In ti Piipel, tas wort woo iwersetst wërt “ufxtaye fom toot” khomt fom kreekixe wort anástasis, woo petayt “uf xtaye” orer “wiiter uf xtele”. In tas ufxtaye fom toot, khomt te mënx tsurik te selwiche persoon woo eyer foer sayne toot waar. (1 Korinter 15:12, 13)

 In ti Hepreeyx Xrifte, woo aach pekhant sin wii te Alte Testament, siit mer net tas wort “ufxtaye”, awer ti inlërnung is toch tat. Tsum payxpiil, Kot hot ferxproch torich te profeet Oseyas: “Fon te hant fom kraap, mache ich se fray; fom toot, wëre ich se tsurik hoole.” (Oseyas 13:14; Yoop 14:13-15; Isaiias 26:19; Tanyël 12:2, 13)

 Woo sole tii woo ufxtaye leepe? Etliche mënxe wëre uf keruuft fom toot fer im himel leepe un mit Yeesus rechiire. (2 Korinter 5:1; Apokalipsis 5:9, 10) Ti Piipel saat tas tas is ti “eyerste ufxtaye” un ti “ufxtaye . . . woo eente pasiire tuut”. Mit tiise wërter, khene mer ferxteen tas es noch een aner ufxtaye kept. (Apokalipsis 20:6; Filiper 3:11) Ti meyerste mënxe wëre fom toot uf keruuft in te tsweet ufxtaye fer uf ti Eyert leepe fer imer. (Psalm 37:29)

 Wii wëre ti layt uf keruuft? Kot hot fer Yeesus ti macht kept fer ti toote uf ruufe. (Yoohan 11:25) Yeesus wërt tsurik tsum leepe pringe al tii woo in ti kreepe sin, yeete eene mit sayn aychne itentiteet, personaliteet un erinerunge. (Yoohan 11:25) Tii woo uf keruuft wëre fer im himel leepe kriin een kaystliche khërper, un tii woo uf ti Eyert wëre leepe kriin een naye un kesunte mënxliche khërper. (Isaiias 33:24; 35:5, 6; 1 Korinter 15:42-44, 50)

 Weer wërt uf keruuft? Ti Piipel saat “tas es een ufxtaye fom toot kept fon te kerechte soo wii fon te unkerechte”. (Aphostele sayn Kexicht 24:15) Ti “kerechte” sin troye mënxe soo wii Noee, Sara un Apraham. (Xeenesis 6:9; Hepreeyer 11:11; Tyako 2:21) Pay ti “unkerechte”, sin tii woo net aan keheert hon Kot sayn oryentiirunge wayl se net ti keleechenheet kriit hate fer iwich iim lërne un tas aan wëne.

 Awer tii woo soo xlecht waare un wolte sich net ferënere, wëre net uf keruuft. Wën eene fon tiise xtërept, wërt tee fernicht fer imer, oone hofnung fer wiiter tsum leepe khome. (Matheus 23:33; Hepreeyer 10:26, 27)

 Wën wërt tas ufxtaye pasiire? Ti Piipel hot foer raus kesaat tas tas ufxtaye fer im himel leepe wërt pasiire in te tsayt woo kenënt is “Kristus sayn presens”, woo aan kefang hot in 1914. (1 Korinter 15:21-23) Tas ufxtaye fer tas leepe uf ti Eyert pasiirt in ti tsayt fon Yeesus sayn Tausent Yoore Rechiirung, wën ti Eyert tsu een paratiis kemacht wërt. (Lukas 23:43; Apokalipsis 20:6, 12, 13)

 Warom khene mer aan tas ufxtaye klaape? Ti Piipel xprecht iwich noyn ufxtaye woo pasiirt sin, woo pextimt sin fon layt woo tas kesiin hon. (1 Kheeniche 17:17-24; 2 Kheeniche 4:32-37; 13:20, 21; Lukas 7:11-17; 8:40-56; Yoohan 11:38-44; Aphostele sayn Kexicht 9:36-42; 20:7-12; 1 Korinter 15:3-6) Lasaro sayn ufxtaye waar anerste, wayl tee waar xon fier taache toot kewees, un Yeesus hot tiise wuner foer een kroose krup mënxe kemacht. (Yoohan 11:39, 42) Soo kaar sayn faynte khonte niks too keeche saan. Tes weeche, hon se kepleent Yeesus un Lasaro um pringe. (Yoohan 11:47, 53; 12:9-11)

  Ti Piipel tsaych tas Kot ti macht un ti wunx hot fer tsurik pringe tsum leepe ti woo kextorep sin. Tee khan fon ales sich erinere; tee heept uf in sayn ketanke yeete kleenichkheet fom mënx woo eyer torich sayn kroos macht wërt wiiter tsum leepe pringe. (Yoop 37:23; Matheus 10:30; Lukas 20:37, 38) Kot khan wiiter tsum leepe pringe, un tee wil tas mache! Ti Piipel saat tas Kot ‘ferlangre kriit fon te aarwayt fon sayn hënt’ wën se xprecht iwich tas ufxtaye im tsukhunft. (Yoop 14:15)

Was ti layt mëne iwich tas ufxtaye

 Was ti layt mëne: Tas ufxtaye is wiiter ti seel un te khërper samer setse.

 Was ti Piipel saat: Ti Piipel lërnt tas ti seel is te mënx im kanse un net een teel woo te toot iwer leept. (Xeenesis 2:7; Esekyël 18:4) Soo, is net ti seel un te khërper wiiter samer tuun, awer te mënx im kansem wërt nay kemacht.

 Was ti layt mëne: Etliche mënxe wëre wiiter uf keruuft un klaych wiiter fernicht.

 Was ti Piipel saat: Ti Piipel saat tas “tii woo xlechtes kemacht hon” wëre “ufxtaye fers kericht”. (Yoohan 5:29) Awer, tiise kericht halt sich aan was ti mënxe mache noo sayn ufxtaye, un net aan was se foer heyer kemacht hon. Yeesus saat: “Ti toote wëre Kot sayn xtim heere, un tii woo tee aan heere wëre leepe.” (Yoohan 5:25) Tii woo horiche un mache was se lërne noo sayn ufxtaye, kriin iire naame in kexrip ufm “rol fom leepe”. (Apokalipsis 20:12, 13)

 Was ti layt mëne: Te mënx woo uf keruuft wërt khomt tsurik mim selwiche khërper woo eyer hat eep eyer kextorep is.

 Was ti Piipel saat: Noo tëm toot, keet te mënx sayn khërper “wiiter tsurik tsum xtaap”, orer, ferkeet. (Eklesyastes 3:19, 20)