Yeesus hot troye mënxe keret wii eyer sayn leepe wii een opfer kep hot. (Matheus 20:28) Tes weeche, nënt ti Piipel Yeesus wii te “Reter fon te welt”. (1 Yoohan 4:14) Tii saat aach: “[Khee aner] khan uns rete, wayl es kept khee aner naame unichm himel woo mer khene retung fine.” (Aphostele sayn Kexicht 4:12)

 Yeesus hot ‘te toot kexmekt’ fer ale woo aan iim klaape. (Hepreeyer 2:9; Yoohan 3:16) Noo tas, ‘hot Kot tee fon te toote uf keruuft’ un Yeesus is tsurik noom himel kang wii een kaystlich persoon. (Aphostele sayn Kexicht 3:15) Tat, khan Yeesus “kans rete tii woo pay Kot khome torich [iim], wayl eyer imer leept un khan fer tëne aan hale”. (Hepreeyer 7:25)

Warom is es neetich tas Yeesus aan Kot fer uns aan halt?

 Wayl mer al sinter sin. (Romaaner 3:23) Weeche ti sint, khene mer net ticht pay Kot khome; un tiise sint nëmt tsum toot. (Romaaner 6:23) Awer Yeesus xaft wii een “atwokaat” fer tii woo klaape aan sayn opfer. (1 Yoohan 2:1, noote) Yeesus halt aan Kot aan fer tëne, tas Kot sol tëne sayn kepeete aan heere un iire sinte fertsaye. Tee macht tas torich sayn fray khaaf opfer. (Matheus 1:21; Romaaner 8:34) Kot nëmt aan was ferlangt is, wayl tas is tëm noo sayne wile. Kot hot Yeesus tsu te eyert kexicht, tas “ti welt solt torich tëm keret wëre”. (Yoohan 3:17)

Is es kenuuch ploos aan Yeesus klaape fer keret wëre?

 Nee. Es is woer tas mer mise aan Yeesus klaape fer keret wëre, awer tas is net ales. (Aphostele sayn Kexicht 16:30, 31) Ti Piipel saat: “Wii te khërper oone kayst toot is, soo is aach te klaape oone aarwayte toot.” (Tyako 2:26) Fer keret wëre, mise mer:

•   Lërne iwich Yeesus un sayne Fater, Yeehoowa. (Yoohan 17:3)

•   Unser klaape aan tëne ëntwikele. (Yoohan 12:44; 14:1)

•   Unser klaape pewayse torich aan heere tëne sayn kepoote. (Lukas 6:46; 1 Yoohan 2:17) Yeesus hot in kelërnt tas net al woo iim “Hër” ruufe, teete keret wëre; awer ploos tii “woo te wile fon [sayn] Fater im himel mache”. (Matheus 7:21)

•   Foran sich am klaape hale, ale tëm woos xwiirichkheete kept. Yeesus hot tas austriklich kesaat: “Weer pis tsum ën aus halt, wërt keret.” (Matheus 24:13)