Tas wort “seel” in te Piipel is een iwersetsung fom hepreeyx wort néfesh, woo petayt “een kriatuer woo luft tsiit”, un fom kreekix wort psykhé, woo petayt “een lepeentich kriatuer”. a Soo, is ti seel tas kriatuer im kanse, un net etwas im khërper woo am leepe playpt noom toot. Kuk wii ti Piipel tsaycht tas ti mënxlich seel is te mënx im kanse:

•   Wii Yeehoowa Kot te eyerste man, Aatam, kemacht hot, saat ti Piipel tas “te man is een lepeentich seel kep”. (Xeenesis 2:7, Almeida, revista e atualizada) Aatam hat net een seel kriit; tee is een lepeentich seel kewoer, tas is, een mënx.

•   Ti Piipel saat tas ti seel khan ese, xafe, hunger xpiire un kesetse aan heere. (Lewiitikus 7:20, Trinitária; Lewiitikus 23:30; Teuteronoomyum 12:20; Romaaner 13:1, Almeida, revista e corrigida) Tiise aktiwiteete hon se tuun mim mënx im kanse.

Is ti seel unxtërplich?

 Nee, ti seel xtërpt. Fiil piiplixe wersikele xpreche iwich ti seel wii etwas woo xtërpt. Kuk etliche payxpiile:

•   “Ti seel woo sint, wërt xtërpe.” (Esekyël 18:4, 20, Almeida, revista e corrigida)

•   Im friirix Israël, ti xtroof fer tii woo xlime feeler kemacht hon waar tas ti seel is “ap kexnit woer”. (Eeksotus 12:15, 19; Lewiitikus 7:20, 21, 27; 19:8, Trinitária) Tas petayt tas te mënx ‘teet toot kemacht wëre’. (Eeksotus 31:14, Trinitária)

•   Etliche piiplixe wersikele penutse tas wort “toot seel” fer xpreche iwich een khërper fon eene tooter. (Lewiitikus 21:11; Nuumere 6:6) Ale tëm fiil iwersetsunge fon te Piipel penutse ti wërter “toote khërper” orer “een tooter” in tiise wersikele, im hepreeyx, tas wort néfesh, orer “seel”, wërt hiir penutst.

“Seel” khan “leepe” petayte

 In te Piipel, als mool is tas wort “seel” tas selwiche wii “leepe”. In Yoop 33:22, wërt tas hepreeyx wort “seel” (néfesh) penutst xtats tas wort “leepe”. Uf te selwich aat, tsaych ti Piipel tas yemant khan sayn seel, orer leepe, ins kefoer xtele, orer ferliire. (Eeksotus 4:19; Richter 9:17; Filiper 2:30)

 Tas wort “seel” iwersetse wii leepe heleft uns ferxteen ti tekste woo xpreche iwich ti seel aus yemant “raus keen”. (Xeenesis 35:18; Almeida, revista e atualizada) Tas soo aus leye tsaycht tas te mënx sayn leepe ticht am ën is. In etliche iwersetsunge, tiise wërter in Xeenesis 35:18 wëre iwersetst wii “aus keen”. (Luther Piipel, fon 1912, in taytx.)

Fon woo khomt te klaape fon een unxtërplich seel?

 Kristliche relichyoone woo klaape aan een unxtërplich seel hale iire inlërnunge net aan ti Piipel, awer aan ti friirix kreekix filosofii. Ti Enciclopédia Barsa saat: “Ti kristliche filoosofer hon sich kextaypt mee aan ti inlërnunge fon Platoon wii aan ti hepreeyxe inlërnunge. . . . Ti Piipel lërnt net in tas te mënx is in tswaay orer tray teele ferteelt — [kayst, seel un khërper]. In te Piipel, tas wort seel xprecht net iwich een teel fom mënx, awer iwich te mënx im kanse, wii een lepeentich kriatuer.”

 Kot nëmt net aan fermixe sayn inlërnunge mit mënxlich filosofii, soo wii te klaape iwich een unxtërplich seel. Awer ti Piipel saat austriiklich: “Phast uf tas nimant aych wii sklaaw nëmt torich filosofii un leyere inlërnunge, woo sich aan mënxliche kewoonheete hale.” (Koloser 2:8)