Is woer tas ti Piipel tas wort “aptraypung” net penutst wën een unkepoer khint wech kemacht wërt ferkërn. Awer fiil piiplixe tekste helfe uns ferxteen was Kot iwich tas mënxe leepe tenkt, soo kaar iwich een khint woo noch im muterlayp is.

 Tas leepe is een kexenk fon Kot. (Xeenesis 9:6; Psalm 36:9) Ale mënxlich leepe is wichtich fer iim, soo kaar tas leepe fon een khint woo noch im muterlayp is. Tes weeche, een khint sayn leepe woo noch net kepoer is wech nëme is kraat soo wii yemant um pringe.

 Tas Kesets woo Kot tsu ti israeliiter kep hot saat: “Wën mëner xtrayte tuun un een xwanger fraa ferletse, un sayn khint foer ti tsayt uf ti welt khomt, awer khee tootlich unfal pasiirt, mus tee woo te xaate kemacht hot, petsaale was ti fraa sayn man fon tëm ferlangt. Tee mus tas torich te richter petsaale. Awer, wën een tootlich unfal pasiirt, tan must tuu leepe fer leepe kepe.” (Eeksotus 21:22, 23) a

•  Wën fangt tas mënxlich leepe aan?

•  Meecht Kot fertsaye yemant woo xon een aptraypung kemacht hot?

•  Un wën ti muter orer sayn khint sayn leepe in kefoer is?

 Fer Kot, tas mënxliche leepe fangt aan wën ti fraa xwange wërt. Fiil tekste in te Piipel tsayche tas fer Kot een unkepoer khint is xon een leepe un een nay persoon. Wole mer etliche piiplixe payxpiile uner suuche woo kenau tsayche tas es fer Kot tas leepe fon een khint woo noch in muterlayp is, kraat soo fiil weyert hot wii tas leepe fon een khint woo xon kepoer is.

•   Kot hot Tawi inspiriirt fer saan: “Tayn aue hon mich kesiin soo kaar wii ich noch een empryoon waar.” (Psalm 139:16) Fer Kot waar Tawi xon een mënx eep eyer kepoer waar.

•   Eep te profeet Yeeremias kepoer waar, hot Kot xon pleen kehat fer tëm een spetsyaal aarwayt kepe. Kot saat tsu Yeeremias: “Eep ich tich perayt hon im muterlayp, hon ich tich xon kekhënt, un eeps tuu kepoer waarst, hon ich tich kehaylicht. Ich hon fon tich een profeet kemacht fer ti natsyoone.” (Yeeremias 1:5)

•   Lukas, eene fon te xrayper fon te Piipel, waar tokter un tee hot tas selwiche kreekixe wort penutst fer een khint woo noch in muterlayp waar, wii fer een khint woo xon kepoer waar. (Lukas 1:41; 2:12, 16)

 Kot fertsayert yemant woo xon aptraypung kemacht hot, wën te mënx aan nëmt was Kot tenkt iwich tas leepe. Tan, praucht tee khee xult mee xpiire weeche was tee kemacht hot. “Yeehoowa is parmhërtslich un tuut uns ferxteen . . . Soo wayt wii ti sun sayn ufkang fon te sun sayn unerkang is, soo wayt hot eyer unser feeler fon uns wech ketuun.” b (Psalm 103:8-12) Yeehoowa fertsayert al tii woo sich hërtslich peroye fon te sinte woo se friier kemacht hon, soo kaar fon een aptraypung. (Psalm 86:5)

 Tëm noo was ti Piipel saat iwich tas leepe fon een khint woo noch im muterlayp is, is es ferkheert aptraype soo kaar wën ti muter orer tas khint sayn kesuntheet in kefoer is.

 Tas khan selte mool pasiire tas es neetich is raus suuche tswixich ti muter sayn leepe orer tas khint sayn leepe. Tan, mise ti familye un te tokter raus suuche weem sayn leepe rete.