Ti Piipel saat tas es kuut is, un soo kaar neetich is, sich selepst liipe in een aan kemeesich aat. Tiise sort liip petayt sich selepst uf phase, respekt iwer sich selepst hon un erkhëne tas tuu weyert host. (Matheus 10:31) Awer ti Piipel saat tas meyer mise ti richtich itee hon iwer sich selepst liipe un net ploos in uns selepst tenke.

Weer mise mer te eyerst liipe?

1.   Te eyerst, mise mer Kot liipe. Ti Piipel lërnt tas ti kreeste kepoot is: “Liip Yeehoowa, tayn Kot, mit tayn kans hërts”. (Markus 12:28-30; Teuteronoomyum 6:5)

2.   Tas tsweete kreeste is: “liip tayn neekste soo wii tich selepst”. (Markus 12:31; Lewiitikus 19:18)

3.   Opwool ti Piipel khee spetsiifix kepoot hot iwer sich selepst liipe, tii saat: “liip tayn neekste soo wii tich selepst”. Tas tsaycht tas es is normaal un kuut, selepst liip un respekt iwer sich selepst hon, awer in een aan kemeesich aat.

Weer hot Yeesus te eyerst keliipt?

 Yeesus hot ketsaycht wii Kot liipe, wii ti anere liipe un wii uns selepst liipe in een aan kemeesich aat. Un tee hot sayn tisipele uf kemuut fer sayn payxpiil noo mache. (Yoohan 13:34, 35)

1.   Im eyerst plats, Yeesus hot Yeehoowa Kot keliipt un sich aan kextrengt fer Tëm sayn wile mache. Yeesus hot kesaat: “Tas ti welt wise sol tas ich tëm Fater liipe, mache ich kraat soo wii te Fater mich kexikt hot”. (Yoohan 14:31)

2.   Yeesus hot ti anere keliipt. Tee hot tas pewayst wii eyer ti layt uf kephast hot un soo kaar sayn leepe fer tëne kep hot. (Matheus 20:28)

3.   Tee hot aach sich selepst keliipt in een aan kemeesich aat, wayl eyer tsayt kehool hot fer se ruue, ese, un fer mit sayn tisipele un anere persoone woo khente aach tisipele wëre, plaype. (Markus 6:31, 32; Lukas 5:29; Yoohan 2:1, 2; 12:2)

Ti anere im eyerst plats liipe petayt tas tuu tayn tikniteet ferliire tuust orer net froo wërst?

 Nee, wayl meyer sin noo Kot sayn pilt kemacht kep, un te haupst kwaliteet woo Kot hot is te liip oone ekoiismus. (Xeenesis 1:27; 1 Yoohan 4:8) Tas petayt tas meyer sin kemacht kep fer ti anere liipe. Es is wichtich sich selepst liipe, awer meyer kepe frooe wën mer Kot im eyerst plats liipe un unser acht hale in kuute tings fer ti anere mache. Tes weeche tuut ti Piipel saan: “Kepe pringt mee frooheet wii se kriin.” (Aphostele sayn kexicht 20:35)

 Hayt se taach, fiil layt saan tas ti frooheet khomt fon sayne aychne interese im eyerst plats tuun. Fer tiise layt, ‘ti anere liipe’ is ketrokt kep fer ‘sich selepst liipe’. Awer hayt wise mer tas tii woo mee kesunt un froo sin, sin tii woo tiise kluuch aanreet fon te Piipel in sayn leepe penutse tuun, woo saat: “Tas yeete eene net ploos aan sayn aychne nuts tenkt, awer aan te nuts fon te aner.” (1 Korinter 10:24)