Was is Yeesus sayn khome?
Ti antwort fon te Piipel
Ti Piipel xprecht kans oft fon een tsayt im futuer wën te Kristus wërt khome fer ti layt uf ti Eyert richte. a Tsum payxpiil, Matheus 25:31-33 saat:
“Wën te Mënxe Soon in sayn hërlichkheet khomt, un ale engele mit tëm, tan tuut eyer sich uf sayn hërlich troon setse. Ale natsyoone wëre foer tëm kesamelt, un eyer tuut ti mënxe aus naner teele, soo wii te xeefer ti xeef fon te kaprite aus naner teelt. Un eyer tuut ti xeef uf sayn rechts sayt, awer ti kaprite uf sayn links sayt.”
Tiise tsayt fon richtung is een teel fon ti “kroos tripulatsyoon”, woo wërt anerste sin wii ales was xon pasiirt is in ti mënxheet sayn kexicht. Am ën fon te kroos tripulatsyoon, wërt khome te kriich fom Armaxeton. (Matheus 24:21; Apokalipsis 16:16) Kristus sayn faynte, kenënt kaprite in Matheus 25, “tuun tsu ti eewich fernichtung keen”. (2 Thesalooniker 1:9; Apokalipsis 19:11,15) Awer sayn troye tiiner, kenënt wii xeef, khene kriin tas “eewiche leepe”. (Matheus 25:46)
Wën wërt Yeesus khome?
Yeesus saat: “Nimant wees te taach un ti xtun.” (Matheus 24:36, 25:13) Awer tee hot kexproch iwich fiile tinge woo pasiire teete, woo weyere wii een “tsayche”, foer sayn khome sin. Tas heleft uns wise tas te taach ticht is. (Matheus 24:3, 7-14; Lukas 21:10, 11)
Khomt Kristus in eene kaystliche orer fisixe khërper?
Yeesus is uf keruuf woer fom toot mit een kaystliche khërper; soo wërt tee tsurik khome mit een kaystliche khërper, un net mit een fisixe khërper. (1 Korinter 15:45; 1 Pheeter 3:18) Tes weeche, hot tee kesaat tsu sayn aphostele te taach foer sayne toot: “Hatich wërt ti welt mich net mee siin.”(Yoohan 14:19)
Falxe foerxtelunge iwich Yeesus sayn khome
Etliche saan: Ti Piipel saat tas ti layt teete siin Yeesus “uf ti wolke khome”. Tas petayt tas Yeesus khomt in een aat tas ma tee siin khan. (Matheus 24:30)
Was woer is: Ti Piipel xprecht oft mools iwich wolke wii etwas woo ti layt net siin khene. (Lewiitikus 16:2; Nuumere 11:25; Teuteronoomyum 33:26) Tsum payxpiil, Kot hot kesaat tsu Mooses: “Ich khome tsu tich in een tunkel wolk.” (Eeksotus 19:9) Mooses hot Kot net kesiin mit sayn aychne aue. Kraat soo, wërt Yeesus “uf ti wolke khome”. Tas petayt tas ti layt wëre mërke tas tee khom is, ale tëm se tee net siin khene mit iire aychne aue.
Etliche saan: In Apokalipsis 1:7, ti wërter “yeete au tuut tas siin”, xpreche iwich Kristus sayn khome, un tiise wërter sole kenau soo ferxtan wëre.
Was woer is: Ti kreekixe wërter “au” un “siin” in te Piipel wëre net imer penutst mit tiise petaytung. Als mool petayte se etwas mërke orer ferxteen. b (Matheus 13:15; Lukas 19:42; Romaaner 15:21; Ëfeser 1:18) Ti Piipel saat tas Yeesus, noo sayn ufxtaye, is tee “woo im licht woont, woo ma net hin khomt, tee woo khee mënx . . . siin khan.” (1 Timoteus 6:16) Soo, ti wërter “yeete au tuut tas siin” petayt tas ale layt wëre wise tas Yeesus is tee woo fiirt Kot sayn richtung. (Matheus 24:30)
Etliche saan: Ti wërter in 2 Yoohan 7 tsayche tas Yeesus wërt in flayx khome.
Was woer is: Ti Piipel saat: “Wayl fiile hinerkeener hon sich uf ti welt ferprayt, tii woo net erkhëne tas Yeesus Kristus in flayx khom is.”
In aphostel Yoohan sayn taache, hon etliche net keklaapt tas Yeesus uf te eyert khom weyer in flayx wii een man. Tii waare kenënt Aknostiker. 2 Yoohan 7 is kexrip woer fer keeche xpreche tiise falx mënung.
a Ale tëm etliche layt penutse ti wërter “tsweete khome” orer “tsweete atwënt” fer xpreche iwich Yeesus sayn khome, awer tiise wërter xteen net in te Piipel.
b Kuk The New Thayer’s Greek-English Lexicon of the New Testament (Novo Léxico Grego-Inglês do Novo Testamento, de Thayer; 1981), sayte 451 un 470.
Fiilaycht tuust tuu aach kërn hon
FROOCHE IWER TI PIIPEL WOO KEANTWORT KEP SIN
Was is te Armaxeton?
Tas wort Armaxeton khomt ploos een mool in te Piipel foer. Awer ti kans Piipel xprecht iwer te kriich woo tas petayt.
FROOCHE IWER TI PIIPEL WOO KEANTWORT KEP SIN
Was is ti kroos tripulatsyoon?
Soo ti kenënt ‘profetsii fon te tsayt fon ën’ xprecht iwich ti kreeste xwiirichkheete woo ti mënxheet xon mit kemacht hot. Uf was khene mer waarte?
HAUPSTE INLËRNUNGE
Kot sayn Raych hot aan kefang tsu rechiire in 1914
Mee wii 2.600 yoore tsurik, hot Kot kemacht tas een mechtich kheenich een traam hët. Tiise traam, woo een profetsii waar, erfiilt sich hayt.
PIIPLIXE INLËRNUNGE
Tuu unser khurs fon ti Piipel khëne
Mach een khurs fon te Piipel woo niks khost mit een persoonlich leerer.