Ti fraa khent say kehaymnis. Te tuut sich fiil peroye un ferlangt tas se iim unxultiche solt, tee ferxprecht noo lose, un fer een tsayt tuut eyer es phake, tan macht tee tas noch mool, un tas kanse kexicht khomt noch mool ales foer.

 Pist tuu in soo een situatsyoon? Soo prauchst tuu erkhëne wii tayn kewoonheet fer pornokrafii kuke tayn man orer fraa petreft, un wii khanst tuu fon tiise praktik fer imer wech plaype. a

In tiise artikel

•  Was must tuu wise

•  Was khanst tuu mache

•  Wën tayn man pornokrafii kukt

 Ti pornokrafii khan tayn hayrat fersaue, tas macht tas te unxultiche (man orer fraa) sich traurich xpiirt, un tuut net mee eene aan te anere traue. b

 Wën te man pornokrafii kuke tuut, khan sayn fraa tiise xpiirunge hon:

•   Hinerkeenung. Een fraa woo Sara heest, hot kesaat: “Es is wii wën mayn man mich xon fiil mools hiner kang hët.”

•   Sich oone weyert xpiire. Een fraa hot kesaat tas tii sich “eeklich un ferxeemt” kefun hot weeche sayn man sayn kewoonheet fer pornokrafii kuke.”

•   Khee fertraung aan sayn man hon. Een fraa woo Helen heest saat: “Ich tswayfele aan yeete xrit fon mayn man.”

•   Ëngstlichkheet. Een fraa woo Katharine heest hot erkhënt: “Ti soriche, woo ich mich mache weeche mayn man sayn kewoonheet, lost mich aan niks aneres mee tenke.”

  Fer tich noo tenke: Ti Piipel saat tas te man, sayn fraa liipe sol. (Ëfeser 5:25) Wën te man se mit tiise xpiirunge layte macht, meecht tee liip tsu tëne am tsayche sin?

 Es is net laycht noo lose ti kewoonheet fer pornokrafii kuke. Een fraa woo Stacey heest hot kesaat: “Mayn man hot noo kelos alkohool trinke, tsikere un makonya rauche, awer mit pornokrafii hot tee imer noch propleem.”

 Wëns tuu am khëmpfe pist weeche ti kewoonheet fer pornokrafii kuke, tiise aanreete khëne tich helfe, te propleem een mool fer imer phake.

•   Ferxtee warom pornokrafii xlecht is. Ti pornokrafii macht tas ti persoon sayn aychne luste in een ekoiistix aat suucht, tas tuut ti liip, te klaape un ti troyheet, woo neetich sin fer een froo hayrat hon, wech xafe, tas tsaycht aach khee respekt tsu te kriatoer fon ti hayrat, Yeehoowa Kot.

   Piiplix funtament: “Ti hayrat sol in eere kehal wëre.” (Hepreeyer 13:4)

•   Tuu ti responsapiliteet fer tayn aktsyoone aan nëme. Tuu net saan: ”‏Ich praycht khee pornokrafii kuke wën mayn fraa mee liiplich weyer. ” Is unkerecht tayn fraa ti xult kepe, un een ausreet fine fer noch mool pornokrafii kuke, wën se net erfiilt was tuu fon iir waarte tuust.

   Piiplix funtament: “Yeete eene is keproopt wën eyer fon sayn aychne wunx ketsoo un fersuucht is.” (Tyako 1:14)

•   Tuu eerlich mit tayn man orer fraa xpreche. Een man woo Kewin heest hot kesaat: “Ich hon mit mayn fraa ap kexproch fer yeete taach saan wii ich reakiirt hon. Ich xpreche fer mayn fraa eep ich fer yemant mit lust kekukt hon orer mayn aue ap kelenkt hon, soo, siit se tas ich niks fon iir ferxtekele.”

   Piiplix funtament: “Wayl mer uns in ale tinge eerlich aan xtele wole.” (Hepreeyer 13:18)

•   Playp wachsam. Aach wëns tuu tenkst tas tuu tiise kewoonheet fer yoore kelos host, khan meechlich sin tas tuu noch mool wilst kuke. Kewin, woo mer foer heer kexproch hon, saat: ”‏Ich hons kephakt torich tseen yoore kheen pornokrafii kuke, ich waar mich sicher tas ich tii kewoonheet kephakt hat, awer te propleem waar noch in mich een oportuniteet am waarte fer frix aanfange.”

   Piiplix funtament: “Weer tenkt tas eyer uf xteet, mus uf phase fer net fale.” (1 Korinter 10:12)

•   Wëns tuu tich fersuucht xpiirst, hal xtil un tenk. Es khan sin tas tuu een xlechte wunx net um hale khanst, awer tuu khanst raus suuche oops tuu uf kepe tuust orer net. Te wunx tuut rom keen im xtant noch xneler wëns tuu lërnst tayn ketanke tsu anere tinge lenke.

   Piiplix funtament: “Yeete eene fon aych sol wise wii sayn aychne khërper in haylichkheet un eer kontroliire, woo seksuaal luste oone kontrol hon woo nii kenuuch is.” (1 Thesalooniker 4:4, 5)

•   Phas uf mit situatsyoone woo noch mool tich fale khene mache. Tas puuch, Wilkraft is net kenuuch, in ënglix, saat: “Wëns tuu tich in een xwach situatsyoon xtelst, is wii wëns tuu teest een fiks fayer aan xteche, prauchst ploos een pisye kasolin fer tas fayer aan fange.”

   Piiplix funtament: “Niks xlechtes sol mich hërxe.” (Psalm 119:133)

•   Ferliir net ti hofnung. Es khan lang taure, im xtant fiile yoore, fer ti fertraung fon tayn man orer fraa noch mool kriin, awer fiile pheyerche hon tas kemacht kriit.

   Piiplix funtament: “Ti liip is ketultich.” (1 Korinter 13:4)