Yaa! Ti Piipel khomt fom Kot “woo treest tii woo oone muut sin. (2 Korinter 7:6) Opwool ti Piipel net een puuch fon psikoloxii is, hot se xon fiil layt keholef ti ketanke fer sich um pringe wech lose. Ti Piipel sayn praktixe aanreete khene tich aach helfe.

•  Was fer praktixe aanreete kept ti Piipel?

•  Meecht ti Piipel xpreche iwich layt woo wolte net mee leepe?

•  Was fer piiplixe wërse khene tich helfe ti ketanke fer sich um pringe wech lose?

•  Un wën een froynt saat: “Ich wil net mee leepe?”

•  Un wën ich xon fersuucht hon mich um pringe?

• ● Xprech iwich wiis tuu tich xpiirst.

   Was saat ti Piipel: “Te woere froynt tsaycht imer liip, un wërt een pruuter in unruyche tsayte.” — Xpriiche 17:17.

   Tas petayt: Meyer mise tas anere uns helfe wën mer soo trauriche ketanke hon.

   Wëns tuu net mit anere xprechst iwich was tuu xpiirst, khan sin tas tuu soo wayt khomst tas tuu tas net mee aus halst. Awer, wëns tuu mit een froynt too triwer xprechst, khan tiise last laychte wëre, un fiilaycht siist tuu ti tinge mit anere aue.

   Fersuuch mool tas: Xprech hayt mit yemant, tas khan een ferwanter orer een tichter froynt sin. a Tuu khanst aach uf xraype wiis tich aan is.

• ● Kee pay te tokter.

   Was saat ti Piipel: “Ti kesunte prayche khee tokter, awer ti kranke prayche.” — Matheus 9:12.

   Tas petayt: Meyer mise pay te tokter keen wën mer krank sin.

   Ketanke fer sich um pringe khene tsayche sin fon kemiits orer emotsyoonaale krankheete, un soo wii wën mer een fiisix krankheet hon, prayche mer uns net xeeme wën mer een emotsyonaal krankheet hon. Tas kept tratamënt fer kemiits un emotsyonaal krankheet.

   Fersuuch mool tas: Kee soo xnel wii meechlich pay een tokter woo mit tiise krankheet um keet.

• ● Ferkes net tas Kot tich liipt.

   Was saat ti Piipel: “Wëre net finef xpërlinge ferkhaaft fer tswaay nikele mit pisye weyert? Un toch, khee eene tuut Kot ferkese. . . . Tuut khee pang hon; teyer hot mee weyert wii fiile xpërlinge.” — Lukas 12:6, 7.

   Tas petayt: Kot kept tich fiil weyert.

   Tuu khanst tenke tas nimant sich was traus macht iwich was tuu xpiirst, awer Kot siit was tuu mit machst. Tee liipt tich, wëns tuu aach ti lust ferloer host fer leepe. Psalm 51:17 saat: “Tas opfer woo Kot kefalt is een ferprochne kayst; een ferprochne un fertriktne hërts, oo Kot, tuust tuu net tsurik xtoose.” Kot wil tas tuu leepe solst wayl tee tich liipt.

   Fersuuch mool tas: Mërk wii ti Piipel tsaycht tas Kot tich liipt. Tsum payxpiil, lees te kapitel 24 fom puuch Achegue-se a Jeová.

• ● Peet tsu Kot.

   Was saat ti Piipel: ‘Wëreft ayre kanse soriche uf Kot, wayl Tee phast aych uf’. — 1 Pheeter 5:7.

   Tas petayt: Kot wil tas tuu iim fertseele solst wiis tuu tich xpiirst un iwich was tuu tich ketanke machst.

   Kot khan tich inerlich friit kepe un kraft fer net uf kepe. (Filiper 4:6, 7, 13) Tas is ti aat woo Kot heleft tii woo hërtslich tsu iim peete. — Psalm 55:22.

   Fersuuch mool tas: Peet hayt tsu Yeehoowa. Penuts tëm sayne naame, Yeehoowa, un saa tsu iim wiis tich aan is. (Psalm 83:18) Ferlang tas tee tich heleft tas tuu net uf kepst.

• ● Tenk iwich was ti Piipel ferxprecht fer te tsukhunft.

   Was saat ti Piipel: “Tiise sicher un fest hofnung woo mer hon, is wii een anker fer unser seel.” — Hepreeyer 6:19, noote.

   Tas petayt: Unser xpiirunge sin manich mool wii een xiif, woo hiner un heyer kexmis wërt wën unweete in meer is. Awer ti hofnung fon te Piipel hot ti kraft fer unser xpiirunge wiiter peruyche.

   Tiise hofnung is net ploos een wunx. Tii halt sich aan Kotes ferxpreche fer am ën mache mit ales was uns layte macht. — Apokalipsis 21:4.

   Fersuuch mool tas: Lërn mee iwich ti hofnung woo ti Piipel uns kept. Lees ti lisyoon 5 fom piichelche Kuute notisye fon Kot fer tich!.

• ● Mach etwas woos tuu kërn host.

