Een unersuuchung hot ketsaycht tas, in Brasil, mee wii 90% fon te yunge tuun als mool kepeete mache, awer ploos 16% tuun yeete taach peete. Kewis tuun etliche fon tiise yunge sich frooe: ‘Meecht tas kepeet ploos een hilef sin fer mich peser fine orer macht tas wërklich was aus?’

•  Was is tas kepeet?

•  Meecht Kot uns wërklich heere?

•  Iwer was khan ich peete?

•  Was anere yunge saan

 Wën mer peete, tuun mer wërklich fertseele mit tëm Kriatoer fon ales. Tenk mool aan was tas petayt. Yeehoowa Kot is fiil peser wii ti mënxe in ales. Awer noch soo, is Eyer “net wayt fon yeete eene fon uns”. (Aphostele sayn Kexicht 17:27) Fer ti woerheet saan, macht uns ti Piipel tiise wunerlich inlaatung: “Khomt ticht tsu Kot, un Eyer khomt ticht tsu aych.” (Tyako 4:8)

 Wii khanst tuu ticht tsu Kot khome?

•   Torich tas kepeet — soo tuust tuu mit Kot xpreche.

•   Torich ti Piipel xtutiire — soo lost tuu Kot mit tich “xpreche”.

 Wëns tuu mit Kot fertseelst — torich tas kepeet un ti Piipel xtutiire — tuust tuu een xtark froyntxaft mit tëm paue.

 “Mit Yeehoowa fertseele — ti wichtichste persoon im Uniwërsum — is eene fon te kreeste eer woo een mënx khan hon.” — Jeremy

 “Iwer mayn tiifste xpiirunge mit Yeehoowa xpreche, xaft mich tichter pay tëm.” — Miranda

 Soo kaar wëns tuu aan Kot klaapst un tsu tëm peetst, fiilaycht finst tuu een pisye xweyer se klaape tas eyer wërklich tich heere tuut. Awer ti Piipel saat tas Yeehoowa te “Heerer fom kepeet is”. (Psalm 65:2) Ti Piipel tuut tich aach in laate: ‘Wëref tayn kanse soriche uf tëm.’ Warom? ‘Wayl eyer tich uf phast.’ (1^te Pheeter 5:7)

 Tenk mool noo: Hoolst tuu oft tsayt fer mit tayn tichter froynte fertseele? Tuu khanst tas selwiche mit Kot mache. Tuu imer mit tëm xpreche un penuts tëm sayn naame, Yeehoowa. (Psalm 86:5-7; 88:9) Ti Piipel laat uns in: “Tuut wayter peete.” (1^te Thesalooniker 5:17)

 “Tas kepeet is een kexpreech tswixich mich un mayn Fater im himel. Wën ich peete, khan ich mayn hërts kans uf mache.” — Moises

 “Ich tuun iwer tiife sache mit Yeehoowa fertseele, soo wii ich mit mayn muter orer een aner ticht froyntin mache.” — Karen

 Ti Piipel saat: “In yeete situatsyoon, ferlangt Kot sayn hilef torich peete, aan hale un tanke.” (Filiper 4:6)

 Tan, wil tas saan tas mer khene iwer unser propleeme peete? Yawool! Ti Piipel saat uns: “Xmays tayn last uf Yeehoowa, un tee tuut tich xtitse.” (Psalm 55:22)

 Sicher, in unser kepeete, sole mer net ploos iwer unser propleeme xpreche. Een yung meet, woo Chantelle heest, saat: “Tas weyer net een kuut froyntxaft wën ich tsu Yeehoowa peete teet ploos fer hilef ferlange. Ich tenke tas eyerst, mise mer tanke. Un ich hon fiiles fer se tanke.”

 Tenk mool noo: Weeche was fer tinge pist tuu petanklich? Khanst tuu aan tray tinge tenke weeche was tuu khanst fer Yeehoowa hayt tanke?

 “Soo kaar etwas keweenliches, wii een xeen pluum, khan uns uf rechne Yeehoowa tanke.” — Anita

 “Tenk aan etwas woo Kot kemacht hot woo tich ferwunert, orer in een tekst fon te Piipel woo krayft aan tayn hërts; tan, tank Yeehoowa weeche tas.” — Brian