Fiil woo tas frooe sin layt woo selepst xlimes mit kemacht hon; tii suuche net ploos antworte, awer aach troost. Fer anere, te Holokaust is ti kreest mënxlich xlechtichkheet un, tes weeche, fine se es xweer aan Kot klaape.

 Was ti layt mëne: Es is ferkheert frooe warom Kot te Holokaust pasiire kelos hot.

 Was ti Piipel saat: Soo kaar mënxe mit een xtarke klaape hon xon kefroot warom Kot ti xlechtichkheet pasiire lost. Tsum payxpiil, te profeet Hapakuk hot Kot kefroot: “Warom lost tuu mich soo fiil xlechtichkheet siin? Un warom erlaupst tuu ti unkerechtichkheet? Ich sin um keringelt mit kewaltichkheet; too is xtrayt un khëmpfe iweraal.” (Hapakuk 1:3, Bíblia na Linguagem de Hoje) Kot is net pees kewoer mit Hapakuk. Xtats tas, hot eyer kemacht tas tëm sayn frooche in ti Piipel xteen tas ale layt tas leese khene.

 Was ti layt mëne: Kot khimert sich net wën ti mënxe layte.

 Was ti Piipel saat: Kot hast ti xlechtichkheet un ti eelent woo too mit khomt. (Xpriiche 6:16-19) In Noee sayn taache, Kot “sayn hërts is traurich kep” weeche ti kewaltichkheet woos uf ti kans eyert kep hot. (Xeenesis 6:5, 6) Sicher, is Kot aach aarich traurich kewoer mit ales was pasiirt is im Holokaust. (Malakias 3:6)

 Was ti layt mëne: Te Holokaust waar fer Kot ti yuute xtroofe.

 Was ti Piipel saat: Es is woer tas Kot kelos hot tas Yeruusalem fernicht kewoer is torich ti romaaner im eyerste yoer hunert. (Matheus 23:37–24:2) Awer, fon tat aan, hot Kot net mee een folek raus kesuucht fer xitse orer fer xtroofe. Fer Kot, “is khee unerxiit unich yuute un woo khee yuute sin”. (Romaaner 10:12, Nova Versão Internacional)

 Was ti layt mëne: Wëns wërklich een liipliche un mechtiche Kot kepe teet, hët eyer net kelos te Holokaust pasiire.

 Was ti Piipel saat: Opwool Kot net ti xmërts pringt, lost eyer tas es als mool, fer een tsayt, pasiirt. (Tyako 1:13; 5:11)

 Kot hot te Holokaust pasiire kelos weeche te selwiche motiiw woo tee lost tas es eelent un xwiirichkheet kept: fer frooche antworte woo kextelt sin woer een lang tsayt foer heyer. Ti Piipel tsaycht kans klaar tas es is te Taywel, un net Kot, woo ti welt rechiirt. (Lukas 4:1, 2, 6; Yoohan 12:31) Kuk in ti Piipel 2 wichtiche phunkte woo khene helfe ferxteen warom Kot te Holokaust pasiire kelos hot.

1.   Kot hot ti mënxe kemacht mit fray wile. Kot hot tsu ti eyerste mënxe, Aatam un Ewa, kesaat was eyer fon tëne waarte teet. Awer, tee hot se net ketswung tëm aan heere. Tii hon raus kesuucht aus sich selepst pextime was richtich orer ferkheert weyer. Un tas hot ale sorte xwiirichkheete un eelent keprung fer ti mënxe. (Xeenesis 2:17; 3:6; Romaaner 5:12) Fon tat aan, hot ti mënxheet fiil aus kehal weeche iire xlechte ëntxluse. Tas is soo wii een puuch, woo iwich te klaape fon te yuute xprecht, saat: “Een kroos teel fon te eelent woo hayt tsu taach pasiirt khomt fon te xlecht aat wii mer te fray wile penutse woo Kot uns kep hot.” Xtats Kot wech nëme ti mënxe sayn fray wile, hot eyer tëne tsayt kep tas se khente aus sich selepst mit iire propleeme um keen un se tsu recht xtele.

2.   Kot khan un wërt tsurik mache ale xlechtes was pasiirt is im Holokaust. Kot ferxprecht uf ruufe fom toot milyoone mënxe woo kextorep sin — soo kaar tii woo im Holokaust um khom sin. Tee wërt aach tii woo te Holokaust iwerleept hon sayn trauriche ketanke un phayn am ën mache. (Isaiias 65:17; Aphostele sayn Kexicht 24:15) Kot liipt ti mënxheet un tas is een karantii tas eyer sayn ferxpreche erfiile wërt. (Yoohan 3:16)

 Fiil woo te Holokaust iwerleept hon, hon sayne klaape xtark kehal un hon een opjetiiw im leepe kefun, wayl se ferxtan hon warom Kot lost pasiire ti xlechtichkheet un wii tee wil mit tas ales am ën mache.