Nee, ti relichyoone sin net al ekaal. In te Piipel kepts fiil payxpiile fon relichyoone woo Kot net kefale. Tii khene keteelt wëre in tswaay sorte:

Sort 1: Relichyoone woo falxe kote aan peete

 Ti Piipel saat tas falxe kote aan peete hot “khee weyert” un “khee nuts”. (Yeeremias 10:3-5; 16:19, 20, Pastoral) Yeehoowa a Kot hot ti friirix natsyoon fon Israël aan kesaat: “Tuu solst khee anere kote aan peete, ploos mich.” (Eeksutos 20:3, 23; 23:24, Nova Tradução na Linguagem de Hoje) Wën ti israeliiter anere kote aan kepeet hon, ‘is Yeehoowa wuutich kep mit Israël.’ — Nuumere 25:3; Lewiitikus 20:2; Richter 2:13, 14.

 Kot tenkt imer noch tas selwiche iwich tiise “kote” aan peete. (1 Korinter 8:5, 6; Kalater 4:8) Tee xikt tas ale tii woo wole iim aan peete sole wech plaype fon falxe relichyoone: “Tës weeche, keet aus te mite fon tëne raus un halt aych fon tat wech.” (2 Korinter 6:14-17) Wën ale relichyoone ekaal weere un teete tsu Kot nëme, warom hët tee tan kexikt tas mache?

Sort 2: Relichyoone woo te woere Kot aan peete awer net in een aat woo tee aan nëmt

 Als mool, hon ti israeliiter Kot aan kepeet in een aat woo sich ferklaycht hot mit ti aanpeetung fon ti falxe kote. Awer Yeehoowa hot net aan kenom fermixe ti woere aanpeetung mit ti falx. (Eksutos 32:8; Teuteronoomyun 12:2-4) Yeesus hot ti relichyeese xëfe fon sayn taache konteniirt weeche ti aat wii se Kot aan kepeet hon. Tii wolte haylich aus siin, awer tii hon sich ferxtelt un ‘hon neewe kelos ti wichtiche tinge fom kesets, ti kerechtichkheet, parmhërtslichkheet un ti eerlichkheet.’ — Matheus 23:23.

 Soo is tas hayt aach, nuer ti relichyoon woo ti woerheet in lërnt khan ti mënxe tsu Kot fiire. Tiise woerheet xteet in te Piipel. (Yoohan 4:24; 17:17; 2 Timoteus 3:16, 17) Ti relichyoone woo inlërnunge hon woo net xtime mit was ti Piipel saat, tuun ti mënxe ap lënke fon Kot. Fiil fon tiise inlërnunge woo ti layt tenke woo in ti Piipel xteen teete — soo wii ti Triniteet, een unxtërplich seel un ti fayer hël — khome fon falxe relichyoone. Tiise sort aanpeetung hot “khee nuts”, orer khee weyert, wayl tii keen relichyeese tratitsyoone noo xtats Kot sayn kepoote. — Markus 7:7, 8

 Kot hast ti falxheet fon ti relichyoone. (Tito 1:16) Fer ti mënxe helfe tsu Kot khome, mus ti relichyoon in tëne sayn leepe wërke un net ploos sich hale aan rituaale un formaliteete. Tsum payxpiil, ti Piipel saat: “Wën yemant mënt tas er Kot aan peete tuut, awer tuut sayn tsung net kontroliire, tan, tuut tee sayn aychne hërts hinerkeen, un sayn aanpeetung hot khee weyert. Ti aat fon aanpeetung woo phuer un oone flek is, soo wii unser Kot un Fater iwer tas tenkt, is tas: tii woo khee eltere hon un ti witfraae in iire xwiirichkheete xitse, un sich oone flek fon te welt hale.” (Tyako 1:26, 27, noote) Tes weeche penuts ti Piipel ti wërter ‘phuer aanpeetung’, wayl tiise sort aanpeetung hot khee falxheet.