Tswaay mool in ti woch, mache Yeehoowa sayn Tsayer fersamlunge in iire aanpeetung pletse, kenënt Raych Saale. Was pasiirt in tiise fersamlunge? Warom is es kuut fer tich uf tiise fersamlunge keen?

•  Was pasiirt in een Raych Saal?

•  Warom is es kuut uf ti fersamlunge keen?

•  Was anere yunge saan

 Te Raych Saal is een plats woo ti layt sich samele haupstseechlich fer lërne wii ti Piipel uns taach tsu taach helfe khan. Uf tiise fersamlunge, khanst tuu:

•   ti woerheet iwich Kot lërne.

•   ferxteen was hinich ti tinge is woo hayt se taach pasiire.

•   een pesere mënx wëre.

•    kuute froynte fine.

 Wust tuu? Ti pletse woo Yeehoowa sayn Tsayer sich samele sin kenënt Raych Saale wayl Kot sayn Raych is te sache woo te meyerst triwer kexprooch wërt. (Matheus 6:9, 10; 24:14; Lukas 4:43)

 Was tuu tat lërnst is aarich nutslich. Ti inlërnunge fon te Piipel woo in te fersamlunge fon Yeehoowa sayn Tsayer xtutiirt wëre tuun tich helfe ‘kluucheet kriin’. (Xpriiche 4:5) Tas petayt tas ti Piipel khan tich helfe kuute ëntxluse im leepe mache. Tii khan tich aach helfe antworte fine fer wichtiche frooche im leepe, soo wii:

•   Was fer tswek hot tas leepe?

•   Hot Kot ti xult tas mer layte?

•   Was pasiirt wën mer xtërpe?

 Tas sin etliche fon te sache woo triwer kereet wërt in te fersamlunge fon te woch ën:

•   Warom torich ti Piipel oryentiirt wëre?

•   Woo hilef fine in xlime tsayte?

•   Was tuut Kot sayn Raych yets xon fer uns mache?

 “Eene taach, is eene koleke fon ti xuul uf ti fersamlung khom. Tee hot sich mit mayn familye kesetst, un meyer hon iim unser piicher keporicht. Nochter, hot tee mich kesaat tas tee sich kewunert hot iwich ti layt sayn komentaare in ti fersamlung. Un hat aach kesaat tas sayn khërich hët net materyaal wii meyer fer xtutiire. — Brenda.

 Wust tuu? Too wërt khee kelt ferlangt im Raych Saal.

 Ti layt tuun tich uf muute. Ti Piipel saat tas eene motiiw fer ti kriste sich fersamele is ‘eene te anere uf muute.’ (Hepreeyer 10:24, 25) Mit layt sich samele woo Yeehoowa un ti anere sayn wunx foer sayn aychne wunx tuun macht tas leepe een pisye laychte in tiise ekoystix welt.

 “Ich khan “kaput” miit sin noo een lange taach, awer ti layt im Raych Saal mache tas es mich imer peser aan is. Tan wën ich hëm keen, xpiire ich mich froo un fërtich fer was te aner taach pringt.” — Elisa.

 Wust tuu? Tas kept mee wii 120 tausent kemaynte fon Yeehoowa sayn Tsayer woo sich samele in mee wii 60 tausent Raych Saale in ti kans welt. Unkefeer, 1.500 Raych Saale wëre kepaut yeetes yoer tas imer mee layt plats hon. a