Te aphostel Phaul hot kexrip: “Wën ich tas richtiches mache wil, xteet in mich was xlecht is.” (Romaaner 7:21) Host tuu tich xon aach soo kexpiirt? Wën yaa, tiise artikel khan tich helfe keeche ti winxe fer was ferkheertes mache, khëmpfe.

•  Was tuu wise must

•  Was tuu mache khanst

•  Was anere yunge saan

 Ti influens fon te anere lost ti fersuuchunge xtërker. Ti Piipel saat tas “xlechte keselxafte fersaue kuute kewoonheete”. (1 Korinter 15:33) Was tayn xuul koleke mache un was tuu in te miitya siist, khan ferkheerte winxe in tayn hërts plantse un tich tsu te fersuuchung nëme, orer khan soo kaar tich uf hetse ‘tas folek noo keen fer tas xlechtes mache’. (Eeksotus 23:2)

 “Meyer al wole tas ti anere uns aan nëme. Awer wën mer net uf phase, khene mer aan fange ales mache soo wii tii, ploos fer tëne kefale.” — Jeremy.

 Tenk too triwer: Warom khan es xweyer sin een fersuuchung aus hale, wëns tuu tich tsu fiil ketanke machst mit was ti anere iwer tich tenke? (Xpriiche 29:25)

 Ti ëntxlus is: Los net tas ti influens fon tayn koleke tich nëmt etwas mache woos tuu weest ferkheert is.

 Tuu tayn klaape kuut ferxteen. Wëns tuu tich net sicher pist aan was tuu klaape solst, khanst tuu een pop in te anere sayn hënt wëre. Tes weeche, is es fiil peser ti aanreet fon te Piipel noo keen: “Pewayst ales; halt aych fest aan tas kuutes.” (1 Thesalooniker 5:21) Wëns tuu tayn klaape kuut ferxteest, wërts laychter fer tich aan tëne fest plaype, un tuu kriist mee kraft fer net in fersuuchung fale.

 Tenk too triwer: Warom klaapst tuu tas Kot aan heere, is kuut fer tich?

 “Wën ich mich fest hale aan was ich klaape un net in fersuuchung fale, mërke ich tas ti anere tuun mich mee respektiire.” — Kimberly.

Een payxpiil fon te Piipel: Tanyël. Wii eyer woerxaynlich noch yung waar, hot eyer ‘im hërts ëntxlos’ Kot sayn kesetse aan heere. (Tanyël 1:8)

 Tuu tayn xwacheete erkhëne. Ti Piipel xprecht iwer ti “yunge yoore”, een tsayt woo ti winxe fon te yunge aarich xtark sin. (2 Timoteus 2:22) In tiise winxe, sin net ploos tepay te wunx fer sëks mache, awer aach te wunx fer fon te anere aan kenom wëre un fer se leepe oone ti hilef fon te eltere, opwool te yung noch net fërtich fer tas is.

 Tenk too triwer: Ti Piipel saat tas “yeete eene is keproopt wën eyer fon sayn aychne wunx ketsoo un fersuucht is”. (Tyako 1:14) Was fer fersuuchung is fer tich ti xweyerste fer aus hale?

 “Wëns tuu tenkst aan te fersuuchunge woo fer tich ti xweyerste sin fer aus hale, say eerlich mit tich selepst. Mach unersuuchunge fer raus kriin wii tiise fersuuchunge aus hale, un xrayp praktixe itee uf woo tich helfe khene. Soo, wën eene fon tiise fersuuchunge noch mool khomt, tuust tuu wise wii tas aus hale.” — Sylvia.

 Een payxpiil fon te Piipel: Tawi. Als mool, hot eyer in fersuuchung kefal wii ti anere tëm unertrikt hon un wii eyer selepst ferkheerte winxe hat. Awer eyer hot mit sayn feeler kelërnt un hot sich aan kextrengt fer sich ferpesere. Tee hot fer Yeehoowa aan kehal: “Mach in mich een phuer hërts, oo Kot, un tuu in mich een naye un fest kayst.” (Psalm 51:10)

 Hal tich unich kontrol. Ti Piipel saat: “Los tich net fom xlechtes kewine.” (Romaaner 12:21) Was wil tas saan? Es is meechlich ti fersuuchunge aus hale. Tuu khanst raus suuche tas richtiches mache.

 Tenk too triwer: Wën een fersuuchung foer khomt, was khanst tuu mache fer tich unich kontrol hale un tas richtiches mache?

 “Ich tenke triwer noo aan wii ich mich xpiire tuun wën ich in fersuuchung fale. Tuun ich mich peser xpiire? Fiilaycht yaa, awer ploos fer een khorts tsayt. Tuun ich mich peser xpiire een tsayt tëm noo? Nee, ich tuun ploos mich xlechter xpiire. Is es te weyert tas mache? Sicher net!” — Sophia.

 Een payxpiil fon te Piipel: Phaul. Eyer hot erkhënt tas eyer ferkheerte winxe hat, awer eyer hot sich unich kontrol kehal. Tee hot kexrip: “Ich tuun mayn aychne khërper haue un mache tëm mayn sklaaw.” (1 Korinter 9:27)

 Ti ëntxlus is: Weer te kontrol hot, pist tuu. Wën een fersuuchung foer khomt, must tuu raus suuche fest plaype orer net.

 Eriner tich tas ti fersuuchunge khome un keen. Melissa, woo 20 yoore alt is, hot kesaat: “Fiile fersuuchunge waare aarich xweyer fer mich wii ich in te mitel xuul waar, awer yets, sin se xon ferkang un petrefe se mich net. Wën ich too traan tenke, kriin ich ti sicherheet tas ti fersuuchunge woo ich yets mit mache, tuun aach ferkeen. Un im futuer, wën ich tsurik kuke, tuun ich mërke wii kuut es fer mich waar se aus hale.”