Weer khomt im himel?
Was saat ti Piipel?
Kot tuut een spetsiifix numer troye kriste raus suuche, woo noo sayn toot, wëre uf keruuft fer im himel se leepe. (1te Pheeter 1:3, 4) Fer tiise peloonung kriin, mise se wayter Kot aan heere un sayn klaape xtark hale. (Ëfeser 5:5; Filiper 3:12-14)
Was tuun tiise raus kesuuchtner im himel mache?
Tii tuun mit Yeesus wii priister un kheeniche torich 1.000 yoore tiine. (Apokalipsis 5:9, 10; 20:6) Tii tuun teel mache fon tëm “naye himel”, een himlix rechiirung woo iwer ti “nay eyert” rechiire tuut, es wil saan, ti layt woo too uf te eyert woone tuun. Tii woo im himel rechiire, tuun ti mënxe helfe tas sort leepe hon woo Kot fom aanfang aan kepleent hat. (Isaiias 65:17; 2te Pheeter 3:13)
Wii fiil layt wëre uf keruuft fer im himel se leepe?
Ti Piipel tsaycht tas 144.000 layt wëre uf keruuft fer im himel se leepe. (Apokalipsis 7:4) In te wisyoon woo in Apokalipsis 14:1-3 xteet, hot te aphostel Yoohan kesiin “tas Lam uf tëm përich Syoon xteen, un mit tëm waare 144.000” layt kewees. In tiise wisyoon, “tas Lam” petayt Yeesus, noo tas eyer fom toot uf keruuft kep is. (Yoohan 1:29; 1te Pheeter 1:19) Te “përich Syoon” petayt ti wichtich xtel fon Yeesus un ti 144.000 woo mit tëm im himel rechiire tuun. (Psalm 2:6; Hepreeyer 12:22)
Tii “woo keruuft un raus kesuucht kep sin” fer mit Yeesus im Raych rechiire, sin kenënt wii tas “kleene trop”. (Apokalipsis 17:14; Lukas 12:32) Tas tsaycht tas, wën se ferklaycht sin mit te kanse numer fon Yeesus sayn xeef, sin se weenicher. (Yoohan 10:16)
Ferkheerte itee iwer tii woo tsum himel keen
Ferkheert itee: Al ti kuute mënxe keen tsum himel.
Woerheet: Kot hot ferxproch tas ti meyerste kuute layt teete fer imer too uf te eyert woone. (Psalm 37:11, 29, 34)
Yeesus hot kesaat: “Khee aner mënx is tsum himel kang.” (Yoohan 3:13) Mit too ti wërter, hot Yeesus ketsaycht tas ti kuute mënxe woo foer tëm xon kextorep sin — wii Apraham, Mooses, Yoop un Tawi — net tsum himel kang sin. (Aphostele sayn Kexicht 2:29, 34) Xtats tas, hate se ti hofnung fer uf keruuft wëre fer uf te eyert leepe. (Yoop 14:13-15)
Tas ufxtaye fer im himel se leepe is kenënt wii tas “eyerste ufxtaye”. (Apokalipsis 20:6) Tas tsaycht tas es een aner ufxtaye kept, woo uf te eyert pasiire tuut.
Ti Piipel lërnt in tas wën Kot sayn Raych rechiirt, “es kept kheen toot mee”. (Apokalipsis 21:3, 4) Te toot hot nii im himel eksistiirt; tes weeche, tuut tiise ferxpreche sich too uf te eyert erfiile.
Ferkheert itee: Meyer khene raus suuche op mer tuun im himel orer uf te eyert leepe.
Woerheet: Kot suucht raus weer ti peloonung “fon te himlix ruufung” kriit, es wil saan, ti hofnung fer im himel se leepe. (Filiper 3:14) Meyer khene net ëntxlise ep mer tuun Kot tiine im himel orer too uf te eyert. (Matheus 20:20-23)
Ferkheert itee: Ti hofnung fer too uf te eyert leepe is net soo kuut. Plaype uf te eyert ploos tii woo net fertiine im himel se leepe.
Woerheet: Kot ruuft tii woo eewiche leepe uf te eyert kriin wii “mayn folek”, “mayn raus kesuuchtner”, un tii “woo fon Yeehoowa keseechent sin”. (Isaiias 65:21-23) Tii tuun fer imer leepe un kriin aach ti frooheet fer fon te eyert een paratiis mache. Tas is was Kot fer ti mënxe wolt hon. (Xeenesis 1:28; Psalm 115:16; Isaiias 45:18)
Ferkheert itee: Ti numer 144.000 woo in Apokalipsis xteet is simpoolix, net een echte numer.
Woerheet: Es is woer tas Apokalipsis hot phaar simpoolixe numere; awer Apokalipsis penutst aach echte numere. Tsum payxpiil, Apokalipsis xprecht iwer “ti naame fon te 12 aphostele fom Lam”. (Apokalipsis 21:14) Wii wise mer tas 144.000 een echte numer is?
Apokalipsis 7:4 xprecht iwer 144.000 layt woo raus kesuucht kep sin fer im himel se leepe. Klaych tëm noo, tuut ti Piipel xpreche iwer ‘een kroos folek woo khee man tseele khont’. Tii woo teel fon tëm “kroos folek” sin, wëre aach keret. (Apokalipsis 7:9, 10) Wën 144.000 een simpoolix numer is, woo petayt al ti layt woo keret wëre, teet es net xtime tas ferklayche mit een aner krup — een kroos folek woo nimant tseele khont. a
Apokalipsis saat aach tas ti 144.000 “sin tswixich ti mënxe wii eyerste friichte” kekhaaft kep. (Apokalipsis 14:4) Ti wërter “eyerste friichte” sin penutst fer se pexraype een kleen teel fon een kreeser krup. Tii pexraype kans kenau tii woo mit Yeesus im himel rechiire tuun. Wën es ferklaycht is mit te kroos numer layt woo uf te eyert leepe tuut, is tas een kleen numer. (Apokalipsis 5:10)
a Te leerer Robert L. Thomas hot was kesaat woo too temit xtimt. Tee hot kexrip iwer ti numer 144.000 woo in Apokalipsis 7:4 xteet: “Tas is een spetsiifix numer, anerste wii ti numer woo mer net tseele khene in Apokalipsis 7:9. Wën tiise numer simpoolix weyer, tan weyere al ti anere numere in Apokalipsis aach simpoolix.” (Revelation 1-7: An Exegetical Commentary, sayt 474)
Fiilaycht tuust tuu aach kërn hon
WICHTICHE PIIPLIXE INLËRNUNGE
Was is Kot sayn Raych?
Kot sayn Raych waar tas haupste theema fon Yeesus sayn preetich aarwayt too uf te eyert. Fon tat aan, tuun al woo Yeesus noo keen, peete tas tas Raych khome sol.
PIIPLIXE INLËRNUNGE
Tuu unser khurs fon ti Piipel khëne
Mach een khurs fon te Piipel woo niks khost mit een persoonlich leerer.