Tuu khanst Kot perseenlich khëne lërne wëns tuu iwer tëm lërnst un tinge machst woo tëm kefale. Tan, ‘khomt Kot ticht tsu tich’. (Tyako 4:8) Ti Piipel lost uns sicher tas “eyer net wayt fon yeete eene fon uns” is. (Aphostele sayn Kexicht 17:27)

•  Xrite fer Kot khëne lërne

•  Falxe itee iwer Kot

 Ti Piipel leese

•  Was ti Piipel saat: “Ti kans Xrift is torich Kot sayn kayst kep woer.” (2 Timoteus 3:16)

•  Was tiise wërs saan wil: Te Autoer fon te Piipel is Kot. Eyer hot sayn ketanke in te khop fon te xrayper fon te Piipel ketuun. Torich tiise wunerliche puuch, hot Kot ketsaycht was eyer fon uns wil hon. Meyer tuun aach fiil iwer sayn personaliteet se wise kriin, wii: sayn liip, kerechtichkheet un parmhërtslichkheet. (Eeksotus 34:6; Teuteronoomyum 32:4)

•  Was tuu mache khanst: Lees ti Piipel yeete taach. (Yosuee 1:8) Tenk triwer noo aan was tuu kelees host un tuu tich frooe: ‘Was tuut mich tas iwer Kot sayn personaliteet in lërne?’ (Psalm 77:12)

   Tsum payxpiil, lees Yeeremias 29:11, un tan froo tich: ‘Was wil Kot fer mich — friit orer unklik? Is eyer een Kot woo wil mich xtroofe, orer wil eyer tas ich een xeen futuer hon?’

 Tuu ti kriatsyoon peopachte

•  Was ti Piipel saat: “[Kot] sayn kwaliteete woo ma net siin khan ... sin taytlich kesiin fon te tsayt aan woo ti welt kemacht kep is, wayl tii sin kemërkt torich ti tinge woo kemacht kep sin.” (Romaaner 1:20)

•  Was tiise wërs saan wil: Wën mer een kemooltne pilt mit acht kuke, khene mer fiil lërne iwer te persoon woo tas kemoolt hat. Tas selwiche pasiirt wën mer ti tinge in te kriatsyoon peopachte; tas khan uns fiil iwer Kot sayn personaliteet in lërne. Tsum payxpiil, ti kapasiteet un kompleksiteet fon unser kehërn tsaycht Kot sayn kluucheet, un ti kraft fon te sun un fon te xtërne tsaycht Kot sayn macht. (Psalm 104:24; Isayas 40:26)

•  Was tuu mache khanst: Hool tsayt fer ti kriatsyoon peopachte un fer mee iwer tii lërne. Wëns tuu tas machst, froo tich: ‘Was tuun mich tiise wunerliche tinge in te natuer iwer Kot tsayche?’ a Sicher, tuut uns ti natuer net ales iwer unser Kriatoer saan. Es is weeche tas warom Kot uns ti Piipel kep hot.

 Penuts Kot sayn naame

•  Was ti Piipel saat: “Ich tuun tee xitse wayl tee tuut mayn naame khëne. Tee tuut mich ruufe, un ich tuun tëm antworte.” (Psalm 91:14, 15)

•  Was tiise wërs saan wil: Kot kept ekstra acht fer tii woo sayn naame khëne un tëm mit respekt penutse. Tëm sayn naame is Yeehoowa. b (Psalm 83:18; Malakias 3:16) Kot hot uns sayn perseenliche naame pekhant kemacht. Eyer hot kesaat: “Ich sin Yeehoowa. Tas is mayn naame.” (Isayas 42:8)

•  Was tuu mache khanst: Penuts te naame Yeehoowa wëns tuu mit Kot xprechst orer iwer tëm fertseelst.

