Khan ich troost in te Piipel fine?
Ti antwort fon te Piipel
Yaa. (Romaaner 15:4) Kuk etliche tekste fon te Piipel woo hon xon fiile layt ketreest woo xwiirichkheete am mit mache sin un woo sich emotsyonaal miit xpiire.
In tiise artikel
Wëns tuu xwiirichkheete mit machst
Psalm 23:4: “Opwool ich torich tas taal fon tiif tunkelheet keen, kriin ich khee pang, Wayls tuu pay meer pist.”
Tiise wersikel petayt: Wëns tuu fer Kot peete tuust un tëm sayn oryentiirung suuchst in tëm sayn wort, Ti Piipel, Khanst tuu ti propleeme mit koraaj aus hale.
Filiper 4:13: “Fer ales sin ich xtark torich tee woo meer kraft kept.”
Tiise wersikel petayt: Kot khan tich ti neetich kraft kepe fer mit yeete xwiirichkheet um keen.
Wëns tuu yemant woos tuu liipst im toot ferloer host
Eklesyastes 9:5,10: “Ti toote wise kaar niks mee. . .wayl es kept khee aarwayt, khee pleen, khee khëntnis, khee kluucheet im kraap.”
Tiise wersikel petayt: Tii woo kextorep sin tuun niks mee xpiire un tuun uns khee xaate mache. Tëne sayn ketanke sin ferkang.
Aphostele sayn Kexicht 24:15: “Es een ufxtaye fom toot kept.”
Tiise wersikel petayt: Kot khan ti keliipte woo kextorep sin noch mool tsum leepe pringe.
Wëns tuu tich iwermeesich xultich xpiirst
Psalm 86:5: “Wayl tuu, oo Yeehoowa, a pist kuut un imer fërtich fer se fertsaye; Tayn leaale liip fer al woo tich aan ruufe is mechtich kroos.”
Tiise wersikel petayt: Kot fertsayt tii woo sich wërklich peroyt hon fon sayn friirixe sinte un woo pextimt sin ti feeler net mee mache.
Psalm 103:12: “Soo wayt wii ti sun sayn ufkang fon te sun sayn unerkang is, Soo wayt hot eyer unser feeler fon uns wech ketuun.”
Tiise wersikel petayt: Wën Kot uns fertsayt hot, tuut tee unser sinte wayt fon uns wech xmayse. Tee tuut unser sinte net imer noch mool foer pringe fer uns xultner nëne orer uns xtroofe.
Wëns tuu traurich pist
Psalm 31:7: “Tuu siist mayn xwiirichkheet; Tuu khënst mayn tiif ëngstlichkheet.”
Tiise wersikel petayt: Kot khënt tayn xwiirichkheet woos tuu am mit mache pist, tee ferxteet tayn tiife inerliche xpiirunge — aach wën ti anere tich net ferxteen.
Psalm 34:18: “Yeehoowa is ticht pay tëne woo een ferprochne hërts hon, eyer ret tii woo een fertriktne kayst hon.”
Tiise wersikel petayt: Kot ferxprecht tich helfe wëns tuu traurich pist, Tee khan tich ti kraft kepe woos tuu must hon fer ti phayn aus hale.
Wëns tuu krank pist
Psalm 41:3: “Yeehoowa tuut iim unerxtitse. . .torich sayn krankheet.”
Tiise wersikel petayt: Wëns tuu een xlim krankheet am mit mache pist, khan Kot fer tich friit, kraft, persewerans un kluucheet kepe fer kuute ëntxluse mache.
Isayas 33:24: “Khee pewooner tuut saan: ‘Ich sin krank.’”
Tiise wersikel petayt: Kot ferxprecht es khomt een taach woo ale layt een kuut kesuntheet hon.
Wëns tuu strës un ëngstlichkheete mit machst
Psalm 94:19: “Wii ti ëngstlichkheete mich unertrikt hon, host tuu mich ketreest un peruycht.”
Tiise wersikel petayt: Wën mer Kot sayn hilef ferlange wii mer strës am mit mache sin, khan tee uns helfe in ruu plaype.
1 Pheeter 5:7: ‘Wëreft ayre kanse soriche uf tëm, wayl Eyer aych uf phast.’
Tiise wersikel petayt: Kot siit unser xwiirichkheet un khimert sich mit uns. Tee tuut uns uf muute fer tëm peete un fer tëm saan was uns ketanke macht.
Wën kriiche tich petrefe tuun
Psalm 46:9: “Tee tuut ti kriiche in te kans eyert tsum ën pringe.”
Tiise wersikel petayt: Kot sayn Raych tuut klaych ti kanse kriiche tsum ën pringe.
Psalm 37:11, 29: “Ti tsaame tuun ti eyert kriin un tii tuun sich mechtich fraye in tëm iwermeesich friit. . . . Ti kerechte tuun ti eyert kriin, un tuun fer imer too truf woone.”
Tiise wersikel petayt: Kuute layt tuun in friit fer imer uf te eyert leepe.
Wëns tuu tich ketanke machst iwer te futuer
Yeeremias 29:11: “‘Wayl ich wees kans kenau was ich fer aych pleene’, saat Yeehoowa. ‘Ich wil tas teyer friit hot, net unklik. Ich wil aych een futuer un een hofnung kepe.’”
Tiise wersikel petayt: Kot lost sicher tas sayn folek wërt een wunerlich futuer kriin.
Apokalipsis 21:4: “Tee tuut yeete treene fon tëne sayn aue ap trokne, un es kept kheen toot mee, kheen traurichkheet, kheen krayxe un kheen phayn. Ti friirixe tinge sin xon rom kang.”
Tiise wersikel petayt: Kot ferxprecht tas tee ti kanse xlechte tinge woo mer hayt siin un mit mache tsum ën pringt.
a Yeehoowa is te naame fon Kot. (Psalm 83:18) Kuk te artikel “Weer is Yeehoowa? Warom is tëm sayn naame soo wichtich?”
Fiilaycht tuust tuu aach kërn hon
ANERE ARTIKELE
Troost fer tii woo trauer mit mache
Wën yemant woo mer liipe xtërpt, khene mer xpiire tas nimant unser phayn ferxteet. Awer Kot ferxteet un tee khan uns hilef kepe.
WICHTICHE PIIPLIXE INLËRNUNGE
Warom lost Kot ti traurichkheet pasiire?
Fiil tuun sich frooe warom soo fiil wuut un traurichkheet uf ti wëlt is. Ti Piipel këpt uns ti antwort woo uns treest un tsufriite lost.
PIIPLIXE INLËRNUNGE
Tuu unser khurs fon ti Piipel khëne
Mach een khurs fon te Piipel woo niks khost mit een persoonlich leerer.