Torich Yeesus sayn opfer, macht Kot fray, orer ret, ti mënxheet fon sint un fom toot. Ti Piipel saat tas Yeesus sayn pluut is wii een prays fer ti mënxheet fray khaafe. (Ëfeser 1:7; 1 Pheeter 1:18, 19) Tes weeche, wii Yeesus uf ti Eyert khom is, hot eyer kesaat tas eyer ‘sayn leepe kept wii een opfer fer fiile fray se khaafe’. (Matheus 20:28)

Warom waar neetich een ‘opfer fer fiil fray se khaafe’?

 Aatam, te eyerste man, waar perfekt. Tee hat khee sinte. Tee hët khene fer imer leepe. Awer tee hot ti oportuniteet ferloer wayl eyer raus kesuucht hot Kot net aan heere. (Xeenesis 3:17-19) Te sint is wii een feeler. Wii Aatam khiner hot, hon tii sayne feeler keërpt. (Romaaner 5:12) Tes weeche saat ti Piipel tas Aatam hot sayn khiner “ferkhaaft” wii sklaawe tsum sint un toot. (Romaaner 7:14) Khee eene fon Aatam sayn khiner khont tsurik kriin was tee ferloer hat, wayl se al imperfekt waare. (Psalm 49:7, 8)

 Soo, hon Aatam sayn nookhomer khee hofnung mee kehat. Awer Kot waar mitlaytich un hot se ketauert. (Yoohan 3:16) Toch noch, weeche sayn kerechtichkheet, khont Kot se net ploos fertsaye orer ti aue tsu mache fer Aatam sayn nookhomer sayn sinte, oone een richtiche motiiw. (Psalm 89:14; Romaaner 3:23-26) Kot liipt ti mënxe. Tes weeche, hot tee een kerechtich aat kefun fer fertsaye un soo kaar unser sinte aus mache. (Romaaner 5:6-8) Yeesus sayn fray khaaf opfer is tiise kerechtich aat.

Fray khaaf opfer — was ales tepay is

 In ti Piipel, ti wërter “fray khaaf opfer” hon tsu tuun mit tray teele:

1.   Etwas petsaale. (Nuumere 3:46, 47)

2.   Fray mache, orer tsurik khaafe. (Eeksotus 21:30)

3.   Hot tas selwiche weyert wii tas woo ma wil tsurik hon. a

 Kuk was tiise tray teele tsu tuun hon mit Yeesus Kristus sayn fray khaaf opfer.

1.   Etwas petsaale. Ti Piipel saat tas ti kriste sin “fer een prays kekhaaft” woer. (1 Korinter 6:20; 7:23) Te prays waar Yeesus sayn pluut, woo ‘mënxe fer Kot kekhaaft hot, fon yeete xtam, xprooch, folek un natsyoon”. (Apokalipsis 5:8, 9)

2.   Fray mache. Torich Yeesus sayn fray khaaf opfer, is es meechlich fray wëre fom sint. (1 Korinter 1:30; Koloser 1:14; Hepreeyer 9:15)

3.   Hot tas selwiche weyert. Yeesus sayn opfer hot kenau tas selwiche weyert wii tas perfekte mënxliche leepe woo Aatam ferloer hat. (1 Korinter 15:21, 22, 45, 46) Ti Piipel saat: “Wayl, soo wii torich ti unkeheersam fon eene mënx [Aatam], fiil mënxe sinter kemacht kep sin, soo wëre aach, torich ti keheersam fon ploos eene [Yeesus Kristus], fiil kerecht kemacht.” (Romaaner 5:19) Tiise tekst leet aus wii te toot fon eene eensiche man khan fray khaafe fiile sinter. Soo is Yeesus sayn opfer wii een “fray khaaf opfer mit tëm selwiche weyert”. Al woo mache was neetich is khene kriin ti nuts fon tiise opfer. (1 Timoteus 2:5, 6)