Eep mer wise wan tas ën fon te welt khomt, mise mer ferxteen was tas wort “welt” in te Piipel petayt. Tas kreekix wort kósmos, woo ofts wii “welt” iwersetst is, hot in te meyerst tsayt mit te welt fon te mënxheet se tuun, hauptseechlich mit te layt woo net Kot sayn wile mache. (Yoohan 15:18, 19; 2 Pheeter 2:5) Als mool, hot tas wort kósmos aach se tuun mit te aat wii ti mënxheet orkanisiirt is in te politik, in te relichyoon un in tas kexefts sisteem. (1 Korinter 7:31; 1 Yoohan 2:15, 16) a

Was is “tas ën fon te welt”?

 Te sats “tas ën fon te welt”, woo in fiile iwersetsunge fon te Piipel foer khomt, khan aach wii “ën fon tiise sisteem” iwersetst wëre. (Matheus 24:3) Te sats “tas ën fon te welt” hot net mit te fernichtung fon te Eyert orer fon te kanse layt se tuun. Tee hot se tuun mit tas ën fon te aat wii ti mënxheet hayt orkanisiirt is. (1 Yoohan 2:17)

 Ti Piipel lërnt in tas “ti xlechte wëre fernicht” un ploos ti kuute layt uf te Eyert leepe tuun. (Psalm 37:9-11) Ti fernichtung fon te xlechte layt tuut torich ti “kroos tripulatsyoon” pasiire, woo keet aans ën mit te kriich fom Armaxeton. (Matheus 24:21, 22; Apokalipsis 16:14, 16)

Wan wërt tas ën fon te welt khome?

 Yeesus hot kesaat: “Nimant wees te taach un ti xtun, noch net mool ti engele im himel orer te Soon; ploos te Fater wees es.” (Matheus 24:36, 42) Eyer hot aach kesaat tas tas ën ‘khomt in een xtun woo mer net tenke’. (Matheus 24:44)

 Meyer wise net te taach un ti kenau xtun wan tas ën khomt. Awer Yeesus hot iwer fiile tinge kexproch woo pasiire teete eep tas ën fon te welt khomt. Tiise tinge, woo een “tsayche” sin, teete uns helfe ti tsayt foer tas ën itentifitsiire. (Matheus 24:3, 7-14) Ti Piipel xprecht iwer tiise tsayt wii “ti tsayt fom ën” orer ti “letste taache”. (Tanyël 12:4; 2 Timoteus 3:1-5)

Noo tas ën fon te welt, tuut etwas iwrich plaype?

 Yaa. Ti Eyert tuut wayter eksistiire. Ti Piipel saat tas ti eyert “wërt nii net fon sayn plats wech kehool”. (Psalm 104:5) Ti Piipel ferxprecht tas ti Eyert wërt fol mit kuute layt sin: “Ti kerechte tuun ti eyert kriin, un tuun fer imer too truf woone.” (Psalm 37:29) Kot macht tas ti Eyert wërt soo sin wii eyer imer hon wolt:

•   Ti Eyert wërt een Paratiis sin. (Isayas 35:1; Lukas 23:43)

•   Ti layt tuun in sicherheet woone un tuun ales hon was se prayche fer se leepe. (Mikeyas 4:4)

•   Al tuun een kuut un tsufriite aarwayt hon. (Isayas 65:21-23)

•   Nimant tuut krank un alt wëre. (Yoop 33:25; Isayas 33:24)