Ti xlecht sayt: Xay sin, khan tich tsurik hale kuute fraayntxafte mache un tich hinere kuute momënte leepe.

 Ti kuut sayt: Xay sin, is net imer was xlechtes. Xay sin, khan tich helfe tenke eps tuu etwas saast, ti tinge peser siin un ti anere heere.

 Ti pest sayt: Tuu prauchst net xay fer imer sin. Es is meechlich ti xaate woo tas pringt, kontroliire. Tiise artikel tuut tich tsayche wiis tuu tas mache khanst.

•  Was lost tich soo ëngstlich?

•  Was khanst tuu mache?

•  Was anere yunge saan

 Xay sin, khan tich ëngstlich lose wëns tuu tenkst tas tuu mit yemant perseenlich fertseele must. Tes weeche, khanst tuu tich wayt wech fon te anere xpiire, wii wëns tuu aleen in een tunkel tsimer weyerst. Tas khan tich noch ëngstlicher lose. Awer wëns tuu tas licht in tiise tsimer aan machst, tuust tuu siin tas ti tinge woo tich ëngstlich lose, net soo xreklich sin. Kuk mool tray payxpiile:

•   “Ich wees net was ich saan sol.”

   Fakt: Ti layt tuun hauptseechlich sich erinere, net fon was tuu kesaat host, awer wii se sich kexpiirt hon wii se mit tich fertseelt hon. Tuu khanst tayn angst triwer wech khome wëns tuu lërnst ti anere mit acht heere, un wëns tuu tich wërklich khimerst mit was se saan.

   Tenk traan: Was fer sort fraaynt host tuu te liipst? Yemant woo lost net noo se xpreche, orer yemant woo tich acht kept un tich kërn heert?

•   “Ti layt tuun tenke tas ich net interesant sin.”

   Fakt: Ti layt tuun imer een mënung iwer tich hon, een tuun eps tuu xay pist orer net. Soo, is es peser lose tas ti layt wise weer tuu wërklich pist. Tas is een aat fer tayn angst unich kontrol hale, un tas helft ti layt een peser mënung iwer tich ëntwikele.

   Tenk traan: Wëns tuu tenkst tas ti layt tuun tich net kërn hon, is es net tuu woo ti layt ferkheert am richte is?

•   “Wën ich was ferkheertes saan, tuun ich mich xeeme!”

   Fakt: Tas pasiirt mit ale kaar. Wëns tuu was ferkheertes saast, penuts tiise momënt fer se tsayche tas tuu erkhënst tas tuu net perfekt pist.

   Tenk traan: Finst tuu tich net kuut wëns tuu mit layt pist woo erkhëne tas se feeler mache?

 Wust tuu tas? Fiile tenke tas se net xay sin wayl se fiil torich mensagens fertseele tuun. Awer es is laychter woere fraayntxafte uf paue wën mer mit te layt perseenlich fertseele. Ti psikoolokin un spesyalistin in teknoloxii, Sherry Turkle, hot kexrip: “Es is ploos wën mer ti layt sayn kesicht siin un tëne sayn xtim heere tas mer wërklich uns mit tëne konektiire khene.” a

•   Ferklaych tich net mit te anere. Tuu prauchst net ti kans tsayt xpreche un xpiile. Awer tuu khanst fersuuche tich kontroliire fer net soo xay sin. Soo, tuust tuu peser mit tayn fraaynte um keen un kuute momënte mit leepe.

   “Fer een kuut kexpreech hon, prauchst tuu net soo fiil xpreche orer ti acht fon ale kaar tsu tich ruufe. Tuu khanst noore ti tsayt pite, tayn naame saan un etliche frooche mache.” — Alicia.

   Piiplix aanreet: “Yeete eene sol sayn aychne aktsyoone noo kuke. Un tan, tuut eyer sich fraye ploos weeche was eyer selepst kemacht hot, oone sich mit yemant aneres ferklayche.” (Kalater 6:4)

•   Lërn mit te anere. Peopach ti layt woo net xay sin un woo laycht mit te anere fertseele khene. Was mache se fer tas hin kriin? Was pariirt net soo kuut? Wii khanst tuu tëne sayn kuute apiliteete noo mache?

   “Lërn mit te layt woo laycht fraaynte mache khene. Peopach was se mache un was se saan wën se yemant khëne lërne.” — Aaron.

   Piiplix aanreet: “Soo wii ayse xlayft ayse, soo eene man xlayft sayn fraaynt.” (Xpriiche 27:17)

•   Mach frooche fer ti anere. Ti layt tuun kërn sayn mënung saan. Soo, frooche mache is een xeen aat fer kexpreeche aan fange. Un ti frooche lenke ti acht fer ti aner persoon, xtats fer tich.

   “Fer net soo ëngstlich wëre, tenk xon foer heyer was tuu saan wilst. Eeps tuu anere layt aan trefst, tenk aan etliche sache un frooche woos tuu mache khenst. Tas mache, tuut tich helfe net soo nerwees wëre wëns tuu naye layt khënst.” — Alana.

   Piiplix aanreet: “Suucht net ploos ayre aychne interese, awer aach ti interese fon te anere.” (Filiper 2:4)