“Fin in Yeehoowa ti kreest frayt, un tee tuut ti winxe fon tayn hërts erfiile.” (Psalm 37:4, Nay Welt Iwersetsung)

 “Fray tich im HËR, un eyer tuut tich kepe was tayn hërts winxt.” (Psalm 37:4, Almeida, rewisiirt un korikiirt uf portukeesix)

 Te psalmist muut Kot sayn tiiner uf frayt fine in een ticht fraayntxaft mit Tëm. Al woo een fraayntxaft mit Yeehoowa a Kot hon, khene sich sicher sin tas eyer tëne sayn ufrichtiche winxe erfiile tuut.

 “Fin in Yeehoowa ti kreest frayt.” Een referëns puuch hot tiise wërs soo iwersetst: “Fray tich im HËR tiine” orer “fray tich in was te HËR tich ferxprecht”. In anere wërter, sole mer ‘ti kreest frayt fine’ wën mer te woere Kot aan peete. (Psalm 37:4, noote) Warom khene mer tas saan?

 Tii woo Yeehoowa aan peete, tuun iwer tëm in te Piipel lërne un tenke soo wii tee. Tii wise tas es net kenuuch is ploos Kot khëne lërne, awer ferxteen aach tas es kluuch is tëm aan heere. Soo, hale se een sauwer kewise un tuun fiile feeler un xlechte ëntxluse aus wayche. (Xpriiche 3:5, 6) Tsum payxpiil, tii lose net tas ti wuut un te nayt sayn inerlich friit wech hoolt wën se siin ti uneerliche un kiiriche layt sich im leepe kuut kepe. (Psalm 37:1, 7-9) Kot sayn folk is froo wayl se wise tas klaych tuut eyer ale unkerechtichkheet tsum ën pringe un tuut sayn troye tiiner peloone. (Psalm 37:34) Tii sin aach aarich froo wayl se wise tas se Kot sayn aprowatsyoon hon. (Psalm 5:12; Xpriiche 27:11)

 “Tee tuut ti winxe fon tayn hërts erfiile.” Tiise wërter khene aach iwersetst wëre wii “tee tuut tayn kepeete antworte” orer “eyer tuut tich kepe was tuu tich te meyerst winxst”. Awer tas wil net saan tas Yeehoowa tuut kwalkee wunx erfiile. Soo wii een kuute papa, Yeehoowa wees was is tas pestes fer sayn khiner. Un noch, unser winxe un ti aat wii mer leepe sole xtime mit Kot sayn kepoote un sayn wile. (Xpriiche 28:9; Tyako 4:3; 1 Yoohan 5:14) Wën mer soo mache, khene mer uns pay te “Heerer fon kepeete” tichter xafe mit te sicherheet tas eyer uns heert. (Psalm 65:2; Matheus 21:22)

 Te Psalm 37 is fom kheenich Tawi, fom friirix Israël, uf kesetst kep. Tee hot tiise psalm in een akrostik aat kexrip, es wil saan, tëm noo ti ortnung fom alfapët. b

 Tawi hot fiile unkerechtichkheete mit kemacht. Tee must aus rayse fom kheenich Saul un fon anere woo tëm um pringe wolte. (2 Samuël 22:1) Noch soo, hot eyer imer kans fest uf sayn Kot ketraut. Tee wust tas, in te richtich tsayt, teet Yeehoowa ti xlechte tsurik petsaale. (Psalm 37:10, 11) Opwool es aus siit tas ti xlechte sich kuut im leepe kepe, tuun se tsum xlus net mee eksistiire, soo wii “kriines un friixes kraas”. (Psalm 37:2, 20, 35, 36)

 Te Psalm 37 macht een ferklaychung tswixich tii woo Kot sayn kepoote aan heere un tii woo tëne net aan heere. (Psalm 37:16, 17, 21, 22, 27, 28) Soo, tiise psalm heleft uns kluucheet kriin un een sort persoon sin woo Kot kefalt.

 Kuk tas khorts wiiteo fer se siin ti haupste phunkte fom puuch Psalme.