Hofnung — macht se wërklich een unerxiit?

DANIEL waar ploos 10 yoer alt, awer tee hat xon fer een yoer keeche te kreeps kekhëmpft. Sayn toktere un layt woo tichter pay tëm waare hate xon sayn hofnung ferloer... awer Daniel net. Tee hat klaape tas eyer kroos wakse teet, een unersuuchunger weyer, un tas eene taach teet eyer helfe te kreeps heele. Tee waar hoflich am waarte te pesuuch fon eene tokter woo spesyalist waar aan tëm sayn sort kreeps. Awer, wën te taach khom is, praucht te spesyalist sayn pesuuch ap saan weeche tas xlechte weter. Daniel is oone muut kep. Fer tas eyerste mool, waar eyer net mee froo mit tëm leepe. In phaar taache is eyer um khom.

Een aarwayter woo kranke layt uf phast, hot Daniel sayn kexicht fertseelt. Tee hot xtutiirt wii hofnung hon — orer net hon — khan ti kesuntheet petrefe. Im xtant, host tuu xon eenliche kexichte keheert. Tsum payxpiil, iwer een elter persoon woo neekst am xtërpe is, awer woo waart etwas mit kroose wunx — fiilaycht te pesuuch fon yemant woo eyer liipt, orer een ekstra taach. Klaych wii te pesuuch orer te ekstra taach rom keen, khomt tee um. Was hot tëm lepeentich kehal? Meecht ti hofnung soo xtark sin wii etliche layt mëne?

Yeete taach tuun mee kesunt unersuuchunger saan tas hoflich sin, hofnung hon, un anere positiiwe emotsyoone xpiire, mache een kroos unerxiit aan te mënxe sayn leepe un kesunt. Awer net al tenke soo. Welche unersuuchunger saan tas se sin ploos ufkeprungne kexichte, woo net mit te syens xtime. Tii tuun rechter tenke tas fiisixe krankheete pasiire ploos weeche fiisixe uersache.

Tswayfele hon iwer wii wichtich ti hofnung is, is net etwas nayes. Xon tausente yoore tsurik, hon se fer te kreekix filoosofer Aristooteles kefroot was ti hofnung waar; tee hot keantwort: “Ti hofnung is een wachtraam.” Un, khërtslich, te amerikanix politik Benjamin Franklin hot mit xnauts kesaat: “Weer fon hofnung leept, ferhungert.”

Tan, was is ti woerheet iwer ti hofnung? Is se etwas woo ploos in unser khop is, een aat fer ti layt troost in leyer treem suuche? Orer, kept tas een kuute uersach fer ti hofnung wii etwas kreeses aan siin — etwas woo mer al prauche fer uns kesunt un froo hale, woo eene woere funtament hot un woo wërklich nutse pringt?