Yeesus is kextorep tas ti mënxe khente fon sayn sinte fertsayt wëre un tas eewiche leepe kriin. (Romaaner 6:23; Ëfeser 1:7) Yeesus sayn toot hot aach pewayst tas een mënx khent leaal tsu Kot plaype aach wën eyer xlime proope mit macht. (Hepreeyer 4:15)

 Kuk wii te toot fon ploos eene man tas ales meechlich mache khont.

1.   Yeesus is kextorep tas mer “ti fertsayung fon unsere sinte” kriin khente. (Koloser 1:14)

    Te eyerste man Aatam is perfekt kemacht kep, oone sint. Awer eyer hot raus kesuucht Kot net aan heere. Aatam sayn unfolichkheet, orer sayn sint, hot sayn nookhomer fiil petrof. Ti Piipel leet aus: “Torich ti unfolichkheet fon eene mënx, sin fiile mënxe tsu sinter kemacht kep.” (Romaaner 5:19)

    Yeesus waar aach perfekt, awer tee hot nii kesint. Tes weeche, khont eyer wii ‘een opfer sin woo unsere sinte tekt’. (1 Yoohan 2:2) Soo wii ti unfolichkheet fon Aatam ti mënxheet mit te sint aan kextoch hot, soo aach, tuut Yeesus sayn toot te flek fon te sint wech xafe fon ale woo klaape aan tëm hon.

    Meyer khene saan tas Aatam ti mënxe fer ti sint ferkhaaft hot. Un Yeesus, wayl eyer fraywilich fer uns kextorep is, hot ti mënxe fer sich kekhaaft. Tes weeche, “wën yemant een sint macht, hon mer een helfer pay te Fater: Yeesus Kristus, eene kerechte”. (1 Yoohan 2:1)

2.   Yeesus is kextorep “tas yeete eene woo aan tëm klaapt net fernicht wërt, awer eewiche leepe kriit”. (Yoohan 3:16)

    Aatam is kemacht kep fer fer imer leepe, awer wayl eyer kesint hot, is eyer um khom. Torich Aatam, ‘is ti sint in te welt khom, un torich ti sint te toot, soo hot sich te toot tsu ale mënxe ferprayt, wayl se al kesint hate’. (Romaaner 5:12)

    Anerste wii Aatam, hot Yeesus sayn toot net ploos te flek fon te sint wech kexaft, awer hot aach ti sentëns fom toot fermacht fer ale woo aan tëm klaape. Ti Piipel tuut tas in khortse wërter aus leye: “Soo wii ti sint mit te toot rechiirt hot, soo aach, teet ti unfertiint kuutheet torich ti kerechtichkheet rechiire un tsum eewiche leepe nëme, torich Yeesus Kristus, unser Hër.” (Romaaner 5:21)

    Es is woer tas, hayt, tuun ti mënxe net lang leepe. Awer Kot lost uns sicher tas eyer tas eewiche leepe fer ti kerechte mënxe kepe tuut un ti toote wiiter tsum leepe pringe tuut, tas se aach nutse fon Yeesus sayn toot kriin khene. (Psalm 37:29; 1 Korinter 15:22)

3.   Yeesus “hot aan keheert pis tsum toot”, un soo, hot eyer pewayst tas een mënx khan troy tsu Kot plaype een tuun ti proop orer xwiirichkheet. (Filiper 2:8)

    Aatam hat een perfekt khërper un ferxtant. Awer tee waar ekoiistix un hot Kot net aan keheert, wayl eyer wolt etwas hon woo tëm net keheert hot. (Xeenesis 2:16, 17; 3:6) Xpeeter, Satanaas, te haupst faynt fon Kot, hot kesaat tas khee mënx Kot aan heere teet, hauptseechlich wën sayn leepe ins kefoer weyer. Wën yemant Kot aan heere teet, teet eyer tas mache ploos weeche ekoiistixe interese. (Yoop 2:4) Awer Yeesus, een perfekt mënx, hot Kot aan keheert un is wayter leaal keplip, aach wën eyer in een xreklich aat um keprung kep is. (Hepreeyer 7:26) Tas hot ëntlich pewayst tas was te Taywel kesaat hat een lii is. Yeesus hot pewayst tas een mënx khan troy tsu Kot plaype een tuun ti proop orer xwiirichkheet woo eyer mit macht.

