Ti Piipel xprecht ploos een mool iwich tatuagem in Lewiitikus 19:28, woo saat: “Aach khee tatuagem aan aych mache.” Kot hot tas kesets fer te friirix Israël kep wayl tee wolt tas tii solte net sin wii tas folek woo iwer iir rom kewoont hot woo ti naame un simpole fon iire keeter uf iire haut kemolt hon. (Teuteronoomyum 14:2) Ale tëm tiise kesets kep is woer fer Israël un net fer ti kriste, is es kuut tenke aan was tiise oryentiirung sich traan halt.

Thërfe ti kriste tatuagem mache?

 Tiise piiplixe wërse khene tich helfe tich kuut iwerleye iwich tiise sache:

•   “Sole ti fraae . . . sich aanmeesich ferxmike.” (1 Timoteus 2:9) Tiise oryentiirung kilt aach fer ti mëner. Een krist sol sich net hin tuun fer iwermeesich acht kriin un aach net anere pelaytiche mit sayn ausiin.

•   Etliche mache tatuagem fer tsayche weer tii wërklich sin orer fer selepstëntich sin. Un anere wole tsayche tas se khene mache mit iire khërper was se kraat wole. Awer ti Piipel muut ti kriste uf: “Tas teyer ayer khërper foer xtelt wii een lepeentich opfer, woo haylich is un woo Kot kefalt. Un soo tuut teyer een haylich tiinst mache mit ayre ferxtant.” (Romaaner 12:1) Wën aan ‘tayne ferxtant’ fer raus kriin warom tuu een tatuagem mache wilst. Wën tas is ploos fer een moote noo keen orer fer tsayche tas tuu teel machst in een krup, erinert tich tas ti tatuagem playpt fer imer, un tuu khanst tich xpeeter peroye. Unersuuche warom tuu tas mache wilst khan tich helfe een kuut ëntxlus mache. (Xpriiche 4:7)

•   “Tëm flaysicher sayn pleen kepe sicher kuute resultaate. Awer al tii woo net uf phase kepe sicher aarm.” (Xpriiche 21:5) Oft mools ti ëntxlus fon tatuagem mache wërt kemacht oone kuut traan tenke wii tas te mënx sayn leepe fer een lang tsayt petrefe khan in een sache wii ferheltnis mit anere un aarwayt. Un noch, tatuagem wech mache lose, khan tayer sin un wee tuun. Ti unersuuchunge — un te kroose numer fon klinikas woo tatuagens wech mache — tsayche tas fiil layt woo tatuagem kemacht hon, hon sich xpeeter peroyt.