Yaa. In te Piipel trefe mer pewaysunge aan tas es een Kot kept. Ti Piipel tuut uns aan muute klaape in Kot ëntwikele un net plint klaape aan was ti relichyoone in lërne, awer “unser kraft fer triwer noo se tenke” un unser “ferxtëntnis” penutse. (Romanos 12:1; 1 João 5:20) Kuk ti neekste phunkte fer triwer noo se tenke woo sich aan ti Piipel hale:

•   Ti pewaysung tas tas Uniwërs orkanisiirt is un tas es leepe kept tsaycht tas es een Kriatoer kept. Ti Piipel saat: “Natiirlich is yeete haus fon yemant kemacht kep, awer waars Kot woo ales kemacht hot.” (Hebreus 3:4) Opwool iwer tas tenke keweenlich is, tuun fiile xtutiirte layt tas kuut aan nëme. a

•   Wii mënxe, hon mer te natiirliche wunx fer ti petaytung fom leepe se ferxteen. Aach wën mer unser kanse fisix neetichkheete fersoriche, hon mer imer noch tiise wunx. Tas macht teel fon was ti Piipel nënt wii ‘kaystlich neetichkheet’, too is te wunx tepay fer Kot khëne un tee aan peete. (Mateus 5:3; Revelação [Apocalipse] 4:11) Tiise kaystlich neetichkheet se hon, petayt net ploos tas Kot eksistiirt, awer tas tee aach een liipliche Kriatoer is woo wil tas mer tiise neetichkheet fersoriche sole. — Mateus 4:4.

•   Piiplixe profetsiie mit fiile kleenichkheete sin hunerte yoore tefoer kexrip woer un hon sich kenau in ale kleenichkheete erfiilt. Tas tsaycht tas tii net fon een mënxlich kwel khom sin. 2 Pedro 1:21.

•   Ti piiplixe xrayper hate een sientiifix khëntnis woo ti layt fon sayne taache net hate. Tsum payxpiil, in te friirixe tsayte hon fiile layt keklaapt tas ti Eyert uf een tier kextitst weyer wii een elefant, een wiltxwayn orer een oks. Awer ti Piipel saat tas Kot ‘ti Eyert aan niks traan hëngt’. (Jó 26:7) Kraat soo, tuut ti Piipel ti Eyert wii “runt” orer een “khuuchel” richtich pexraype. (Isaías 40:22, fuus noot) Fiile layt klaape tas ti ausleyung woo peser xtimt fer ti khëntnis woo se in foer raus hate, is tas ti piiplixe xrayper tiise informatsyoone fon Kot kriit hon.

•   Ploos ti Piipel kept ti antworte fer fiile xweyere frooche. Wën een person net ti richtich antwort kriit, khan se klaape tas es khee Kot kept. Tsum payxpiil: Wën Kot soo liiplich un alemechtich is, warom tuun soo fiil eelent un xlechtichkheet in te welt pasiire? Warom tuut ti relichyoon ofts mool ti layt influensiire fer tas xlechtes mache xtats fer tas kuutes? — Tito 1:16