Fiile pheyerche saan tas se net soo fiil fertseele, aach wën se mitsamer sin. Warom tuut tas pasiire?

•  Mitsamer awer wayt wech eene fon te aner — Warom?

•  Was tuu mache khanst

•  Was etliche pheyerche saan

•  Iwer was khent teyer fertseele?

•   Sich miit xpiire

   “Wën ich un mayne man ëntlich een tsayt hon fer se fertseele, is eene fon uns imer miit. Un wën ich miit sin, tuun ich mich klaych mit kwalkee tings ayre. Tan, is es peser fer uns TV kuke.” — Anna

•   Internet

   “Es is laycht fiil tsayt mit te sotsyaale wëpe un internet aus kepe. Wëns tuu siist, sin ti xtune xon rom kang un tuu host net mit tayne man fertseelt. Wëns soo is, macht es khee sin tas ti tswaay im selwiche plats sin.” — Katherine

•   Interese woo anerste sin

   “Wën mayne man noo ti aarwayt hëm khomt, tuut eyer ofts ti tinge mache woo eyer kërn hot. Ich wees tas eyer fertiint een tsayt hon fer se ruue, wayl eyer fiil xaft. Awer ich wolt kërn tas mer mee tsayt mitsamer hëte.” — Jane

•   Aarwayt

   “Weeche ti teknoloxii, khan ma soo kaar xafe wën mer mit unser familye sin. Ofts mool, tuun ich e-mails un pexeete fon te aarwayt antworte in te tsayt woo ich mit mayn fraa tsayt aus kepe khent.” — Mark

•   Tenk traan tas tsayt mitsamer fertraype was wichtiches is; tas is net ploos etwas woos tuu mache solst wëns tuu tsayt iwrich host.

   Aanreet fon te Piipel: ‘Teyer solt aych sicher sin iwer was fer tinge wichticher sin.’ (Filiper 1:10)

   Tenk mool: Tuun mayn aktsyoone tsayche tas mayn hayrat wichticher is wii mayn aarwayt un ti tinge woo ich kërn mache? Tuun ich tsayt fer mayne man orer mayn fraa hoole ploos wën ich tsayt iwrich hon?

   Itee: Tuut pleene wan teyer khent tsayt mitsamer plaype, un wën tiise tsayt khom, lost niks aych ap lenke.

   “Ich liipe wën mayne man etwas ploos fer uns tswaay pleent. Wën eyer tas macht, tuun ich xpiire tas ich spetsyaal fer tëm sin un tas eyer kërn mit mich tsayt aus kept. Weeche tas, liipe ich tëm imer mee.” — Anna

•   Lërn te selulaar uf sayt lose

   Aanreet fon te Piipel: “Fer ales kepts een richtich tsayt.” (Eklesyastes 3:1)

   Tenk mool: Fiile layt lose tas ti pexeete un notifikatsyoone fom selulaar ti acht fom pheyerche xteele. Tas pasiirt aach mit tich?

   Itee: Fersuucht yeete taach weenichts een mool mitsamer ese un lost ayer selulaar uf een aner plats. Wën teyer mitsamer est, khent teyer eene mit te aner fertseele iwer was im taach pasiirt is.

•   Imer wëns meechlich is, keet mitsamer in te merkaat un macht ti tinge fom haus mitsamer

   Aanreet fon te Piipel: “Tswaay sin peser wii ploos eene, wayl se een kuut loon fon iire xweyer aarwayt kriin.” (Eklesyastes 4:9; noote)

   Tenk mool: Wën teyer ti tinge fom haus macht orer tinge khaaft, wii ofts tuut teyer tas aleen mache?

   Itee: Macht ti tinge mitsamer, soo kaar wën tas een aarwayt is woo ma aleen mache khan.

   “Es kept imer fiil se tuun, wii: tas kexër ap xpiile, tas tsaych uf raume, tinge khaafe un te hoof sauwer lose. Xtats tiise tinge wii een flicht siin, warom tan net tiise tinge siin wii een keleechenheet fer tsayt mitsamer fertraype?” — Nina

•   Say net tsu xtreng

   Aanreet fon te Piipel: “Al ti mënxe sole tsum wise kriin tas teyer net xtreng sayt.” (Filiper 4:5)

   Tenk mool: Wii khanst tuu wise tas tuu net tsu fiil fon tayne man orer tayn fraa waarst?

   Itee: Fertseelt eene mit te aner fer se ferxteen was yeete eene praucht. Tuut mitsamer ëntxlise wii teyer ayer tsayt aus kepe khent un fersuucht een solutsyoon fine woo fer aych tswaay kuut is un woo aych froo lost.

   “Mayne man hot fiil enerxii. Awer, weeche mayn kesuntheet, hon ich ploos pisye enerxii. Ofts, tuun ich fer tëm saan tas eyer sol etwas mache woo eyer kërn hot, un wën eyer tsurik khomt, tuun mer tsayt mitsamer fertraype. Soo, in te tsayt woo eyer esersiis macht — etwas woo eyer praucht —, khan ich ruue — etwas woo ich prauch. Meyer kepe froo wayl meyer tswaay khene mache was mer prayche.” — Daniela

 Eyerst, yeete eene khan aleen ti frooche antworte. Nochter, khent teyer fertseele iwer was teyer keantwort hot.

•   Tenkst tuu tas teyer kenuuch tsayt mitsamer aus kept, orer khent teyer aych ferpesere?

•   Was fer tinge tuut tayne man orer tayn fraa mache fer mee tsayt mit tich fertraype woos tuu loope khanst?

•   Was teest tuu kërn hon tas tayne man orer tayn fraa anerste mache solt?

•   Wën tayne man orer tayn fraa mit tich am xpreche is, wii ofts tuust tuu tich weeche ti teknoloxii ap lenke lose?

•   Wii khent teyer net tsu xtreng eene mit te aner sin?

•   In tiise woch, was fer ënerunge khent yeete eene fon aych mache fer mee tsayt mitsamer fertraype oone sich ap lenke?