 Xprech mit Yeehoowa im kepeet

•  Was ti Piipel saat: “Yeehoowa is ticht pay ale woo tëm aan ruufe.” (Psalm 145:18)

•  Was tiise wërs saan wil: Yeehoowa khomt ticht tsu tëne woo mit klaape tsu tëm peete. Tas kepeet is een teel fon unser aanpeetung un tsaycht tas mer tiif respekt tsu Kot hon.

•  Was tuu mache khanst: Tuu imer tsu Kot peete. (1 Thesalooniker 5:17) Tuu fer tëm saan, wiis tuu tich xpiirst un was tich soriche macht. (Psalm 62:8) c

 Ferxtërk tayn klaape tsu Kot

•  Was ti Piipel saat: “Oone klaape is es unmeechlich Kot kefale.” (Hepreeyer 11:6)

•  Was tiise wërs saan wil: Meyer mise aan Kot klaape fer tëm sayn fraaynte sin. Ti Piipel tsaycht tas klaape hon, is mee wii ploos klaape tas Kot eksistiirt. Es tuut aach petayte kans traue tas Kot sayn ferxpreche erfiile tuut un tas was eyer fon uns ferlangt tas pestes fer uns is. Uf Kot traue, is aarich wichtich fer tëm sayn fraaynt sin.

•  Was tuu mache khanst: Woere klaape xtaypt sich uf khëntnis. (Romaaner 10:17) Tuu khanst tiise khëntnis kriin wëns tuu ti Piipel xtutiirst. Soo, tuust tuu fer tich selepst pewayse tas tuu uf Kot un sayn aanreete wërklich traue khanst. Yeehoowa sayn Tsayer tuun tich kërn helfe ti Piipel mit tich se xtutiire. d

 Mach was Kot kefalt

•  Was ti Piipel saat: “Tas petayt Kot se liipe: tas meyer sayn kepoote aan heere.” (1 Yoohan 5:3)

•  Was tiise wërs saan wil: Yeehoowa frayt sich mit te layt woo, weeche liip tsum tëm, tuun sayn pestes kepe fer tëm sayn kepoote aan heere.

•  Was tuu mache khanst: Wëns tuu ti Piipel xtutiirst, tuust tuu mërke was Kot kërn hot un was net. Froo tich: ‘Was fer ënerunge in mayn leepe mus ich mache fer Kot kefale?’ (1 Thesalooniker 4:1)

 Tuu Kot aan heere fer tëm sayn liip xpiire

•  Was ti Piipel saat: “Xmekt un siit tas Yeehoowa kuut is.” (Psalm 34:8)

•  Was tiise wërs saan wil: Kot wil hon tas tuu mit tayn aychne aue siist wii kuut eyer mit tich is. Wëns tuu Kot sayn liip un hilef in tayn leepe xpiirst, tuut tas tich uf muute noch tichter tsu tëm khome.

•  Was tuu mache khanst: Wëns tuu ti Piipel leest, tuu Kot sayn aanreete aan wëne un sii te nutse woo tas fer tayn leepe pringt. (Isayas 48:17, 18) Kuk aach wii anere layt, mit Kot sayn hilef, xwiirichkheete iwerkhom hon, sayn leepe in te familye ferpesere khonte un woere frooheet kefun hon. e

 Falx itee: Kot is een kehaymnis.

 Fakt: Es is woer tas etliche tinge iwer Kot sin xweyer se ferxteen, wii tsum payxpiil, tas mer Kot net siin khene. Noch soo, khene mer Kot khëne lërne. Ti Piipel saat tas es wichtich is Kot khëne lërne wayl ploos soo khene mer eewiches leepe kriin. (Yoohan 17:3) Ti Piipel xprecht in een aat woo mer ferxteen khene iwer Kot sayn kwaliteete, iwer warom eyer ti Eyert un ti mënxe kemacht hat, un aach iwer was eyer fon uns waart. (Isayas 45:18, 19; 1 Timoteus 2:4) Un wii meyer xon kesiin hon, tsaycht ti Piipel was fer Kot sayn naame is. (Psalm 83:18) Soo, khene mer Kot khëne lërne un tëm sayn fraaynte wëre. (Tyako 4:8)