Aach wën yemant tenkt tas se tas recht hot fer winkans mache, tas keet keeche ti aanreet fon te Piipel woo saat: “Saa net: “Ich mache mit tëm tas selwiche woo eyer fer mich kemacht hot; ich tuun winkans keeche tëm mache.”” (Xpriiche 24:29, noote) Ti aanreete fon te Piipel tuun fiil layt helfe te wunx fer winkans mache kontroliire.

In tiise artikel siin mer:

•  Warom is es ferkheert winkans mache?

•  Wii tuut Kot tii woo xlechtes kemacht hon tsurik petsaale?

•  Wii khan ich te wunx fer winkans mache kontroliire?

•  Falxe kexichte iwer winkans

 Wën yemant tich pelayticht orer fertrislich kelos hot, is es natiirlich tas tuu wuutich playpst un hon wilst tas ti persoon petsaale tuut weeche was se kemacht hot. Awer fersuuche winkans mache xtimt net mit was ti Piipel saat. Warom net?

 Kot tuut net kërn hon wën ti mënxe fersuuche kerechtichkheet mit sayn aychne hënt mache. In te Piipel tuut Yeehoowa a Kot saan: “Ich sin tee woo xtrooft; Ich tuun es tsurik petsaale.” (Romaaner 12:19) Ti Piipel tuut ti persoon woo pelaytich kep is uf muute fersuuche tas tings in een friitlich aat resolwiire xtats winkans mache. (Romaaner 12:18) Awer wën tas propleem net in een friitlich aat resolwiire kepe khan? Orer wëns tuu xon ales kemacht host woos meechlich waar un noch soo host tuu net een kuut resultaat hin kriit? Ti Piipel saat tas meyer mise traue tas Yeehoowa ale unkerechtichkheet resolwiire tuut. (Psalm 42:10, 11)

 Foerlaywich, tuut Kot erlaupe tas ti mënxliche rechiirunge xtroofe kepe fer ti layt woo ferkheerte tings mache tuun. (Romaaner 13:1-4) Awer, in een khorts tsayt, tuut eyer kerechtichkheet mache keeche al tii woo xlechte tings mache tuun un tuut ti traurichkheet tsum ën pringe. (Isayas 11:4)

•   Tuu niks mache oone se tenke. (Xpriiche 17:27) Yemant woo etwas macht wën tee wuutich is, tuut oft mools sich peroye weeche was se kemacht hot. Awer, wën ti persoon tenkt eep se etwas mache tuut, es is tsiimlich sicher tas tii kuute entxlise mache tuut. (Xpriiche 29:11)

•   Fersuuch se wise warom ti persoon tas kemacht hot. (Xpriiche 18:13) Wëns tuu pelayticht kep is, froo tich: ‘Meecht es uersache kepe woo ich net wise woo kemacht hon tas ti persoon soo kehantelt hot? Meecht se mit fiil strës am um keen is? Orer meecht se tas kemacht hot oone se tenke?’ Als mool, khan es aus siin tas ti persoon uns ferkërn pelayticht hot, awer khan aach sin tas tii tas kemacht hot oone sayn wile.

 Falxes: Wayl ti Piipel saat tas es ferkheert is winkans mache, khene mer uns net weere wën yemant uns atakiire tuut.

 Woeres: Wën ti persoon atakiirt wërt, hot tii tas recht fer se weere orer ti hilef fon te autoriteete suuche. Awer ti Piipel saat tas imer wën es meechlich is, sole mer net in een wyolent aat um keen. (Xpriiche 17:14)