Ti meyerst tsayt, hon ti layt unerxiitliche kewoonheete, interese un personaliteete, un temit um keen khan xweyer sin fer ti pheyerche. Awer in etliche sache, khan tas noch xweyere sin. Kuk etliche payxpiile:

•   Wii fiil tsayt tuun mer fertraype mit ferwanter?

•   Wii tuun mer mit kelt um keen?

•   Wole mer khiner hon?

 Was mache wën ti tswaay unerxiitliche mënunge hon?

•  Was tuu wise must?

•  Was tuu mache khanst?

 Kuut tsusamer phase petayt net in ti selwich aat tenke. Soo kaar ti pheyerche woo kuut samer phase hon net imer ti selwich mënung in wichtiche sache.

 “Ich sin kroos kewakst in een eenich familye. In ti wochën, waare meyer mit unser wowos, unkele, thantere un primos. Awer mayn man sayn familye hat net tiise kewoonheet. Tes weeche, hon mer net ti selwich mënung iwich wii fiil tsayt fertraype mit ti ferwanter orer wii fiil kontakt hon mit ferwanter woo wayt wech woone.” — Tamara.

 “Mayn fraa un ich sin ketsoo woer mit een unerxiitlich mënung iwich kelt aus kepe. Torich ti eyerste moonate fon unser hayrat, hon mer eftas kextrit weeche tas, un waare neetich fiile kexpreeche fer tas resolwiire.” — Tyler.

 Etliche propleeme khene xweyere sin fer tsu een ëntxlus khome. Tsum payxpiil: Wën eene khiner kriin wil hon, awer te aner wil net? Un wën eene fon ti xwiichereltere krank wërt un mus uf kephast wëre? a

 “Mayn fraa un ich hon ofts kexproch iwich khiner hon. Tii tenkt fiil too triwer, un unser mënunge iwich tas is kans anerste. Ich siin aynfach khee ausweech fer tas resolwiire.” — Alex.

 Unerxiitliche mënunge petayt net tas tayn hayrat mus unkliiklich sin. Etliche spesyaliste saan tas wën tas pheyerche net xtimt in een ërnste sache, sol te man un ti fraa mache was neetich is fer sayn aychne weech noo keen, wën aach ti hayrat tsum ën khomt. Awer, wëns tuu tas soo machst, kepst tuu mee acht tsu tayn xpiirung wii te kompromis woos tuu foer Kot ferxproch host: te kompromis fer tich tsu tayn man orer fraa fest hale ekaal was pasiirt.

 Nëm tayn hayrat ërnst. Tas khan tich helfe ti propleeme resolwiire soo wii wën iir in te selwich tiim xpiile teet, un net keechner weyert.

 Piiplix oryentiirung: “Was Kot unich tas selwiche yoch ketuun hot, sol te mënx net aus naner mache.” — Matheus 19:6.

 Tenk kuut triwer noo aan ales was tepay is. Tsum payxpiil, wën eene fon aych wil khiner hon, awer te anere net, too kepts etliche tinge fer triwer noo tenke:

•   Is tayn hayrat xtark?

   Khiner tsiie khan net laycht sin. Sayt iir foer perayt fer mit tiise situatsyoon um keen?

•   Was sin ti responsapiliteete fer te papa un ti mama?

   Fer khiner kroos tsiie is mee tepay wii ploos esmitel, tsaych orer een haus tëne kepe.

•   Wii is tayn ekonoomix situatsyoon?

   Khomst tuu kuut noo mit tayn aarwayt, familye un ti anere flichte?

 Piiplix oryentiirung: “Weer fon aych, woo een thorm uf paue wil, tuut sich net eyerst hin setse un noo rechne was tas khost, fer se siin op eyer kenuuch hot fer tas fërtich paue?” — Lukas 14:28.

 Tenk iwer ale aspëkte noo. Iir khent es hin kriin etliche sache resolwiire woo iir net mitsamer xtimt. Tsum payxpiil, ep iir khiner wolt hon orer net. Wëns tuu te man orer ti fraa pist woo khee khiner wil hon, froo tich:

•   ‘Wën ich saan tas ich khee khiner wil hon, tuut tas petayte tas ich nii wil hon orer ploos yets net?’

•   ‘Wën ich khee khiner wil hon is es wayl ich tenke tas ich khee kuute papa orer mama wëre?’

•   ‘Meecht ich pang hon tas mayn man orer fraa mich khee acht mee kepe tuut?’

 Un yets, wëns tuu te man orer ti fraa pist woo khiner wil hon, froo tich:

•   ‘Sin meyer foer perayt fer ti responsapiliteete woo een papa orer mama erfiile mus?’

•   ‘Tuut unser ekonoomix situatsyoon uns erlaupe een khint tsiie?’

 Piiplix oryentiirung: “Ti kluucheet fon owe is . . .net xtreng.” — Tyako 3:17.

 Tuu tayn man orer fraa sayn positiiw aue phunkt erkhëne. Tswaay persoone khene fer tas selwiche plats kuke un toch noch unerxiitliche tinge siin. Un soo aach khan een pheyerche eene selwiche sache “siin” un yeete eene hot sayn aychne aue phunkt iwich tas — tsum payxpiil, iwich wii tas kelt aus kepe. Wën iir xprecht iwich kwalkee sache woo iir net ekaal tenkt, fangt aan se xpreche iwich was iir xtime tuut.

•   In tiise spetsiifix sache, in was fer phunkte tuut iir xtime?

•   Was sin ti positiiwe phunkte fon yeete eene sayn mënung?

•   Tas ti hayrat kuut ap laaft, meecht eene orer ti tswaay sayn mënunge sich aan phase khene aan te aner sayn mënung?

 Piiplix oryentiirung: “Yeete eene sol net ploos aan sayn aychne nuts tenke, awer aan te nuts fon te aner.” — 1te Korinter 10:24.