Es is net Kot woo macht tas natuer unklike pasiire, awer toch macht eyer sich ketanke mit tii woo petrof sin. Kot sayn Raych tuut klaych wech xafe al ti tinge woo xwiirichkheete pringe, tepay ti natuer unklike. Foerlaywich, treest Kot tii woo tas mit mache. (2 Korinter 1:3)

•  Warom khene mer uns sicher sin tas ti natuer unklike net een xtroof fon Kot sin?

•  Sin ti natuer unklike een pewaysung tas mer in te letste taache leepe?

•  Wii helft Kot tii woo natuer unklike mit kemacht hon?

•  Khene ti piiplixe aanreete uns helfe foer perayt sin fer een natuer unklik?

•  Piiplixe wërse woo treeste khene tii woo natuer unklike mit kemacht hon

 Ti Piipel tsaycht tas Kot ti kraft fon te natuer xon penutst hot fer sayn faynte um pringe, awer ti natuer unklike sin kans anerste wii tas.

•   Ti natuer unklike mache wee un pringe ale sorte layt um. Uf te aner sayt, wën Kot ti kraft fon te natuer penutst hot, hot eyer ploos ti xlechter fernicht. Tsum payxpiil, wën Kot ti xtete fon Sotooma un Komoora fernicht hot, hot eyer Lot, woo een kuute man waar, un sayn tswaay tochtere kexitst. (Xeenesis 19:29, 30) Kot hot ti layt sayn hërtse kesiin un hot ploos ti xlechte layt um keprung. (Xeenesis 18:23-32; 1 Samuël 16:7)

•   Eep een natuer unklik pasiirt, wëre ti layt ofts weenich orer kaar net pekhant kemacht. Awer Kot hot ti xlechte layt imer aan kesaat eep eyer ti kraft fon te natuer keeche tëne penutst hot. Soo, weer Yeehoowa keheert hot, khont sich fon te fernichtung rete. (Xeenesis 7:1-5; Matheus 24:38, 39)

•   Ti mënxe hon selwer ti xult fon etliche natuer unklike. Warom? Wayl se tuun ti natuer fernichte; tuun paue in pletse woo eyertxutere orer iwerxwëmunge pasiire, orer woo es een xroo weter kept. (Apokalipsis 11:18) Ma khan net Kot ti xult kepe weeche ti xlechte ëntxlise woo ti mënxe mache. (Xpriiche 19:3)

 Yawool, ti profetsiie fon te Piipel tsayche tas natuer unklike pasiire teete torich tas “ën fon tiise sisteem”, orer “ti letste taache”. (Matheus 24:3; 2 Timoteus 3:1) Tsum payxpiil, Yeesus hot iwer unser tsayt kexproch: “Es wërt hungernoot kepe un eyertxutere uf een plats noom aner.” (Matheus 24:7) Klaych, tuut Kot ales was eelent uf te eyert pringt wech xafe, too tepay ti natuer unklike. (Apokalipsis 21:3, 4)

•   Kot treest tii woo natuer unklike mit kemacht hon torich ti Piipel. Sayn Wort lost uns sicher tas eyer khimert sich mit uns un wërt traurich wën mer layte. (Isayas 63:9; 1 Pheeter 5:6, 7) Ti Piipel pexraypt aach ti tsayt woo khee mee natuer unklike pasiire tuun. (Lees “ Piiplixe wërse woo treeste khene tii woo natuer unklike mit kemacht hon”.)

•   Kot helft tii woo natuer unklike mit kemacht hon torich sayn tiiner. Kot sayn tiiner uf te eyert mache Yeesus sayn payxpiil noo, un Kot penutst tii fer ti anere helfe. Es waar xon foer raus kesaat tas Yeesus “ti ferprochne hërtse” un “tii woo prile”, treeste teet. (Isayas 61:1, 2) Hayt se taach, xtrenge sich Kot sayn tiiner aan fer tas selwiche mache. (Yoohan 13:15)

   Kot penutst aach sayn tiiner fer praktix hilef kepe fer tii woo natuer unklike mit kemacht hon. (Aphostele sayn Kexicht 11:28-30; Kalater 6:10)

 Yaa. Opwool ti Piipel net een hilefs puuch is fer uns foer perayte fer een natuer unklik, kept tii uns aanreete woo uns helfe khene. Kuk phaar payxpiile:

•   Pleen was tuu mache khenst wën een unklik pasiire tuut. “Ti kluuch persoon siit ti kefoer un ferxtekelt sich”, saat ti Piipel. (Xpriiche 22:3) Es weyer kuut foer pleene was tuu mache khanst wën een unklik pasiire tuut. Too tepay is een emerxëns kit fërtich lose un mit tayn familye ap mache woo sich aan trefe wën soo was pasiirt.

•   Kep mee weyert fer tayn leepe wii fer materyaalixe tinge. Ti Piipel saat: “Meyer hon niks uf te welt keprung, un meyer khene aach niks faart nëme.” (1 Timoteus 6:7, 8) Meyer mise wilich sin fer unser haus un aychentum im xtich lose fer unser leepe rete. Es is kuut uns erinere tas unser leepe hot mee weyert wii kwalkee materyaalix tings. (Matheus 6:25)