Wii hot Yeesus aus kesiin?
Ti antwort fon te Piipel
Nimant wees kenau wii Yeesus aus kesiin hot, wayl ti Piipel saat net kenau wii tee waar. Tas tsaycht tas wii tee aus kesiin hot net etwas wichtiches is. Awer ti Piipel kept een itee wii tee khan aus kesiin hon.
Kleenichkheete: Yeesus waar een yuute un is meechlich tas se sich keklaycht hot noo sayn mama sayn folek. (Hepreeyer 7:14) Soo wiis aus siit, waar Yeesus net fiil anerste wii ti anere, wayl een mool is eyer haymlich fon Kalileya tsu Yeruusalem kang un nimant hot tee erkhënt. (Yoohan 7:10, 11) Yeesus hot net fiil anerste aus kesiin wii sayn tisipele. Tes weeche, must Yuutas Iskariotes tsayche weyer Yeesus waar fer ti mëne woo tee fange wolte. — Matheus 26:47-49.
Hoer: Tsiimlich sicher hat Yeesus khee lange hoer wayl ti Piipel saat tas “fer een man lange hoer hon is een xant”. — 1 Korinter 11:14.
Paat: Yeesus hat een paat. Tee hat tas yiitixe kesets in kehalt woo saat tas ‘ti mëne solte net ti xpits fom paat ap mache.’ (Lewiitikus 19:27; Kalater 4:4) Un noch, ti Piipel xprecht aach iwich Yeesus sayne paat in een profetsii iwich ti eelent woo tee mit mache teet. — Isaiias 50:6.
Khërper: Ales tsaycht tas Yeesus waar een kraftiche man. Fer ti preetich aarwayt mache, is Yeesus fiil khilomeeter kelaaft. (Matheus 9:35) Tswaay mool is tee in te thempel kang un hot ti tixe um kexmis fon ti ferkhaufere woo tat waare. Een anerst mool, hot tee een paytx fon een xtrik kemacht un hot tas fii raus ketokt, fon tëne woo ferkhaaft hon im thempel. (Lukas 19:45, 46; Yoohan 2:14, 15) Een enciclopédia a saat: “Ti kanse Ewankeelye tsayche tas [Yeesus] xtark un kesunt waar.” — Wolum IV, apsats 884.
Kesicht austruk: Yeesus waar liiplich un hot sich kekhimert mit ti layt. Kans sicher, sayn kesicht austruk hot tas ketsaycht. (Matheus 11:28, 29) Ale sorte layt sin tsu iim kang fer ketreest un keholef wëre. (Lukas 5:12, 13; 7:37, 38). Soo kaar ti khiner waare kërn ticht pay Yeesus. — Matheus 19:13-15; Markus 9:35-37.
Ferkheerte itee iwich Yeesus sayn aus siin
Was etliche klaape: Yeesus mist apxtame fom afrikanix folek, wayl tas puuch fon Apokalipsis ferklaycht sayn hoer mit wol un sayn fiis mit “phuer khopfer.” — Apokalipsis 1:14, 15, Bíblia na Linguagem de Hoje.
Ti woerheet: Tas puuch Apokalipsis is kexrip in een simpoolix aat. (Apokalipsis 1:1) Tas puuch xraypt iwich Yeesus sayn hoer un fiis, net wii tee aus kesiin hat wii tee uf ti Eyert waar, awer iwich etliche kwaliteete woo Yeesus hët noo sayn uf xtayung fon toot. Apokalipsis 1:14 saat tas “Yeesus sayne khop un sayn hoer weere ways wii ways wol, wii xnee.” Tiise tekst tsaycht ti farp fon Yeesus sayn hoer un net ti sort hoer woo tee hat. Tiise ferklaychung tsaycht Yeesus wii een kluuche man, soo wii eltere mënxe, woo xon wayse hoer hon, ti meyerst tsayt sin. — Apokalipsis 3:14
Yeesus sayn fiis sin “ferklaycht mit fayne kopfer wën tee im oowe klënst”. (Apokalipsis 1:15) Sayn kesicht is “wii ti sun wën se in iire sayn kans kraft xaynt”. (Apokalipsis 1:16) Uf khee plats kept tas mënxe woo soo een sort farp hon. Tas is een simpoolix aat fer aus leyer tas noo Yeesus sayn uf xtayung fom toot, teet tee im licht woone woo ma net hin khomt, orer, woo nimant siin khan. — 1 Timoteus 6:16.
Was etliche klaape: Yeesus waar xwach un hot net fiiles aus kehal.
Ti woerheet: Yeesus waar xtark un koraajich. Tsum payxpiil, wii mëne mit wafer iim fange khom sin, hot tee sich mit koraaj pekhant kemacht. (Yoohan 18:4-8) Yeesus mist aach khërplich xtark kewees sin, wayl tee kexaft hot wii tsimerman, un tas is een xweer aarwayt. — Markus 6:3.
Tan, warom must Yeesus hilef hon fer sayne kwël phoste traan? Warom is tee kextorep eep ti anere mëne woo aach neewe iim waare kextorep sin? (Lukas 23:26; Yoohan 19:31-33) Khorts tsayt foer sayne toot, waar Yeesus fermaleyert un xwach. Tee hat ti kans nacht niks kexloof, weeche ti fiile soriche woo tee hat. (Lukas 22:42-44) Ti kans nacht lang, hot ti yuute tee xlecht pehantelt, un te anere taach moynts hon ti romaanixe soltaate Yeesus aarich ferkweelt. (Matheus 26:67, 68; Yoohan 19:1-3) Tas ales hot kemacht tas Yeesus eente kextorep is wii ti anere.
Was etliche klaape: Yeesus waar een ërnste un trauriche mënx.
Ti woerheet: Yeesus hot kenau ti kwaliteete fon sayne Fater, Yeehoowa, kexpiichelt, tee woo ti Piipel tsaycht wii een “frooe Kot”. (1 Timoteus 1:11; Yoohan 14:9) Yeesus hot soo kaar in kelërnt was ti layt mache miste fer froo sin. (Matheus 5:3-9; Lukas 11:28) Tas tsaycht tas Yeesus een frooe mënx waar, un sayn kesicht austruk hot tas ketsaycht.
a Titel fon enciclopédia: Cyclopedia of Biblical, Theological, and Ecclesiastical Literature, de McClintock e Strong.
Fiilaycht tuust tuu aach kërn hon
WICHTICHE PIIPLIXE INLËRNUNGE
Khëne mëyer sicher sin tas ti Piipel woer is?
Wën Kot te Autoer fon te Piipel is, tan mist tii anerste sin wii ti kanse anere piicher.
WEER SIN MEYER
Ferlang een pesuuch
Tuu ti antworte kriin fer tayn frooche iwer ti Piipel orer tuu mee iwer Yeehoowa sayn Tsayer wise.