Michel, orer in etliche relichyoone kenënt “Hayliche Michel”, is te naame woo ti Piipel nënt Yeesus eep un noo tëm sayn leepe uf ti Eyert. a In te Piipel xteet tas Michel hot, noom Mooses sayne toot, kekhëmpft mim Taywel. Een aner mool, hot tee een engel keholef een pexeet fon Kot tsu Tanyël nëme. (Tanyël 10:13, 21; Yuutas 9) Te naame Michel petayt “Weer is wii Kot?”. Sicher hot Yeesus recht aan tiise naame, wayl tee Kot sayn Raych xitst un khëmpft keeche Kot sayn faynte. (Tanyël 12:1; Apokalipsis 12:7)

 Wole mer siin warom mer khene ferxteen tas Yeesus te haupste engel Michel is.

•   Michel is “te haupste engel”. (Yuutas 9) Te thitel “haupste engel” petayt “te xëf” fon te engele. Too is ploos eene haupste engel kenënt in ti tswaay wersikele, tas tsaycht tas ploos eene engel tiise thitel hot. Eene fon tiise tekste woo xprecht iwich Yeesus noo sayn ufxtaye saat tas “te aychne Hër tuut fom himel runer khome un tuut hart ruufe mit te xtim fon tëm haupste engel”. (1 Thesalooniker 4:16) Yeesus hot ti “xtim fon tëm haupste engel” wayl tee is te haupste engel — Michel.

•   Michel fiirt een militeer fon engele. In ti Piipel xteet tas “Michel un sayn engele hon keeche te trakoon (Satanaas) kekhëmpft”. (Apokalipsis 12:7) Michel hot kroos autoriteet im himel. Ti Piipel nënt tee wii “eene fon te haupste prins” un “te kroose prins”. (Tanyël 10:13, 21; 12:1) Tiise thitele tsayche tas Michel is “te fiire fon te himliche militeer”, soo wii David Aune, eene unersuucher fom Naye Testament, kesaat hot.

   Ti Piipel nënt ploos noch eene naame fer xpreche iwich yemant woo autoriteet iwich ti engele hot. Tii saat tas Yeesus im himel is “mit sayn mechtiche engele, in fayer flame”. (2 Thesalooniker 1:7, 8; Matheus 16:27) Yeesus “is tsum himel kang; un engele, autoriteete un krafte sin unich tëm ketuun kep”. (1 Pheeter 3:21, 22) Tas hët khee tswek, Kot Yeesus un Michel ti selwich xtel kepe — fiire ti troye engele. Soo, saan tas Yeesus un Michel te selwiche persoon is, hot mee tswek.

•   Michel wërt sich uf xtele in “een xweyer tsayt” woo noch nii pasiirt is. (Tanyël 12:1) Im puuch Tanyël, tas wort ‘uf xtele’ wërt oft penutst fer xpreche iwich een kheenich woo sich ‘uf xtelt’ fer etwas wichtiches mache. (Tanyël 11:2-4, 21) Yeesus Kristus, aach kenënt wii “Kotes Wort”, wërt aach etwas wichtiches mache wii “Kheenich fon te kheeniche”. Tee wërt fernichte Kot sayn kanse faynte un sayn folek xitse. (Apokalipsis 19:11-16) Yeesus wërt tas mache in een tsayt woos “een kroos tripulatsyoon kept, wii es noch nii fom aanfang fon te welt pis yets kep hot”. (Matheus 24:21, 42)