Ti Piipel hot foer raus kesaat tas, in te letste taache, teets pheste kepe, es wil saan, krankheete woo aus preche teete un pantemiie. (Lukas 21:11) Awer pantemiie sin net een xtroof fon Kot. In woerheet, torich sayn Raych, tuut Kot palt ti kanse krankheete un pantemiie aans ën pringe.

•  Meecht ti Piipel pantemiie foer raus kesaat hon?

•  Meecht Kot ti layt mit krankheete xtroofe?

•  Meechte ti pantemiie fon hayt een xtroof fon Kot sin?

•  Meechte ti pantemiie een ën kriin?

•  Tekste fon te Piipel woo iwer krankheete xpreche

 Ti Piipel hot net spetsiifixe pantemiie orer krankheete foer raus kesaat. Tsum payxpiil, tii xprecht net iwer Covid-19, aids orer ti xpaanix krip. Awer tii xprecht iwer “krankheete” un “phest woo tsum toot nëmt”. (Lukas 21:11; Apokalipsis 6:8) Ti Piipel hot foer raus kesaat tas tiise tinge in te “letste taache” pasiire teete, woo sin aach wii “ën fon tiise sisteem” kenënt. (2 Timoteus 3:1; Matheus 24:3)

 Ti Piipel xprecht als mool tas Kot krankheete penutst hot fer ti layt xtroofe. Tsum payxpiil, hot eyer kemacht tas etliche layt lëpra kriin teete. (Nuumere 12:1-16; 2 Kheeniche 5:20-27; 2 Kroonike 26:16-21) Awer tas waare spetsiifixe situatsyoone un tiise krankheete hon net anere layt aan kextoch. In woerheet, tiise krankheete waare spetsiifixe xtroofe fer layt woo sich keeche Kot repeliirt hon.

 Nee. Etliche layt saan tas Kot tuut ti pantemiie un anere krankheete penutse fer ti layt xtroofe. Awer tas is net was ti Piipel in lërnt. Warom net?

 Een uersach is tas, etliche troye tiiner fon Kot, fon te friirixe tsayte un fon hayt se taach, hon weeche krankheete kelit. Eene fon tiise persoone waar Timoteus. Tee hat een kesuntheet propleem. (1 Timoteus 5:23) Awer ti Piipel tuut net saan tas tiise krankheet een xtroof fon Kot waar. Hayt se taach, tuun aach etliche troye tiiner fon Kot sich aan xteche un krank kepe. Awer, in te meyerst tsayt, tas tuut pasiire wayl tiise layt uf tas ferkheert plats in te ferkheert uertsayt waare. (Eklesyastes 9:11)

 Een aner uersach is tas ti Piipel uns in lërnt tas ti tsayt fer Kot ti xlechte layt xtroofe, is noch net khom. In woerheet, mer leepe yets “in te retung taach”, orer in anere wërter, in te tsayt woo Kot fer ale layt noch ti keleechenheet kept fer tëm khëne lërne un keret wëre. (2 Korinter 6:2) Eyer macht tas torich een weltwayt preetich kampanya woo iwer een positiiw pexeet xprecht: ti “kuute notisye fom Raych”. (Matheus 24:14)

 Yaa. Ti Piipel saat tas, im futuer, tuun ti krankheete net mee eksistiire. In khorts tsayt, tuut Kot sayn Raych ale sort krankheete heele. (Isayas 33:24; 35:5, 6) Kot tuut tas eelent, ti phayn un te toot wech xafe. (Apokalipsis 21:4) Un eyer tuut ti layt woo xon kextorep sin wiiter tsum leepe pringe. Tiise layt tuun tan een perfekt kesuntheet hon un tuun in een Paratiis too hiir uf ti Eyert leepe. (Psalm 37:29; Aphostele sayn Kexicht 24:15)

 Apokalipsis 6:8: ‘Ich hon eene kaul oone farp kesiin. Tee woo uf tëm kehokt hot, is Toot kenënt kep, un tas Kraap is tëm ticht noo kang. Tii hon autoriteet kriit fer mim phest woo tsum toot nëmt, um pringe.’

 Was wil tas saan? Tiise profetsii fon te fier rayter fom Apokalipsis tsaycht tas pantemiie in unsere taache pasiire teete.