FROOCHE FON TE YUNGE
Was saat tayn tsaych iwich tich?
Warom solst tuu tich ketanke mache iwich ti sort tsaych woos tuu aan tsiist? Wayl tayn tsaych fiil saat iwich tich. Host tuu xon ketacht aan was tayn tsaych iwich tich saat?
Tray kroose feeler in moote woo ti layt mache — un wii sich tefun wech hale
Feeler #1: Lose tas ti miitya raus suucht wiis tuu tich aan tsiie solst.
Een yunge meete woo Theresa heest saat: “Als mool siin ich soo fiil propakante iwich aate wii sich aan tsiie, tas oone mërke, fange ich aan tas xeen fine. Wën unser khop fol kemacht wërt mit pilter fon layt woo een moote noo keen khan tas xweer sin tas aach net mache.”
Tas sin net ploos ti meet woo sich lenke lose torich ti propakante. Een puuch woo xprecht iwich wii yunge puupe kroos tsiie a, saat: “Wën te sache moote is, lose ti puupe kraat sich influentsiire wii ti meet. Soo wii se uf ti welt khome, siin se tinge woo ekstra kemacht sin woer fer iir torich ti propakante.”
Tuu khanst tas peser mache: Ti Piipel saat: “Een eenfeliche mënx klaapt aan yeete wort, awer weer kluuch is, tenkt kuut traan eep eyer yeete xrit kept.” (Xpriiche 14:15) Tëm noo tiise tekst, must tuu lërne unersuuche was ti propakante wërklich saan. Tsum payxpiil, wën een propakante saat tas een sort tsaych tich sexy orer sensuaal aus siin macht, tan is peser frooe:
‘Weer fertiint wën ich tiise moote noo mache?’
‘Was teet tas tsaych iwich mayn personaliteet tsayche?’
‘Tsaycht tas wërklich weer ich sin un aan was ich klaape?’
Foerxlach: Een woch lang, kep aach tsu ti propakante, TV prokrame un anere sorte miitya woo iwich moote xpreche. Was fer sort leepe wole tii tich aan pringe? Mënst tuu tii wolte tich tenke mache tas tuu must tiise sort moote noo keen? Een yung meete woo Karen heest, saat: “Tas kept een kroos unertrikung fer tas mer sole een perfekt ausiin hon, perfekt tsaych aan tsiie un een perfekte khërper hon. Tii woo ti propakante mache wise tas. Tan, mache se fon te yunge iire haupste tsiil.”
Feeler #2: Tsaych fom moote aan tsiie ploos tas ti anere tich kuut aan nëme.
Eene yunge woo Manuel heest saat: “Wën een sort tsaych moote is, tan tuun se al tas sort tsaych aan tsiie. Weer tas net aan tsiit wërt tsurik kextos.” Ana, een yung meete, saat aach: “In woerheet, was wichtich is, is net ti moote noo keen awer kuut aan kenom wëre fon te anere.”
Tuu khanst tas peser mache: Ti Piipel saat: “Lost net tiise welt aych wayter mustere.” (Romaaner 12:2) Nëm tiise aanreet aan un kuk was tuu in te klayte xrank host. Froo tich:
‘Aan was tenke ich wën ich tsaych raus suuche?’
‘Is es wichtich fer mich tsaych aan tsiie woo fon een tayer marke is?’
‘Wil ich ti anere ferwunere mit te aat woo ich mich aan tsiie?’
Foerxlach: Tenk net tas ploos tswaay aate fer sich aan tsiie kept: in moote (kuut aus siin) orer ausm moote (xlecht aus siin). Xtats tas, tenk aan een trit aat: tsaycht tas tuu een persoon pist woo sich sicher is un selepst fertraung host, net een woo ti anere noo laaft. Wëns tuu mit tich selepst kuut xpiirst, machst tuu khee ketanke tas ti anere sole tich aan nëme.
Feeler #3: Soo fiil mee sexy aus siin, soo fiil peser is es.
Een yung meete woo heest Jennifer saat: “Sicher, als mool, hon ich lust fer aan tsiie tsaych woo mee sexy aus siit, xtant pisye khërtse, pisye ënge orer woo weeniche xtof hot.”
Tuu khanst tas peser mache: Ti Piipel saat: “Ayere xeenheet sol net aus weenich sin . . . awer sol te inerliche mënx fom hërts sin.” (1 Pheeter 3:3, 4) Tëm noo tiise aanreet, tenkst tuu tas weyer peser tas ti layt acht teete kepe tsu ti aat wiis tuu tich aan tsiist orer tas tuu een kuute persoon pist?
Foerxlach: Te peste moote xmuk is aanxtëntich sin. Is woer tas hayt se taach tiise wort aus ti moote is. Awer tenk mool:
Host tuu xon fertseelt mit yemant woo tsu fiil xprecht orer xprecht ti kans tsayt iwer sich selepst? Tas trauriche is tas te persoon kaar net mërkt tas ti layt wole sich wech hale fon iim.
Nimant wil ticht plaype fon yemant woo ploos iwich sich selepst xprecht. Tas pasiirt aach wën tayn tsaych tsu fiil acht tsu tich selepst pringt.
Weer sich aan tsiit oone moos, un net aanxtëntich, is wii te persoon woo ploos iwer sich selepst xprecht. Tas is als wiis tuu saan teest: “Kuk noo mich.” Un tas khan mache tas tuu unsicher un ekoiistix aus siist, orer ti ale tswaay. Ti layt khene tenke tas tuu wilst hon tas se sole noo tich kuke un sole tich acht kepe, ekaal was fer sort acht, im xtant, soo kaar in een ferkheert aat.
Xtats tas, weyer tas net peser sich aanxtëntich aan tsiie, soo teete ti layt niks ferkheertes iwer tich tenke? Een yung meete woo heest Monica saat: “Sich aanxtëntich aan tsiie petayt net tayn kroosmuter sayn tsaych aan tsiie. Tas tsaycht respëkt tsu anere un tsu tich selepst.”
a Puuch thitel: The Everything Guide to Raising Adolescent Boys.
