HILEF FER TI FAMILYE | HAYRAT

Wii khene mer mee ketult hon?

“Ti ketult fon te man un fraa wërt yeete taach iim proop kextelt. Wëns tuu letich pist, siit aus tas ti kwaliteet net soo fiil unerxiit macht. Awer, fer een hayrat richtich kepe, ketult hon is iwer wichtich.”—John.

Warom must tuu ketult hon?

Wii khanst tuu mee ketultich sin?

“Is es iwer wichtich ketultich sin”

Warom must tuu ketult hon?

● Ti hayrat macht tas tuu mee acht fer ti feeler fon tayn man orer fraa kepst..

“Am aanfang fon ti hayrat, is ales pluume. Awer mit ti tsayt, is es laychter eene aan te anere sayn feeler sich konsentriire. Wëns tuu wayter aan nekatiiwe atituute tich konsentriirt, ferliirst tuu xnel ti ketult.”—Jessena.

● Khee ketult hon macht tich xpreche oone tenke..

“Ich xpreche klaych was ich tenke — ich xpreche soo kaar was is net thërft. Wën ich mee ketult hët, hët ich khene mee iwer ti sache ketenkt hon un siin tas ich hët prayche kaar niks xpreche .”—Carmen.

Ti Piipel saat: “Ti liip is ketultich un kuut.” (1 Korinter 13:4) Tas petayt tas tswaay persoone woo sich liipe miste ketult tsayche. Awer, is net imer tas woo pasiirt. John, fon aanfang fom artikel, saat: “Wii ale kuute kwaliteet, is laychter weeniche ketult hon wii mee ketult hon. Mer mise uns fiil aanxtrënge fer mee ketult hon.”

Wii khanst tuu mee ketultich sin?

● Wën was pasiirt woos tuu net kewaart host.

Payxpiil: Tayn man orer fraa xprecht etwas woos tuu net kërn host. Tan, kriist tuu te wunx fer etwas tsurik saan woo aach te anere pelayticht.

Piiplix funtament: “Xpiirt tich net xnel pelayticht, wayl sich pelayticht xpiire is een tsaychung fon ti tume.”—Eklesyastes 7:9, noot.

Wii ketult tsayche: Tuu tiif luft tsiie. Eeps tuu etwas saast, fersuucht tenke tas tayn man orer fraa net ferkërn etwas saan wolt fer tich se pelaytiche. Tas puuch “Khëmpfe weeche tayn hayrat”* saat: “Ti reaktsyoon fon ti meyerste layt hat se tuun aan ti tinge woo se tenke tas te man orer fraa saan wolt, xtats aan was se wërklich kesaat hon.”.

* Orixinaale Thitel: Fighting for Your Marriage.

Wën ti anere persoon wërklich tich prowoke wolt, say ketultich un xtrengt tich aan fer net in te selwich aat tsurik petsaale. Tas heleft ti situatsyoon peruyche xtats ti tinge noch xlechte lose. Ti Piipel saat: “Tas fayer keet aus wën es khee hols kept.” — Xpriiche 26:20.

“Wëns tuu fangst aan tayn fraa wii een faynt siin, hal xtil un tenkt warom tuust tuu se liipe un macht klaych etwas xeenes fer tii.”—Ethan.

Fer tich se tenke:

Wii tuust tuu reakiire wën tayn man orer fraa etwas saat woos tuu net kërn host?

Wii khans tuu mee ketult tsayche tas neekste mool woo soo was pasiirt?

● Wën yeetes mool tas selwiche pasiirt woo tayn ketult im proop xtelt.

Payxpiil: Tayn man orer fraa tuut sich imer ferxpeete — un tas lost tich nerwees..

Piiplix funtament: “Tuut aych wayter naner aus hale un krooshërtslich fertsaye.”—Koloser 3:13.

Wii ketult tsayche: Fersuucht tich mee ketanke mache mit tayn hayrat wii mit tayn aychne neetichkheete. Froo tich selepst: ‘Een propleem too triwer mache, heleft unser hayrat orer macht xaate?’ Awer, is noch wichtich uns erinere tas “meyer al tuun fiil mools xtolpere”, orer es wil saan, feeler mache (Tyako 3:2) Tas tsaycht tas tuu must aach tich in etliche tinge ferpesere.

“Als mool hon ich mee ketult mit een fraayntin wii mit mayn man. Ich tenke tas es soo is wayl ich mee tsayt mit tëm plaype un tuun tan tëm sayn feeler siin. Awer ti ketult hot se tuun mit liip un respekt. Tan, ich mus ketultich sin fer se tsayche tas ich mayn man liipe un respektiire. Ti ketult is iwer wichtich in mayn hayrat.”—Nia.

Fer tich triwer noo tenke:

Host tuu ketult fer mit ti feeler fon tayn man orer fraa um keen?

Wii khanst tuu ketult tsayche wën etwas tich nerwees lost?

“Es is iwer wichtich ketult hon”

“Tas een hayrat richtich kept, is iwer wichtich ketult hon. Wëns tuu tswaay imperfekte persoone paysamer tuust, is es normaal propleeme foer khome. Soo kaar etliche kewoonheete khene tich nerwees lose. Wën meyer khee ketult hon, ti propleeme kepe wii een eyertlays un tuun ti struktuer fon ti hayrat fersaue.”—Jessena un sayn man, Hayden.

In khortse wërte: Wii khene mer mee ketult in ti hayrat hon?

Wën etwas pasiirt woos tuu net kewaart host

Tuu net tenke tas tayn man orer fraa etwas ferkërn saan wolt fer tich se pelaytiche. Een positiiw atituut khan tich helfe ketult hon wëns tuu mit ti tinge umkeest.

Wën yeetes mool tas selwiche pasiirt woo tayn ketult im proop xtelt

Xtelt ti neetichkheete fon ti hayrat iwer tayn aychne neetichkheete. Es is wichtich tich erinere tas tuu tich aach in etliche tinge ferpesere must.