WAS SAAT TI PIIPEL?

“Ratikaale Sports” — Is es am weyert sich ins kefoer xtele?

“HAYT SE TAACH KEPS IMER MEE LAYT WOO WOLE NET PLOOS TSU KUKE, AWER AACH TEEL MACHE IN SPORTS WII FAL XËRM, FELSER RUNER APTSELE, MIT KAIK RITXE UN MIT HAYFIX UNER XWEME.” — TSAYTUNG THE WILLOW GLEN RESIDENT.

WAS tiise tsaytung saat is tas es is imer mee keweenlich wërt sports mache woo kefeerlich sin. Tas kept imer mee layt woo sich interesiire in aktiwiteete wii: aus luftxife raus xpringe mit fal xërme, uf përiche mit ays kletere, paraklayte un BASE jumping a. Tas tsaych tas ti layt imer mee kefeerliche tinge liipe. Tii woo kërn snowboard, mountain bikes, skateboards un skates in-line mache, fersuuche imer noch uf heecher përiche un tiife felse khome. Tii wole imer wayter, xnële un heecher khome. Soo wii tas piichelche Time saat, ti ferkreesung fon tiise “kefeerliche aktiwiteete” — woo ti layt in kroos kefoer xtele — tsaycht te wunx fon milyoone woo wole siin wii wayt se khome khene, in aktiwiteete woo “samele kroos kefoer, khërplich apiliteet un toote angst, tas too mit te profitsyonaale atlëte un aach tii woo tas ploos als mool mache, xpiire khene tas se iwich iire aychne krense iwerkhom sin.”

Awer ti ferkreesung fon tiise kefeerliche ferkniichunge hot een hooche prays. Yeetes mool kepts mee layt woo sich wee mache in keweenliche sports, wayl se tas ausferxeemt traype. In Nort Amërika, im yoerkang 1997, hot sich aarich ferkreest ti numer layt woo muste in te emerxëns kenom wëre wayl se sich fermaleert hon. In skateboarding, hots 33% mee kep; in snowboarding, 31%; un aan felse in te hee kraple, 20%. In anere kefeerliche sports, is te resultaat noch xlimer weeche ti kroose numer layt woo um khom sin. Tii woo tiise sports mache, wise tas es kefeerlich is. Een fraa, woo ratikaal skii macht, saat: “Ti ketanke iwich te toot sin imer in mayne khop.” Eene profitsyonaal snowboarder hot tas in khortse wërter kesaat: “Wëns tuu tich net wee machst, is wayls tuu tich net kenuuch aan kextrengt host.”

Soo, mit ales was mer keleest hon, wii sol een krist tiise aktiwiteet aan siin? Wii khan ti Piipel uns helfe raus suuche ep mer wole orer net tiise sports mache? Ferxteen tas fer Kot tas leepe haylich is, khan uns helfe tiise frooche antworte.

Was Kot iwichs leepe tenkt

Ti Piipel saat tas Yeehoowa “is ti kwel fom leepe”. (Psalm 36:9) Tee hot net ploos ti mënxheet kemacht, awer hot uns aach ales kep was mer prayche fer tas leepe hale. (Psalm 139:14; Aphostele sayn Kexicht 14:16, 17; 17:24-28) Soo is es richtich ferxteen tas tee waart tas mer sole uf phase was tee uns mit soo een kroos kuutheet kep hot.

Ti kesetse un oryentiirunge woo tee fer te friirix Israël kep hot, helfe uns tas ferxteen. In Mooses sayn Kesets xteet tas yeete eene mist ales mache fer ti anere sayn leepe xitse. Wën yemant tas net mache teet, un een persoon teet um khome, tan hët tee pluut xult. Tsum payxpiil, wën yemant sich een haus paue teet woo een terase hët, mist tee rom trom een kalënter orer een kleen mauer mache. Wën tas net kemacht teet wëre, un yemant teet runer fale un xtërpe, tan hët ti familye pluut xult. (Teuteronoomyum 22:8) Wën een xtiir xtose teet un een mënx teet um khome, hët te hër fom xtiir khee xult. Awer, wën tee wist tas te xtiir pees weyer, un teet xtose, un teet tee net in xpërte, tan wën te xtiir aan yemant keengt, hët te hër pluut xult un must um kepracht wëre. (Eeksotus 21:28, 29) Wayl tas leepe soo fiil weyert hot fer Yeehoowa, tsaycht sayn Kesets te kroose respëkt fer tas leepe hale un xitse.

Kot sayn troye tiiner hon aach ferxtan tas tiise oryentiirunge tsu tuun hon mit sich in kefoer xtele. Een kexicht iwich Tawi xprecht iwich sayne wunx fer waser fon te sistërn fon Petleheem trinke. In tiise tsayt, hon ti filisteer tiise xtat sich iwernom. Wii Tawi iwich sayne wunx kexproch hot, hon tray fon sayn xtarke kriicher in te akampament fon te filisteer rin kang, hon waser raus ketsoo fon te sistërn woo am tooer fon Petleheem waar, un hon es Tawi hin kenom. Was hot Tawi kemacht? Tee wolt tas waser net trinke. Tee hots aus kexut. Tee saat: “Weeche respëkt tsu mayn Kot, teet ich nii mools tas mache! Wii khent ich tas pluut fon tiise mëner trinke, woo sayn leepe ins kefoer kextelt hon? Wayl tii hon sayn leepe ins kefoer kextelt fer tas waser pringe.” (1 Kroonike 11:17-19) Tawi khont net aan nëme een leepe in kefoer xtele fer sayn aychne winxe erfiile.

Yeesus hot tas selwich kemacht wii, in een wisyoon, te Taywel iim kesaat hot tee selt sich runer xmayse hooch fom thempel fer mool siin ep ti engele iim xitse teet tas eyer sich net wee mache teet. Yeesus hot keantwort: “Tuu Yeehoowa, tayn Kot, net in proop xtele.” (Matheus 4:5-7) Soo, hon Tawi un Yeesus ferxtan tas es ferkheert weyer foer Yeehoowa sayn aue tas leepe uneetich in kefoer xtele.

Wën mer aan tiise payxpiile tenke, im xtant frooe mer uns: “Wii khene mer wise wën een sport kefeerlich orer ratikaal wërt? Wayl soo kaar een sport woo net kefeerlich is khan kefeerlich wëre wën mer khee moos hon un traype tas tsu wayt. Wii khan mer tan wise wii wayt keen?”

Is es am weyert sich in kefoer xtele?

Sich kuut iwerleye heleft uns ti antwort fine. Tsum payxpiil, meyer khene uns frooe: “Wii fiil unfal sin xon pasiirt in tiise sport? Sin ich in keiipt un hon ekipamënte fer mich xitse tas ich mich net wee mache? Orer wën een ekipamënt net funtsyoniire teet, meecht ich mich ploos een pisye ferxrame, orer khent was xlimes pasiire un soo kaar um khome?”

Wën een woere krist, ploos fer sich ferkniiche, sayn leepe in kefoer xtelt, tas khan sayn fraayntxaft mit Yeehoowa fersaue, un mache tas eyer khee priwilëj in te kemaynt kriit. (1 Timoteus 3:2, 8-10; 4:12; Titus 2:6-8) Soo is es klaar tas wën een krist sich een sport raus suucht, mus eyer in te ketanke hale tas tas leepe haylich is fer Kot.

[Noote]