Eene yunge woo Wiil heest, saat: “Ti Piipel leese im xtant khan tich net aarich kefale. Awer tas tuut ploos pasiire wëns tuu net wëst wii ti Piipel leese.”

 Wilst tuu raus kriin wii ti Piipel kërn leese? Tan, wërt tiise artikel tich helfe.

•  Kep leepe tsu tayn leesung

•  Unersuuch!

•  Was saan anere yunge

 Macht teel in tas kexicht. Kuk was tuu mache khanst:

1.   Suuch een kexicht raus woos tuu xtutiire wilst. Tuu khanst leese iwich een piiplix kexicht orer een xtik fon te Ewankeelyum. Tuu khanst aach raus suuche een fon te tramatisiirte Piipel leesunge woos kept im jw.org.

2.   Lees tas kexicht. Tuu khanst tas aleen leese, mit tayn familye orer mit froynte. Eene khan te fertseeler sin un ti anere khene ti persoone fom kexicht sin.

3.   Fersuuch een orer mee fon tiise foerxlache:

   •   Mool pilter orer mool tas kexicht in khestche in ti ray woo tas pasiirt is. Xrayp was am pasiire is in yeete khestche woos tuu kemoolt host.

   •   Mool een tiakram. Tsum payxpiil, wëns tuu leest iwich een troy persoon, peways wii sayn kwaliteete un aktsyoone tsu tuun hon mit ti seechne woo tee kriit hot.

   •   Fertseel tas kexicht als wën es een notisye weyer. Fertseel in anere aate wii tas pasiirt is. “Froo” ti haupste persoone un anere woo in tas kexicht sin wii tas pasiirt is.

   •   Tenk mool wii tas khent anerst am ën keen. Tenk aan een persoon woo een ferkheert ëntxlus kemacht hot un was hët khene pasiire wën tee hët een anert ëntxlus kemacht. Tsum payxpiil, tenk wii Pheeter kesaat hot tas eyer Yeesus net khëne teet. (Markus 14:66-72) Wii hët khene Pheeter peser um keen mit tiise unertrikung?

   •   Wëns tuu wilst noch mee kriatiiw sin, penuts een Piipel kexicht un xrayp een theaater xpiil iwich tas. Un tsaych was mer fon tas lërne khene. (Romaaner 15:4)

 Wëns tuu ti kleene teele fon tas kexicht unersuuchst, khanst tuu wunerliche tinge raus fine. Oft een orer tswaay wërter in een Piipel kexicht khene een kroos unerxiit mache!

 Tsum payxpiil, ferklaych Matheus 28:7 mit Markus 16:7.

•    Warom hot Markus pay ketuun ti kleenichkheet tas Yeesus hatich sich tsayche teet fer ti tisipele “un aach fer Pheeter”?

•  Foerxlach: Markus waar net too pay wën tas pasiirt is. Tas siit aus tas Pheeter iim tas fertseelt hot.

•  Tas wunerliches: Yeesus wolt Pheeter wiiter siin. Warom meecht tas Pheeter kefrayt hon? (Markus 14:66-72) Wii hot Yeesus Pheeter ketsaycht tas eyer een woere froynt weyer? Wii khanst tuu Yeesus noo mache un een woere froynt sin?

 Wëns tuu leepe tsu tayn leesung kepst un unersuuchst ti kleenichkheete in tas kexicht, tan wërt ti Piipel leesung fiil mee interesant.