Frooche iwer Yeesus sayn toot

•   Warom must Yeesus layte un xtërpe fer ti mënxe rete? Warom hot Kot net aynfach ti sentëns fom toot fermacht?

   Kot sayn kesets saat tas ‘te loon woo ti sint petsaalt te toot is’. (Romaaner 6:23) Aatam hot tiise kesets kekhënt wayl Kot tëm aus keleet hot tas, wën eyer unfolich weyer, mist eyer xtërpe. (Xeenesis 3:3) Wii Aatam kesint hot, hot Kot sayn wort in kehal, wayl Kot “net liie khan”. (Titus 1:2) Aatam hot net ploos ti sint fer sayn nookhomer ferprayt, awer aach te konsekwëns fon te sint: te toot.

   Opwool ti mënxe weeche ti sint te toot fertiine, hot Kot fer tëne “te raychtum fon sayn unfertiint kuutheet” ketsaycht. (Ëfeser 1:7) Kot hot sayn Soon uf ti eyert kexikt tas Yeesus sayn perfekt khërper fer ti mënxe opfere khent. Soo, hot Kot ti mënxe fon te sint fray kemacht, un tas hot tëm sayn kroos kerechtichkheet un parmhërtslichkheet ketsaycht.

•   Wan is Yeesus kextorep?

   Yeesus is unkefeer in te “noynte xtun” kextorep, noo te unerkang fon te sun. Tas waar unkefeer tray uer noo mitaach im taach fom yiitixe Oostre. (Markus 15:33-37) In unser motërne kalënter, is tiise taach am fraytaach, 1^te april fom yoer 33.

•   Woo is Yeesus kextorep?

   Yeesus is um keprung kep in “een plats woo Xëtelplats kenënt is — in te hepreeyx xprooch heest tas Kolkotha”. (Yoohan 19:17, 18) In Yeesus sayn taache, waar tiise plats “aus te tooer fon te xtat” fon Yeruusalem kewees. (Hepreeyer 13:12) Fiilaycht, waar tiise plats ufm een përich kewees, wayl ti Piipel saat tas etliche layt “fon wayt” kesiin hon wii Yeesus um keprung kep is. (Markus 15:40) Awer es is net meechlich kenau saan woo tas plats Kolkotha wërklich waar.

•   Wii is Yeesus kextorep?

   Fiile layt klaape tas Yeesus aan een krayts um keprung kep is. Awer ti Piipel saat tas Yeesus “hot unser sinte in sayne aychne khërper kenom, aan te phoste”. (1 Pheeter 2:24) Ti piiplixe xrayper hon tswaay wërter penutst fer se xpreche iwer tas opjëkt woo penutst kep is fer Yeesus um pringe: staurós un xýlon. Fiile unersuucher hon ferxtan tas tiise wërter hon se tuun mit een phoste, orer een xtik hols woo richt xteen playpt.

•   Wii sole mer aan Yeesus sayn toot aan tenke?

   In te nacht woo tas yiitixe Oostre yeetes yoer kefayert kep is, hot Yeesus een keweenlich fëst kemacht un hot fer sayn nookeener kesaat: “Macht tas imer fer aan mich aan se tenke.” (1 Korinter 11:24) Weeniche xtune xpeeter, is Yeesus um keprung kep.

   Etliche piiplixe xrayper hon Yeesus mit tëm lam ferklaycht woo im yiitixe Oostre kexlacht kep is. (1 Korinter 5:7) Soo wii tas yiitixe Oostre ti israeliiter erinert hot tas se fon te sklaaweray fray kemacht kep sin, tuut tas Aantenke fon Yeesus sayn toot ti kriste erinere tas se fon te sint un fom toot fray kemacht kep sin. Tas yiitixe Oostre is am 14^te Nisan yeetes yoer kefayert kep, tëm noo te moont kalënter. Tes weeche, hon ti eyerste kriste tas Aantenke fon Yeesus sayn toot yeetes yoer kefayert.

   Yeetes yoer, im taach woo in unser kalënter mit te 14^te Nisan xtimt, tuun milyoone layt uf te kans welt Yeesus sayn toot aan tenke.