Ti kroos tripulatsyoon is een tsayt woo wërt pringe ti kreeste xwiirichkheete woo ti mënxheet xon mit kemacht hot. Tëm noo ti piiplix profetsii, tas wërt pasiire in “ti letste taache” orer ti “tsayt fom ën”. (2 Timoteus 3:1; Tanyël 12:4) Yeesus hot kesaat tas “tiise taache wëre taache sin fon tripulatsyoon, soo wiis noch nii pasiirt is fom aanfang aan fon Kot sayn kriatsyoon, woo Kot kemacht hot, pis yets hin, un wërt nii mee pasiire.”(Markus 13:19; Tanyël 12:1; Matheus 24:21, 22)

Was wërt pasiire in te kroos tripulatsyoon

•   Ti fernichtung fon te falxe relichyoone. Wunerlich xnel wëre ti falxe relichyoone fernicht. (Apokalipsis 17:1, 5; 18:9, 10, 21) Kot wërt mache tas ti rechiirunge, woo representiirt sin torich ti Orkanisatsyoon fon te Fereenichte Natsyoone, ti falxe relichyoone fernichte. (Apokalipsis 17:3, 15-18) a

•   Fersuuchung fer ti woere relichyoon fernichte. In een wisyoon, hot Esekyël kesiin een krup fon natsyoone, woo kenënt sin wii “Kook fon Makook”, wërt fersuuche fernichte tii woo teel mache fon te woere relichyoon. Awer Kot wërt xitse tii woo iim aan peete un wërt net lose tas se fernicht wëre. (Esekyël 38:1, 2, 9-12, 18-23)

•   Ti mënxe woo uf te eyert woone wëre kericht. Yeesus wërt ti mënxheet richte un wërt “ti mënxe aus naner teele, soo wii te xeefer ti xeef fon te kaprite aus naner teelt.” (Matheus 25:31-33) Yeesus wërt yeete mënx richte tëm noo ti aat wii tee Yeesus sayn “priiter” — woo wëre mit iim im himel rechiire — pehantelt hot. (Matheus 25:34-46)

•   Tii woo mit Yeesus rechiire wëre kesamelt. Tii woo raus kesuucht sin fer mit Yeesus rechiire un troy plaype pis am ën fon iire leepe hiir uf tii eyert, wëre uf keruuft fom toot fer im himel leepe. (Matheus 24:31; 1 Korinter 15:50-53; 1 Thesalooniker 4:15-17)

•   Armaxeton. Tiise “kriich fon tëm kroose taach fom Ale Mechtiche Kot” is aach kenënt “te taach fon Yeehoowa”. (Apokalipsis 16:14, 16; Isayas 13:9; 2 Pheeter 3:12) Tii woo Yeesus richte tuut wii Kot sayn faynte wëre fernicht. (Sofonias 1:18; 2 Thesalooniker 1:6-10) Tee wërt aach fernichte ti welts politik sisteem, woo in te Piipel representiirt is wii een wilt tier mit siwe khëp. (Apokalipsis 19:19-21)

Was wërt pasiire noo ti kroos tripulatsyoon

•   Satanaas un ti temoone wëre inkexpërt. Een xtarke engel wërt Satanaas un ti temoone in tas “tiife loch” wërfe. (Apokalipsis 20:1-3) Tas petayt tas se khene niks mee mache, soo wii wën se toot weere. Tas is soo als wën Satanaas inkexpërt weyer; tee khan net mee ti layt influentsiire un aach net was in te welt pasiirt. (Apokalipsis 20:7)

•   Yeesus fang aan tsu rechiire. Yeesus sayn rechiirung fon tausent yoore wërt wunerliche tinge mache fer ale mënxe uf ti eyert. (Apokalipsis 5:9, 10; 20:4, 6) Ma khan net saan wii fiil layt ti “kroos tripulatsyoon” iwerleepe. Ti Piipel saat ploos tas es wërt een “kroos folek” sin. Tiise mënxe khene siin te aan fang fon Yeesus sayn rechiirung hiir uf ti eyert. (Apokalipsis 7:9, 14; Psalm 37:9-11)