Auskewaksner khiner hon ti wichtich responsapiliteet fer iire eltere kuut uf phase. Ti Piipel saat tas ti khiner sole “eyerst lërne tsayche iire aanpeetung tsu Kot in iire aychne haus, un iire eltere un krooseltere tsurik kepe was iir keheert, wayl tas kefalt Kot.” (1 Timoteus 5:4) Wën ti khiner soriche tas ti eltere kuut uf kephast wëre, tan heere se aan tas piiplixe kesets fer iire eltere eere. (Ëfeser 6:2, 3.)

 Ti Piipel saat net kenau wii ti eltere sole uf kephast wëre. Tii xprecht fon troye mëner un fraae woo tas kemacht hon. Ti Piipel kept aach praktixe aanreete woo khene helfe tii woo ti eltere uf phase.

•  In ti piiplixe tsayte, wii hon etliche iire eltere uf kephast?

•  Was fer praktixe aanreete kept ti Piipel fer tëne woo ti eltere uf phase?

•  Is es ferkheert ti eltere in een alterhaym tuun?

 Tii hon tas uf unerxiitliche aate kemacht, tëm noo ti umxteente.

•   Yoosef hot wayt wech kewoont fon sayne alte fater Yaakop. Awer, soo wiis meechlich waar, hot tee sayne fater keholef ticht pay iim woone khome. Yoosef hat kesoricht tas sayne fater hët een woonung, ese un teet uf kephast wëre. (Xeenesis 45:9-11; 47:11, 12)

•   Rut is noo een anert lant kewanert fer mit iire xwiichermuter plaype, un hot flaysich kexaft fer se uf phase. (Rut 1:16; 2:2, 17, 18, 23)

•   Yeesus, khorts foer sayne toot, hot tee eene fon sayn tisipele raus kesuucht fer sayn muter, Maria, uf phase, wayl tii waar, im xtant, xon een witfraa. (Yoohan 19:26, 27) a

 Als mool, tii woo ti eltere uf phase khene sich khërperlich un emotsyonaal miit xpiire. Awer ti Piipel pringt oryentiirunge woo khene helfe tii woo tiise responsapiliteet hon.

•   Eer tayn eltere.

   Was saat ti Piipel: “Eer tayne fater un tayn muter.” (Eeksotus 20:12)

   Wii tiise aanreet aan wëne? Tuu tsaychst tas tuu tayn eltere eerst wëns tuu net fersuuchst kontroliire ales in iire leepe. In was noch meechlich is, los tas tii iire aychne ëntxlise mache iwich wii se wole kërn uf kephast wëre. In ti selwiche tsayt, eer tayn eltere un mach was tuu khanst fer iir helfe.

•   Xtreng tich aan fer tayn eltere ferxteen un fertsaye.

   Was saat ti Piipel: “Tas ferxtëntnis fom mënx macht tas eyer net laycht wuutich wërt, un es is xeen wën eyer ti pelaytichung torich keen lost.” (Xpriiche 19:11)

   Wii tiise aanreet aan wëne? Wën tayne fater orer muter was saat oone tenke orer siit aus tas se net petanklich sin tas tuu se uf phast, froo tich: ‘Wii teet ich mich xpiire wën ich uf iire plats weyer?’ Sich aan xtrenge fer se ferxteen un fertsaye heleft tich tas ti situatsyoon net xlimer wërt.

•   Xprecht mit anere.

   Was saat ti Piipel: “Wën ma net fertseelt, pariire ti pleen net, awer mit fiile aanreeter, kriit ma kuute resultaate.” (Xpriiche 15:22)

   Wii tiise aanreet aan wëne? Suuch noo wii um keen mit tayn eltere sayn kesuntheet propleem. Fin raus was fer sorte hilfe sin tat woo tii woone. Xprech mit anere woo iire eltere uf kephast hon. Wëns tuu kexwistere host, khanst tuu een familye fersamlung mache fer xpreche iwich ayre eltere sayn neetichkheete, wii tii uf phase un was yeete eene mache khan fer helfe.

•   Erkhënt wii fiil tuu mache khanst.

   Was saat ti Piipel: “Ti kluucheet is mit te teemuutiche.” (Xpriiche 11:2)

   Wii tiise aanreet aan wëne? Say realistix. Erkhënt tas tuu net imer ti tsayt un enerxii host fer ales mache was tuu kërn wolst fer tayn eltere uf phase. Wëns tuu xpiirst tas es fer tich tsu fiil is tayn eltere aleen uf phase, ferlang hilef fon een anere fon te familye orer petsaal yemant woo tiise aarwayt xaft.

•   Tenk aach aan tich.

   Was saat ti Piipel: “Khee man hast sayn aychne khërper, awer tuut tëm ese kepe un uf phase.” (Ëfeser 5:29)

   Wii tiise aanreet aan wëne? Ale tëm tuu ti responsapiliteet host fer tayn eltere uf phase, must tuu tich aach selepst uf phase un aach tayn familye, wëns tuu ferhayrat pist. Tuu must kuut ese, aus ruue un kenuuch xloofe. (Eklesyastes 4:6) Un tas is aach kuut etwas mache fer tich ferkniiche. Wëns tuu tas machst, tan pis tuu peser traan fer tayn eltere uf phase.

 Ti Piipel xprecht niks iwich tas plats woo ti eltere sole woone orer uf kephast wëre. Etliche familye wëre ëntxlise ti eltere tehëm uf phase, pay een khint orer in ti eltere sayn aychen haus. Anere tenke ti eltere teete peser uf kephast wëre in een alterhaym orer in een klinika. Yeete familye mus raus suuche was peser khent sin fer ale. (Kalater 6:4, 5)