   Was saat ti Piipel: “Een frooe hërts is een kuut metitsiin.” — Xpriiche 17:22.

   Tas petayt: Mache was tich frayt khan ferpesere tayn emotsyonaal kesuntheet.

   Fersuuch mool tas: Mach etwas woos tuu kërn host. Tsum payxpiil, horich musike woo tich lustich mache, lees etwas woo tich uf muut orer suuch tsayt fertraype woo tich kefale. Tuu khanst tich aach fraye wëns tuu tayn tsayt penutst fer anere helfe, wën aach mit kleene tinge is. — Aphostele sayn Kexicht 20:35.

• ● Kep acht tsu tayn kesuntheet.

   Was saat ti Piipel: “Te khërper iipe, pringt etwas kuutes.” — 1 Timoteus 4:8.

   Tas petayt: Khërper iipe, kenuuch xloofe un kesunt ësmitel ëse is kuut fer tich.

   Fersuuch mool tas: Kee xtram laafe, fer weenichst 15 minute.

• ● Tenk tas tayn xpiirunge un anere tinge im leepe sich ferënere.

   Was saat ti Piipel: ‘Iir wist kaar net wii ayre leepe moye wërt sin.’ — Tyako 4:14.

   Tas petayt: Een xlime propleem, woos tuu khanst net mit um keen, halt im xtant ploos fer een tsayt aan.

   Is ekaal wii xlim ti situatsyoon khan yets aus siin, tii khan sich moye ferënere. Tes weeche, suuch aate fer mit tas um keen. (2 Korinter 4:8) Is meechlich tas een xlime situatsyoon sich mit ti tsayt ferënert, awer sich um pringe khan net tsurik kemacht wëre.

   Fersuuch mool tas: Lees in te Piipel ti kexichte fon layt woo soo tiifsinich waare tas se wolte xtërpe, un kuk wii iire leepe peser kewoer is mit te tsayt — un oft mools uf aate woo se nii kewaart hon. Kuk etliche payxpiile.

 Yaa. Ti Piipel xprecht iwich layt woo in een aat kesaat hon: “Ich wil net mee leepe.” Kot hot net tiise layt aus kexënt, awer tee hot se keholef, un tee khan aach tas selwiche fer tich mache.

Eliias

•  ● Weer waar tee? Eliias waar een koraajiche profeet. Awer, als mool hot tee aach ti muut ferloer. Tyako 5:17 saat ‘Eliias waar een man mit xpiirunge kraat soo wii unser’.

•  ● Warom wolt tee xtërpe? Een mool hot Eliias sich soo aleen kexpiirt, ëngstlich un oone weyert tas se aan kehalt hot: “Yeehoowa, nëm mayn leepe wech.” — 1 Kheeniche 19:4.

•  ● Was hot tëm keholef? Eliias hot fer Yeehoowa fertseelt wiis iim aan waar. Wii hot Kot tee uf kemuut? Kot hot ketsaycht tas se sich ketanke mache teet iwich Eliias un hot tëm sayn kraft ketsaycht. Kot hot aach fer Eliias ti sicherheet kep tas tee noch fiil weyert hët fer iim. Un noch, Kot hot tëm een liipliche un kwape hilfer kep.

•  ▸ Lees iwich Eliias: 1 Kheeniche 19:2-18.

Yoop

•  ● Weer waar tee? Yoop waar een xëf fon een raych familye woo Yeehoowa troy aan kepeet hot.

•  ● Warom wolt tee xtërpe? Yoop sayn leepe hot sich uf mool ferënert, fiil xlechte tinge sin mit iim pasiirt. Tee hot sayn kans raychtum ferloer. Sayn kanse khiner sin um khom in een unfal. Tee hot een xlim krankheet kriit. Tsum ën wolte se iim noch ti xult kepe weeche ti kanse xlechte tinge woo iim pasiirt sin. Yoop saat: “Ich hase mayn leepe. Ich wil net mee leepe.” — Yoop 7:16.

•  ● Was hot tëm keholef? Yoop hot tsu Kot kepeet un hot aach mit anere fertseelt. (Yoop 10:1-3) Eliu, een kuute froynt, hot tee uf kemuut. Hot tee keholef sayn situatsyoon aan siin mit anere aue. Awer tas haupste waar tas Yoop Kot sayn hilef un aanreet aan kenom hot.

•  ▸ Lees iwich Yoop: Yoop 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mooses

•  ● Weer waar tee? Mooses waar tee fiire fon tas friirix folek fom Israël un een troyer profeet.

•  ● Warom wolt tee xtërpe? Mooses hat fiil tsu tuun kehat, tii hon ti kans tsayt iwich iim kekrinst un tee hot sich soo miit kexpiirt. Tan hot tee aan Kot aan kehal: “Piite, macht mich toot yets.” — Nuumere 11:11, 15.

•  ● Was hot tëm keholef? Mooses hot Kot fertseelt was tee kexpiirt hot. Kot hot Mooses keholef sayn aarwayt laychter mache tas se weenicher strës mit mache teet.

•  ▸ Lees iwich Mooses: Nuumere 11:4-6, 10-17.