Ti Piipel pexraypt ti situatsyoon fon te welt, ti ewënte un ti aanxtelunge fon te layt woo tas “ën fon tiise sisteem” itentifitsiire teete. (Matheus 24:3) Ti Piipel nënt tiise tsayt wii ti “letste taache” un ti “tsayt fom ën”. (2 Timoteus 3:1; Tanyël 8:19)

 Ti Piipel xprecht iwer fiile tinge woo in te selwich tsayt pasiire teete un woo “tas tsayche” weyere woo ti letste taache itentifitsiire teet. (Lukas 21:7) Kuk etliche payxpiile:

 Kriiche uf te kans Eyert. Yeesus hot foer raus kesaat: “Natsyoon tuut sich keeche natsyoon xtele un raych keeche raych.” (Matheus 24:7) Apokalipsis 6:4 tuut aach iwer een simpoolix rayter xpreche woo ti kriiche representiirt. Tas teet “te friit fon te eyert wech xafe”.

 Hungernoot. Yeesus hot foer raus kesaat: “Es wërt hungernoot kepe.” (Matheus 24:7) Tas puuch Apokalipsis xprecht iwer een aner simpoolix rayter woo representiirt te hungernoot woos in fiile pletse kepe teet. (Apokalipsis 6:5, 6)

 Kroose eyertxutere. Yeesus hot kesaat tas es “eyertxutere uf een plats noom aner” kepe teete. (Matheus 24:7; Lukas 21:11) Ti kroose eyertxutere woo uf te welt pasiire teete, teete eelent un toot mee wii noch nii pringe.

 Krankheete. Yeesus hot kesaat tas es krankheete orer “epitemiis” kepe teet. (Lukas 21:11, Naye Testamënt Hunsrik)

 Kriime. Opwool te kriim xon lang eksistiirt, hot Yeesus foer raus kesaat tas in te letste taache teets een “ferkreesung fon te unkerechtichkheet” kepe. (Matheus 24:12)

 Fernichtung fon te Eyert. Apokalipsis 11:18 hot foer raus kesaat tas ti mënxe teete “ti eyert fernichte”. Tii teete tas in unerxiitliche aate mache — torich ti wyolënts, ferkheerte aktsyoone un xaate fer te meio ambiente mache.

 Ti layt sayn aanxtelunge teete imer xlechter wëre. Im 2 Timoteus 3:1-4, saat ti Piipel wii ti meyerste layt sich aan xtele teete: “Ti mënxe ... wëre unpetanklich, untroy, ... wëre net wilich sin fer mit te anere xtime, tuun ti anere ferxtumpiire, tuun khee selepst kontrol hon, wëre krop, oone liip fer tas kuutes, hinerlistich, tik khopich, hoochmuutich.” Tas teet soo xlim wëre tas ti Piipel tiise tsayt nënt wii ti ‘xlime tsayte, woo xweyer wëre fer um se keen’.

 Uneeniche familye. Im 2 Timoteus 3:2, 3, hot ti Piipel foer raus kesaat tas fiile teete “khee liip fer ti familye hon” un tas ti khiner teete “net ti eltere aan heere”.

 Ti layt teete ti liip tsu Kot ferliire. Yeesus hot foer raus kesaat: ‘Ti liip fon te meyerste teet khalt kepe.’ (Matheus 24:12) Yeesus wolt saan tas ti meyerste layt teete net mee Kot liipe. 2 Timoteus 3:4 tuut aach saan tas in te letste taache teete ti layt “ti luste liipe xtats Kot”.

 Relichyees falxheet. Im 2 Timoteus 3:5, hot ti Piipel foer raus kesaat tas ti layt teete net Kot fom hërts tiine wayl sayn leepe teet net xtime iwer was Kot saat richtich is.

 Tas ferxtëntnis fon te piiplixe profetsiie teet taytlicher wëre. Tas puuch fon Tanyël hat foer raus kesaat tas in te “tsayt fom ën”, teete fiile layt ti piiplixe woerheete imer peser ferxteen, too tepay tas richtich ferxtëntnis iwer tiise profetsiie. (Tanyël 12:4, noote)

 Ti preetich aarwayt uf te kans welt. Yeesus hot foer raus kesaat: “Tiise kuute notisye fom Raych wëre uf te kans pewoont eyert kepreeticht.” (Matheus 24:14)

 Ti layt teete sich niks traus mache un es teet imer mee xpoteray kepe. Yeesus hot kesaat tas fiile layt teete net acht kepe fer ti taytliche pewaysunge tas tas ën ticht weyer. (Matheus 24:37-39) Un noch, in 2 Pheeter 3:3, 4 xteet tas etliche layt teete iwer tiise pewaysunge lache un saan tas se khee sin mache teete.

 Ti erfiilung fon te kanse profetsiie. Yeesus hot kesaat tas tiise kanse profetsiie (net ploos etliche orer ti meyerste) teete sich in te letste taache in te selwich tsayt erfiile. (Matheus 24:33)

 Yaa. Ti kontitsyoone fon te welt un aach ti rechnunge woo sich uf ti piiplixe profetsiie xtaype, tsayche tas ti letste taache in 1914 aan kefang hon, im selwich yoer wii te Eyerst Welt Kriich aan kefang hot. Kuk tas neekst wiiteo fer se ferxteen wii ti ewënte uf te kans welt tsayche tas mer in te letste taache leepe:

 In 1914, hot Kot sayn Raych aan kefang im himel se rechiire. Eene fon te eyerste tinge woo tas Raych kemacht hot, waar Satanaas, te Taywel, un sayn temoone fom himel runer xmayse tas se ploos uf te eyert hantele khente. (Apokalipsis 12:7-12) Meyer khene siin tas Satanaas ti mënxe influentsiirt torich ti xlechte aanxtelunge fon te layt un ti xlechte tinge woo se mache. Es is weeche tas tas ti letste taache ‘xlime tsayte weyere, woo xweyer weyere fer um se keen’. (2 Timoteus 3:1)

 Fiile layt sin ëngstlich weeche tiise xlime tsayte. Tii tuun sich ketanke mache wayl siits aus tas ti layt net mee wise wii se mitsamer leepe khene. Etliche hon soo kaar pang tas ti mënxe eene ti anere fernichte khene.

 Uf ti aner sayt, kepts layt woo sin aach ëngstlich weeche ti kontitsyoone fon te welt, awer tii hon een hofnung fer te futuer. Tii sin sich sicher tas palt Kot sayn Raych in krayft fer ti propleeme fon te welt wech xafe. (Tanyël 2:44; Apokalipsis 21:3, 4) Tii tuun ketultich ti tsayt waarte wën Kot sayn ferxpreche erfiilt, un tii fine troost in Yeesus sayn wërter: “Weer pis tsum ën aus halt, wërt keret.” (Matheus 24:13; Mikeyas 7:7)