Nee. Ti Piipel saat net tas tas kelt was xlechtes is. Tii saat aach net tas tas kelt hinich ales xlechtes xtecht. Etliche saan tas “tas kelt is ti wortsel fon ale xlechte”. Awer is net kraat tas was ti Piipel in lërnt. In woerheet, ti Piipel saat tas “ti liip tsum kelt is ti wortsel fon ale sorte xlechte tinge.” a (1 Timoteus 6:10)

•  Was saat ti Piipel iwich tas kelt?

•  Warom is es kefeerlich tas kelt liipe?

•  Warom is es kuut aan wëne ti aanreete woo ti Piipel uns kept iwich kelt?

•  Piiplixe wersikele woo iwich kelt xpreche

 Wën ma ferninftich mit kelt um keet, khan tas nutslich un soo kaar een xuts sin fer uns, saat ti Piipel. (Eklesyastes 7:12) Un aach, ti Piipel loopt tii woo kuuthërtslich mit anere sin, un tas khan als mool tsu tuun hon mit een kleen kexenk in kelt kepe. (Xpriiche 11:25)

 Awer ti Piipel reet uns aan tas mer sole net fom kelt tas haupste in unser leepe mache. Tii saat: “Ayre leepe mus fray fon te liip tsum kelt sin; sayt tsufriite mit was teyer hot.” (Hepreeyer 13:5) Was hon mer kelërnt too fon? Tas kelt solt net tas haupste in unser leepe sin, mer sole tas ufs richtiche plats xtele. Meyer mise lërne tsu friite sin mit tinge woo wërklich neetich sin, wii ese, tsaych un plats fer woone. (1 Timoteus 6:8)

 Layt woo imer noch mee kelt wole, kriin net tas eewiche leepe. (Ëfeser 5:5) Eyerst, imer mee kelt winxe is een aat itolatrii, tas is, falx aanpeetung. (Koloser 3:5) Tsweete, wayl ti layt imer mee kelt winxe, tuun se oft ferkheerte tinge mache fer kriin was se wole. Xpriiche 28:20 saat: “Te troye man kriit fiil seechen, awer weer wil xnel raych wëre, tuut net unxultich plaype.” Tii woo tas kelt liipe, khene soo kaar soo wayt khome tas se fer anere xaate mache, soo wii hinerkeen, aus nutse, pexteele un soo kaar um pringe.

 Wën yemant aach net soo wayt khomt, ti liip tsum kelt khan aneres xlechtes in sayn leepe pringe. Ti Piipel saat: “Awer tii woo raych wëre wole, fale in fersuuchung, in lase un in fiil unferninftiche winxe woo xaate tuun, woo mache tas ti mënxe in fernichtung un ruiine fale.” (1 Timoteus 6:9)

 Ti Piipel lërnt was richtich is un was Kot kefalt. Meyer wole net etwas ferkheertes mache ploos fer mee kelt kriin. Wën tas haupste fer uns is Kot kefale, tan khene mer uns fraye wayl mer mache was richtich is. Un mer khene sicher sin tas Kot uns aan nëmt un xtitst. Tee ferxprecht: “Ich tuun tich nii lose un ich tuun tich nii im xtich lose.” (Hepreeyer 13:5, 6) Tee kept uns aach ti sicherheet tas “troye man kriit fiil seechen.” (Xpriiche 28:20)