Armaxeton is te letste kriich tswixich ti mënxliche rechiirunge un Kot. Xon hayt, tuun tiise rechiirunge un tii woo tëne pay xteen sich keeche Kot xtele, wayl tii tuun net Tëm sayn rechiirung aan nëme. (Psalm 2:2) Te Armaxeton pringt tsum ën ti mënxliche rechiirunge. (Tanyël 2:44)

 Tas wort “Armaxeton” khomt ploos een mool in te Piipel foer, in Apokalipsis 16:16. Apokalipsis tuut foer raus saan tas ti “kheeniche fon te kans pewoont eyert” tuun sich “samele fer te kriich fon tëm kroose taach fom Ale Mechtiche Kot (…) uf tëm plats woo in hepreeyx Armaxeton heest”. (Apokalipsis 16:14)

 Weer khëmpft im Armaxeton? Yeesus Kristus tuut een himlix militeer fiire un tuut Kot sayn faynte ap kewine. (Apokalipsis 19:11-16, 19-21) Tepay in tiise faynte, sin tii woo sich keeche Kot sayn autoriteet xtele un tii woo Kot pelaytiche. (Esekyël 39:7)

 Wërt te Armaxeton ploos im Mitel Oryent kekhëmpft? Nee. Te Armaxeton kriich tuut ti kans eyert petrefe, net ploos een plats. (Yeeremias 25:32-34; Esekyël 39:17-20)

 Armaxeton, als mool kexrip “Har–Magedon” (in hepreeyx Har Meghiddohn), petayt “Mexiito Përich”. Mexiito waar een xtat im teritooryum fom friirixe Israël. Wichtiche kriiche sin tat rom kekhëmpft kep un etliche fon tëne xteen in te Piipel. (Richter 5:19, 20; 2^te Kheeniche 9:27; 23:29) Awer, wën ti Piipel iwer te Armaxeton xprecht, khan se net am xpreche sin iwer tas friirixe plats woo Mexiito waar. Es kept tat khee kroose përich; un soo kaar te taal fon Yesreël weyer net kroos kenuuch fer se samele ale tii woo keeche Kot khëmpfe. Was is te Armaxeton tan? Is wën ti kanse natsyoone fon te welt sich een letste mool samele tuun keeche Kot sayn rechiirung.

 Was tuut in tëm Armaxeton kriich pasiire? Meyer wise net wii Kot sayn kraft penutse tuut. Awer eyer khan ti selwiche tinge penutse woo eyer xon friier penutst hot: xloose, eyertxutere, xtarke reene, fayer, xweewel, plitse un krankheete. (Yoop 38:22, 23; Esekyël 38:19, 22; Hapakuk 3:10, 11; Sakarias 14:12) Weeche ti torich naner, fer weenichts etliche fon Kot sayn faynte tuun sich naner um pringe. Awer am ën, tuun se mërke tas Kot keeche tëne am khëmpfe is. (Esekyël 38:21, 23; Sakarias 14:13)

 Tuut te Armaxeton tas ën fon te welt pringe? Ti eyert wërt net im Armaxeton fernicht. Tii is kemacht kep tas ti mënxe khene fer imer too truf woone. (Psalm 37:29; 96:10; Eklesyastes 1:4) Te Armaxeton tuut aach net ti kans mënxheet fernichte. In woerheet, tuut tee ti mënxheet rete, wayl “een kroos folek” fon Kot sayn tiiner tuut te Armaxeton iwerleepe. (Apokalipsis 7:9, 14; Psalm 37:34)

 Als mool, tuut ti Piipel tas wort “welt” penutse fer iwer ti eyert xpreche. Awer als mool, wërt tas penutst fer ti xlechte mënxe woo sich keeche Kot xtele pexraype. (1^te Yoohan 2:15-17) Tas is was ti Piipel saan wil wën se saat tas te Armaxeton “tas ën fon te welt” is. (Matheus 24:3, tëm noo te King James iwersetsung.)

 Wën tuut te Armaxeton pasiire? Wii Yeesus iwer ti “kroos tripulatsyoon” am xpreche waar — woo tsum Armaxeton nëmt — hot eyer kesaat: “Nimant wees te taach un ti xtun, noch net mool ti engele im himel orer te Soon; ploos te Fater wees es.” (Matheus 24:21, 36) Noch soo, tuut ti Piipel tsayche tas te Armaxeton torich Yeesus sayn presens pasiirt. Meyer khene net tiise presens siin, awer tii hot in 1914 aan kefang. (Matheus 24:37-39)