HILEF FER TI FAMILYE | HAYRAT

Wii sich wech hale fon te ayfersuucht in ti hayrat

FOERXPIILE

Wën te man un ti fraa net eene aan te anere traut, tuut ti hayrat net kuut pariire. Was khene mer mache wën iwermeesich ayfersuucht een propleem is?

In tiise artikel

Was is ayfersuucht?

Tas wort “ayfersuucht” khan fiile tinge petayte. In tiise artikel, hot tas wort se tuun mit te xpiirung woo meyer in tswaay situatsyoone hon khene: (1) wën mer tenke tas unser man orer fraa romantix interes aan een aner persoon hot orer (2) wën mer tenke tas een aner persoon interes aan unser man orer fraa hot. Fiilaycht tenke mer tas unser hayrat ins kefoer is. Wën tas wërklich woer is, is te ayfersuucht normaal un kuut, wayl ti hayrat is ti tichst ferheltnis woo tswaay persoone khene hon, un tas pheyerche mus ales mache fer ti hayrat xitse.

Piiplix oryentiirung: “Soo sin [se] net mee tswaay, awer ploos een flayx. . . . Was Kot unich tas selwiche yoch ketuun hot, sol te mënx net aus naner mache.” — Matheus 19:6.

“Wën tayn hayrat ins kefoer is, khan te ayfersuucht wii een fayer alaarm sin woo tich een sinaal kept fer etwas mache.” — Benjamin.

Te iwermeesich ayfersuucht khan khome weeche tswayfele un pang oone funtament. Ti woere liip xitst uns keeche tiise ayfersuucht woo xaate macht. (1 Korinter 13:4, 7) Te tokter Robert L. Leahy hot kexrip: “Ti resultaate [fon te iwermeesich ayfersuucht] khene ins kefoer xtele ti ferheltnis woos tuu xitse wilst.” a

Was is ti uersach fer iwermeesich ayfersuucht?

Fiilaycht host tuu een tentëns fer tiise sort ayfersuucht xpiire wëns tuu xon ferhayrat waarst mit yemant woo tich hiner kang hot. Orer fiilaycht is ti hayrat fon tayn eltere aach tsum xlus khom weeche tiise uersach, un tuu host pang tas tas selwiche khan mit tich pasiire.

“Mayn papa hot mayn mama hiner kang wii ich kleen waar. Tes weeche waars imer xweyer fer mich aan ti layt traue. Tas waar fer mich een trauma, un manich mool tuut tas mayn hayrat xteere.” — Melissa.

Een aner uersach fer ti iwermeesich ayfersuucht is wën ti persoon aarich unsicher is. Wëns tuu soo pist, khanst tuu ti tentëns hon fer ti anere wii een kefoer fer tayn hayrat siin. Tas khan soo wayt khome tas tuu tenkst tas wën een keleechenheet is, teet tayn man orer fraa tich um truke fer een aner persoon.

Es is ekaal ti uersaach, wën ti ayfersuucht tsu fiil is tas khan mache tas tuu tayn man orer fraa in een ferkheert aat richte tuust wii een untroye persoon. Tas khan tsum strës nëme woo xaate macht fer tayn hayrat un soo kaar fer tayn kesuntheet.

Piiplix oryentiirung: “Ti ayfersuucht is wii een kreeps.” — Xpriiche 14:30, Easy-to-Read Version.

Wii khanst tuu tayn ayfersuucht kontroliire?

Ferkrees ti fertraung in tayn hayrat. Tenk aan ti uersache woos tuu host fer aan tayn man orer fraa traue, xtats tenke tas eyer orer tii untroy is.

“Ich tenke aan ti kuute kwaliteete fon mayn man. Wën eyer acht fer yemant kept, is wayl eyer sich wërklich mit te layt khimert, un net wayl eyer ferkheerte ketanke hot. Ich mus mich imer erinere tas mayn hayrat is net soo wii ti hayrat fon mayn eltere.” — Melissa.

Piiplix oryentiirung: “Ti liip . . . klaapt aan ales.” — 1 Korinter 13:4, 7.

Phas uf weeche tayn tswayfele. Manich mool, tuun mer aan etwas klaape, awer ti eensich pewaysung woo meyer hon sin unser xpiirunge. Te tokter Leahy, fon weem meyer foer traan kexproch hon, saat: “Oft mools tuun mer tenke tas unser ketanke weyere wii fakte . . . Awer, net al ti ketanke sin woer, un tuu kriist tas net tsum wise eeps tuu ti fakte unersuuchst.” b

“Wëns tuu tswayfelst fon ales was pasiirt, khanst tuu een propleem fer tich suuche woo in woerheet net eksistiirt.”— Nadine.

Piiplix oryentiirung: “Al ti mënxe sole tsum wise kriin tas teyer net xtreng sayt.” — Filiper 4:5.

Xprech iwich was tich ketanke macht. Ekaal warom tuu ayfersuucht xpiirst, xprech too triwer mit tayn man orer fraa. Soo, khent iir ëntxlise, in een ferninftich aat, wii sich pehantele tas ti tswaay sich kuut un sicher in te hayrat xpiire.

“Wën iir soo kexpreeche hot, sayt wilich fer horiche was te anere wil saan. Tenk tas eyer orer tii wil tich net traurich lose un wil aach te propleem resolwiire. Fiilaycht pist tuu tsu infintlich orer waarts tsu fiil fon te anere. Khan sin tas tayn pheyerche net mërke tuut tas tuu must acht hon.” — Ciara.