“Ich hon xon fersuucht ti Piipel leese, awer ploos tenke wii een tik puuch tas is, ferliire ich ti lust!” — Briana, 15 yoer.

 Xpiirst tuu tich aach soo? Tan khan tiise artikel tich helfe!

•  Warom is es kuut ti Piipel leese?

•  Wii khan ich ti Piipel leese?

•  Was saan anere yunge

 Ferliirst tuu ti lust ploos aan tenke ti Piipel leese? Tas is laycht ferxteen warom tas es tich soo aan is. Sicher tenkst tuu tas ti Piipel mee wii tausente pleete hot, fol mit kanse kleene puuchxtaape un khee piltcher. Soo is tas kans xweer te telewisyoon un wiiteos in te internet neewe lose fer ti Piipel leese.

 Awer tenk mool: Wëns tuu een kroos alt khist fine teest, weyerst net naykerich fer kuke was tat trin is?

 Ti Piipel is een khist fol mit xatse. Tii hot fil xmuke woo tich helfe khene fer:

•   Kuute ëntxluse mache

•   Sich kuut mit te eltere kepe

•   Woere froynte fine

•   Strës iwerkhome

 Wii khan soo een alt puuch noch soo nutslich sin fer unser taache? Wayl “ti kans Xrift is kep woer torich Kot sayn kayst”. (2 Timoteus 3:16) Tas petayt tas ti piiplixe aan reete fon te pest Kwel khome.

 Eyerst: ti Piipel leese fom aanfang pis am ën. Tas heleft tich een itee hon iwich tas pexeet fon te Piipel. Tas kept fiile aate fer ti Piipel kans leese. Kuk tswaay payxpiile:

•    Tuu khanst ti 66 piicher leese in ti ray woo se khome: fon Xeenesis pis Apokalipsis.

•    Tuu khanst ti Piipel leese in ti ray wii ti kexichte pasiirt sin.

 Foerxlach: Te apêndice A7 fon te Tradução do Novo Mundo pringt een list in ti ray wii ti haupste tinge in Yeesus sayn leepe pasiirt sin.

 Tsweete: lees een xtik woo tsu tuun hot mit te propleem woos tuu mit machst. Tsum payxpiil:

•   Wilst tuu woere froynte hon? Lees Tawi un Yoonatan sayn kexicht. (1 Samuël, kapitele 18-20) Nochter, mach ti piiplix iipung “Como encontrar amigos leais” un mërk was tuu fon tiise kexicht lërne khanst.

•   Wils tuu kraft hon fer net noo kepe in een fersuuchung? Lees Yoosef sayn kexicht un kuk was tee kemacht hot. (Xeenesis, kapitel 39) Nochter, mach ti piiplix ipung “Como resistir a tentação, José — Parte 1” un “Acusado injustamente, José — Parte 2”, un kuk wii tëm sayn payxpiil tich helfe khan.

•   Wilst tuu wise wii tas kepeet tich helfe khan? Lees Neemias sayn kexicht. (Neemias, kapitel 2) Nochter, mach ti piiplix iipung “Deus respondeu sua oração” fer siin was tuu lërne khanst fon Neemias sayn payxpiil.

 Foerxlach: Wëns tuu ti Piipel leest, suuch tich een ruych plats tas tuu tich konsentriire khanst.

 Trite: lees een kexicht orer eene psalm un nochter kuk wii tich tas aan keet. Tsum payxpiil, tuu khanst tich frooe:

•    Warom wolt Yeehoowa tas tas solt in te Piipel xteen?

•    Was lërnt mich tas iwich Yeehoowa sayn personaliteet orer ti aat wii tee ti tinge macht?

•    Wii khan ich tas in mayn leepe penutse?

 Foerxlach: Xtel tich een tsiil! Suuch tich een taach raus fer aan fange ti Piipel leese.