia dogoatao. Bona gado ta lau kamonai, toana be mauri gaudia 4 edia huana amo ia mai, ia gwau: ‘Witi kilogram ta ena davana be denario ta bona bali kilogram toi ena davana be denario ta bona olive oela bona wain do oi gaukaralaia namonamo.’”—Apokalupo 6:5, 6.

Unai hosi guia tauna be hitolo bada ia laulaulaia. Unai siri ese aniani ia maragi momokani ia herevalaia, witi kilogram ta ena davana be denario ta, Keristani ginigunadia edia nega ai denario ta be dina ta ena gaukara davana! (Mataio 20:2) Unai koini tamona ese bali kilogram toi ia hoia diba, witi ese bali ia hereaia. Bali kilogram toi eiava witi kilogram tamona ia hegeregere lasi ruma bese badana ia ubua totona, ani? Unai dainai namona be taunimanima ese edia aniani bona moni idia gaukaralaia namonamo, idaunegai olive oela bona wain be sisina sisina idia gaukaralaia hegeregerena.

Lagani 1914 amo ema bona hari, hamomokania gaudia ese idia hahedinaraia hosi koremana ia heau noho, a? Oibe! Lagani 1900 lalonai, taunimanima 70 milioni be hitolo bada dainai idia mase. Diba tauna ta ia gwau: “Lagani 2012 amo ia lao 2014 ai, taunimanima 805 milioni be idia aniani namonamo lasi, anina be tanobada ibounai ena popiuleisen amo taunimanima nain nain amo ta ta idia aniani namonamo lasi.” Bona ripoti ma ta ia gwau: “Hitolo ese ia hamasea taudia edia namba ese AIDS, malaria, bona TB gorerena amo idia mase taudia edia namba ia hereaia momokani.” Ena be taunimanima idia hekwarahi bada hitolo idia koua totona, to hosi koremana ia guia tauna be ia heau noho.

“Vadaeni lau itaia, hosi laboralabora ta, ia latanai ia helai tauna ena ladana be Mase. Bona Mase Gurina be ena murina momokani ia lao. Bona siahu idia abia tanobada ena kahana 4 amo kahana ta do idia biagua, bona do idia ala-ala tuari kaia latana ta amo, hitolo bada amo, gorere dikana amo, bona tanobada ena dagedage animal amo.”—Apokalupo 6:8.

Hosi guia tauna namba foa ese mase ia laulaulaia, mase be gorere dikadia bona badina ma haida dainai ia vara. Lagani 1914 murinai, udu kuru gorerena (Spanish flu) ese taunimanima milioni momo herea ia hamasea. Toana be taunimanima 500 milioni be unai gorere idia abia, anina be idia mauri taudia ibounai amo taunimanima toi toi amo ta ta ese unai gorere idia abia!

To unai udu kuru gorerena be hamatamaia sibona. Diba bada taudia idia gwau, lagani 1900 lalonai, smallpox gorerena ese taunimanima milioni momo herea ia hamasea. Ema bona hari, taunimanima milioni momo edia mauri be AIDS, TB, bona malaria gorerena ese ia hakwadogia, ena be medikol dalanai tahua gaukara bada herea idia karaia.

Herevana tuari, hitolo bada, eiava gorere ia vara, to idia ibounai ese gau tamona idia havaraia, mase unai. Taunimanima momo herea be gara gabunai idia lao, gara ese taunimanima dekenai helaro ia henia lasi.

Inai hekwakwanai momo negana be kahirakahira do ia ore. Laloatao: Iesu be lagani 1914 ai “ia lao bona ena inai taudia ia hadarerea,” Satani be tanobada dekenai ia negea diho, to iena tuari ia do haorea lasi. (Apokalupo 6:2; 12:9, 12) Kahirakahira Aramagedono ai, Iesu ese Satani ena siahu do ia kokia bona Demoni idia durua tanobada taudia ibounai do ia hadikaia ore. (Apokalupo 20:1-3) Iesu ese unai hosi guia taudia toi edia heau do ia hadokoa sibona lasi, to ia ese idia havaraia dika idauidau do ia haorea. Edena dala ai? Mani Baibel ena gwauhamata ita itaia.

Tuari do ia ore bona maino do ia vara. Iehova ese ‘tuari ia hadokoa noho, tanobada kahana ibounai dekenai. Ia ese peva ia makohia noho, bona io be ia ese ia hakwaidua noho.’ (Salamo 46:9) Maino idia ura henia taudia be “do idia helai namonamo, mai moale bona mai maino danu.”—Salamo 37:11.

Hitolo do ia ore bona aniani be momo herea. “Namona be koni momo herea, be tano dekenai do ia vara namonamo. Namona be ororo gabudia danu dekenai.”—Salamo 72:16.

Gorere bona mase do idia ore, bona taunimanima ibounai edia tauanina do ia goada bona do idia mauri ela bona hanaihanai. Dirava ese “mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore.”—Apokalupo 21:4.

Iesu be tanobada ai ia noho neganai, gabeai ena lohia negana ai do ia karaia gaudia be tanobada ai ia karaia. Ia ese maino ia herevalaia momo, hoa dalanai taunimanima tausen momo ia ubua, gorere taudia ia hanamoa, bona idia mase taudia danu ia hatoredia isi lou.—Mataio 12:15; 14:19-21; 26:52; Ioane 11:43, 44.

Unai hosi guia taudia ese edia heau idia hadokoa neganai, edena dala ai oi hegaegae diba? Iehova ena Witnes taudia be mai moale ida emu Baibel amo oi idia durua diba. Oi ura diba ma haida oi abia, a?