Ti kriste klaape tas Yeesus kextorep is, fer te mënxheet sayn sinte petsaale. (1 Pheter 3:18) Awer fer keret se wëre, mise mer mee mache wii ploos klaape tas Yeesus unser reter is. Ti temoone wise aach tas Yeesus ”‏Kot sayn soon”‏ is, awer tii wëre net keret, tii wëre fernicht.(Lukas 4:41; Yuutas 6)

•  Was mus ich mache fer keret se wëre?

•  Wëre ich keret wën ich tas ”‏sinter kepeet”‏ mache?

•  Wii is tas ”‏sinter kepeet”‏ tsum foer xayn khom?

•   Tuu must klaape tas Yeesus fer unser sinte se fertsaye kextorep is. (Aphostele sayn Kexicht 16:30, 31; 1 Yoohan 2:2) Too is tepay klaape tas Yeesus een reaal persoon is, un ales was ti Piipel iwer tee saat, woer is.

•   Lërne was ti Piipel wërklich in lërnt. (2 Timoteus 3:15) Ti Piipel saat was te aphostel Phaul un Silas fer een katee wachter saate:”‏Tuu aan te hër Yeesus klaape un tuu wërst keret.”‏ Noochte, hon se aan kefang “Yeehoowa sayn Wort” a fer te katee wachter in se lërne. (Aphostele sayn Kexicht 16:31, 32) Tas tsaycht tas te katee wachter Yeesus un sayn inlërnunge net aan nëme khont eep eyer een khëntnis fon Kot sayn wort hat. Un tiise khëntnis mist taytlich un kenau sin.(1 Timoteus 2:3, 4)

•   Sich peroye. (Aphostele sayn Kexicht 3:19) Tuu must tich aach peroye un tich pelaytiche iwer tas ferkheerte tings woos tuu friier kemacht host. Een persoon tsaycht tas se sich wërklich peroyt hot wën se noo lost tas ferkheerte tings se mache woo Kot net erlaupt un fangt aan “aarwayte mache woo eenlich sin fer sich peroye”. (Aphostele sayn Kexicht 26:20)

•   Ketaaft wëre. (Matheus 28:19) Yeesus saat tas tii woo sayn tisipele wolte wëre, miste sich taafe lose. Payxpiil: Te katee wachter hot sich ketaaft. (Aphostele sayn Kexicht 16:33) In te selwich aat, noochte wii te aphostel Pheeter fiil layt iwer Yeesus in kelërnt hot un ”‏tii woo sayn wërter mit frooheet aan kenom hon, sin ketaaft kep.”(Aphostele sayn Kexicht 2:40, 41)

•   Yeesus sayn wërter foliche. (Hepreeyer 5:9) Tii woo Yeesus sayn inlërnunge in ales foliche, tsayche in wii se sayn leepe nëme, tas se Yeesus sayn nookeener sin. (Matheus 28:20) Tan wëre se ”‏tas Wort aan wëne, net ploos horiche.”(Tyako 1:22)

•   Aus hale pis aans ën. (Markus 13:13) Yeesus sayn tisipele ”‏mise aus hale”‏ fer keret se wëre. (Hepreeyer 10:36) Een payxpiil, te aphostel Phaul hot Yeesus sayn inlërnunge aan keheert un is wayter leaal fer Kot keplip tsayt te taach woo eyer krist kep is, pis te taach woo eyer kextorep is.(1 Korinter 9:27)

 In etliche relichyoone sin tii layt keweent tas “sinter kepeet” un tas “reter kepeet mache.” In tiise kepeete tuun se erkhëne tas se sinter sin un aan nëme tas Yeesus weeche iire sinte kextorep is. Tii tuun aach ferlange tas Yeesus in iire hërts un in iire leepe rin khomt. Awer ti Piipel saat niks iwer tas “sinter kepeet”, un tuut aach net aanreete, kepeete mache woo noo un noo ti selwiche wërter saan.

 Etliche tenke tas noo tas “sinter kepeet” mache, wërt ti retung xon sicher. Awer khee een kepeet khan soo was fer yemant mache. Wayl mer imperfekt sin, tuun meyer wayter feeler mache. (1 Yoohan 1:8) Es is tes weeche woo Yeesus fer sayn tisipele in kelërnt hot aanheelich peete un fertsayung fer sayn sinte ferlange. (Lukas 11:2, 4) Un noch etliche kriste woo tii hofnung hate fer keret se wëre, hon am ën tiise keleechenheet ferloer, wayl se noo kelos hon Kot se tiine.(Hepreeyer 6:4-6; 2 Pheeter 2:20, 21)

 Ti kexichts mëner hon unerxiitliche mënunge iwer wii tas “sinter kepeet” tsum foer xayn khom is. Etliche klaape tas tiise kewoonheet in te protestantix reformatsyoon in 1517 aan kefang hot. Anere tenke tas ti layt aan kefang hon tas “sinter kepeet” im yoerkang 18 un 19 mache, wii naye relichyoone krupe tsum foer xayn khom sin. Soo wii soo, ti Piipel xtitst net tiise kepeete penutse, in woerheet ti kewoonheet fer noo un noo fërtiche kepeete mache, keet keeche iwer was tas ti Piipel in lërnt.