Ti layt penutse Yeesus Kristus sayn inlërnunge fer unerxiitliche “kristliche” khëriche aan fange. Awer ti Piipel tsaycht tas es ploos een eensiche woere kristyanismus kept. Warom khan ma tas ëntxlise? Kuk tray motiiwe.

1.   Yeesus saat tas eyer hët tëne “ti woerheet” in kelërnt, un ti eyerste kriste hon iire relichyoon kenënt wii “ti woerheet”. (Yoohan 8:32; 2 Pheeter 2:2; 2 Yoohan 4; 3 Yoohan 3) Tiise tekste tsayche tas wën yemant inlërnunge pringt woo keeche keen was Yeesus in kelërnt hot, tan halt tee sich net am woere kristyanismus.

2.   Ti Piipel lërnt tas was ti kriste ‘saan, sol pextime’. (1 Korinter 1:10) Awer fiil khëriche fon te kristenthum khome net iwer eens in ti haupste inlërnunge, soo wii, was petayt een krist sin. Net ale krupe khene richtich sin. (1 Pheeter 2:21)

3.   Yeesus hot in foer raus kesaat tas fiil layt teete sich kriste nëne, awer teete net aan heere sayn inlërnunge, un eyer teet tii net aan nëme. (Matheus 7:21-23; Lukas 6:46) Etliche teete hiner kang wëre fon relichyeese fiirer woo ti woerheet fertreye fer iire aychne fertiinst. (Matheus 7:15) Awer etliche teete te falxe kristyanismus raus suuche wayl tat wërt kesaat was tii heere wole, xtats ti piiplix woerheet. (2 Timoteus 4:3, 4)

 In te ferklaychung fon unkraut un wayts, hot Yeesus kesaat tas es teet een kroos repelyoon, orer aphostasii, kepe, keeche te woere kristyanismus. (Matheus 13:24-30, 36-43) Fer een lang tsayt, weyer tas net meechlich te unerxiit siin unich woere un falxe kriste. Soo wii Yeesus saat, ti aphostasii hot sich ferkreest noo ti aphostele sayne toot. (Aphostele sayn Kexicht 20:29, 30) Ale tëm ti aphostate sayn inlërnunge net al ekaal sin, ale sorte falxe kristyanismus lenkt ti layt “ap fon te woerheet”. (2 Timoteus 2:18)

 Yeesus hot aach kesaat tas, mit te lëngt, teet ti unerxiit unich woere un falxe kriste kans klaar wëre. Tas pasiirt yets in unser taache, am ën “fon een welts sisteem”. (Matheus 13:30, 39)