Yaa. Ti Piipel hot xon foer raus kesaat tas ti meyerste layt imer xlechter in unser tsayt wëre teete un, weeche tas, teete se imer weenicher moraal hon un ti kuute aanxtelunge fer in harmonii leepe uf sayt lose. a (2 Timoteus 3:1-5) Awer ti Piipel hot aach kesaat tas net ale mënxe soo wëre teete. Mit Kot sayn hilef, teete etliche layt sich aan xtrenge fer tiise xlecht influens iwerkhome un teete se lërne soo tenke un hantele in te aat wiis Kot kefalt. (Isayas 2:2, 3)

In tiise artikel:

•  Tëm noo ti Piipel, wii teete ti layt in unsere taache tenke un sich aan xtele?

•  Wii tuut een ekoiistix aanxtelung ti anere petrefe?

•  Warom teete ti meyerste layt xlechter kepe?

•  Wii sole mer mit te xlecht ënerung fon te layt um keen?

•  Teet ti kans welt imer xlechter kepe?

•  Meechte ti mënxe soo xlecht kepe tas se khee hofnung mee hon?

 Ti Piipel hot kesaat tas weeche te ekoiismus teete ti meyerste layt xlechte aanxtelunge hon. Ti layt teete “khee selepst kontrol hon”, “ploos sich selepst liipe” un “ti luste liipe xtats Kot”. (2 Timoteus 3:2-4)

 Un tas is woer. Hayt se taach, siits aus tas ti layt ploos aan sich selepst tenke, aan sayn luste, aan sayn frooheet un soo wayter. Tiise aanxtelunge sin soo keweent tas etliche krupe sin kenënt wii “Xeneratsyoon Ich”. Weeche tiise aanxtelunge, sin fiile layt “oone liip fer tas kuutes”; tas petayt tas ti khene net liipe was richtich is. Un wayl se “unpetanklich” sin, tenke se tas es net neetich weyer petanklichkheet tsayche weeche was se hon orer weeche was ti anere fer tii mache. (2 Timoteus 3:2, 3)

 Weeche te ekoiismus, teete noch anere aanxtelunge tsum foer xayn khome woo hayt se taach keweent sin:

•   Kiirichkheet. Hayt, tuun fiile layt “tas kelt liipe”. Tii klaape tas tëne sayn kelt orer materyaalixe tinge tsayche wii fiil tii sich kuut kep hon. (2 Timoteus 3:2)

•   Hoochmuut. Fiile layt sin “hoochnaasich, inkepilt” un “hoochmuutich”. (2 Timoteus 3:2, 4) Tii tuun sich kërn proose un tii tuun iwertraype wën se xpreche iwer sayn apiliteete, kwaliteete un wii fiil kelt se hon.

•   Xlime liie. Iweraal kepts layt woo “tuun Kot un ti mënxe ferfluuche” un woo “tuun ti anere ferxtumpiire”. (2 Timoteus 3:2, 3) Tiise wërter khene petayte tas yemant Kot orer anere layt pelayticht orer liie iwer tëne fertseelt.

•   Tikhopichkheet. Fiile layt sin “untroy”, “hinerlistich”, “tik khopich” un “wëre net wilich sin fer mit te anere xtime”. (2 Timoteus 3:2-4) Tii tsayche tiise aanxtelunge wën se net wilich sin uf kepe, wën se net wole eenich kepe orer wën se net sayn ferxpreche erfiile wole.

•   Wyolënts. Hayt sin fiile “krop” un tuun klaych wuutich kepe. Weeche tas wëre se ofts xlecht un wyolënt. (2 Timoteus 3:3)

•   Oone respekt fer tas kesets. Yeesus hot kesaat tas in unser tsayt teets een “ferkreesung fon te unkerechtichkheet” kepe. (Matheus 24:12) Eyer hot aach foer raus kesaat tas es fiil “unruu”, orer unortnung, kepe teet. (Lukas 21:9, noote)

•   Khee liip in te familye. Fiile “tuun net ti eltere aan heere” un “tii tuun khee liip fer ti familye hon”. Weeche tas, mee wii nii, tuun mer hayt in fiile familye siin mitkliiter woo uf sayt kelos wëre, woo seksuaal iwerfal wëre un woo wyolënts tehëm mit mache. (2 Timoteus 3:2, 3)

•   Relichyees falxheet. Imer mee layt tuun ploos “een sort fon aanpeetung tsu Kot xayne”. (2 Timoteus 3:5) Tii tuun kërn relichyeese fiirer noo keen woo saan was tii heere wole, xtats mache was Kot wil hon. (2 Timoteus 4:3, 4)

 Wayl te ekoiismus in te welt iwerhant nëmt, tuun noch mee layt in mentaal un emotsyonaal aat layte. (Eklesyastes 7:7) Kuk etliche payxpiile: Tii woo tas kelt liipe, tuun ti anere aus nutse fer noch mee kelt kriin. Wayls khee liip in te familye kept, tuun fiile in sayn aychne haus seksuaal iwerfal wëre un tuun kropheet mit mache. Weeche tas, khene se tiifsinich wëre un tenke soo kaar aan sich um pringe. Un noch, weer hinerlistich un net leaal is, tuut emotsyonaal xaate mache fer tii woo se hinerkang hon.

 Ti Piipel leet aus ti woere uersache woo hinich ti ënerunge fon te layt sin:

•   Ti liip tsu Kot un tsum neekste tuut xwach kepe. (Matheus 24:12) Tes weeche, tuut te ekoiismus sich ferkreesere.

•   Satanaas te Taywel is fom himel tsu ti eyert keworef kep. (Apokalipsis 12:9, 12) Fon tat aan, tuut eyer ti mënxe influentsiire tas tii imer ekoiistixer wëre. (1 Yoohan 5:19)

 Kot sayn Wort saat: “Playp wech fon tëne layt.” (2 Timoteus 3:5, Naye Testamënt in Hunsrik) Wil tas saan tas mer sole uns wayt wech fon te anere layt hale? Nee. Tas wil saan tas mer sole net een ticht fraayntxaft mit layt hon woo ekoiistix sin un woo Kot net respektiire. (Tyako 4:4)

 Nee. Ti Piipel hot foer raus kesaat tas etliche teete “tiif luft in tsiie un krekse weeche ti kanse xrekliche tinge” woo ti layt mache teete. (Esekyël 9:4) Tii teete sich aan xtrenge fer Kot aan heere un net ekoiistix sin. Es teet fer ti kanse layt um tii rom taytlich sin, wayl tii teete anerste wii ti meyerste layt sin in sayn aat se xpreche un hantele. (Malakias 3:16, 18) Tsum payxpiil, tii teete fersuuche friit mit ale layt hale un teete sich net in kriiche rin mexe orer in kwalkee aner sort wyolënts. (Mikeyas 4:3)

 Nee. Ti mënxheet tuut net soo xlecht kepe tas es ploos wyolënts un torich naner kepe tuut. In khorts tsayt, tuut Kot wech xafe ti xlechte layt woo wole net tëm sayn kepoote aan heere. (Psalm 37:38) Eyer tuut een “nay eyert” mache, orer in anere wërter, lost eyer tas ploos tsaame layt uf te Eyert woone, woo fer imer in friit leepe tuun. (2 Pheeter 3:13; Psalm 37:11, 29) Tiise hofnung is khee fantasii. Yets, tuut ti Piipel xon ti mënxe helfe ënerunge mache un tëm noo Kot sayn kepoote leepe. (Ëfeser 4:23, 24)